ޕީޕީއެމް ޕްރައިމަރީގައި ވާދަކުރައްވާ އެޕާޓީގެ އިންތިގާލީ ނައިބު ރައީސްކަން ކުރެއްވި އުމަރު ނަސީރު ކެމްޕެއިން ޓީމުގެ ފަރާތުން މިރޭ އާޓިފިޝަލް ބީޗުގައި ބޭއްވި ޖަލްސާއަށް މީހުން މަދުން ދިޔައީ ފޭކް އެސްއެމްއެސްތަކެއް ފެތުރުމުން ކަމަށް އެޓީމުން ބުނެފި އެވެ.
މިރޭ 9 ޖެހިއިރު ފަށަން އޮތް ޖަލްސާ ނުފެށި ލަސްވަމުން ގޮސް 9:40 ހާއިރު އިއުލާންކުރީ ޖަލްސާ ކެންސަލްވެއްޖެ ކަމަށް ބުނެ ބަޔަކު ފޭކް އެސްއެމްއެސް ފަތުރަމުންދާ ކަމަށާއި އެހެންކަމުން ޖަލްސާ ކުޑަ ތަންކޮޅެއް ލަސްވެދާނެ ކަމަށެވެ.
އަދި އެތަނުގައި އެވަގުތު ތިބި ވީހާވެސް ގިނަ ބަޔަކު ގޭގައި ތިބި މީހުންނަށް ވެސް އެސްއެމްއެސް ކުރުމަށްފަހު ޖަލްސާ ކެންސަލްނުވާ ވާހަކަ އަންގައިދިނުމަށް ވެސް އެދުނެވެ.
ގާތް ގަނޑަކަށް 10 ޖަހާކަންހާއިރު ޖަލްސާ ފެށުނުއިރު ވެސް ގިނަ އަދަދަކަށް ހުސް ގޮނޑި ހުއްޓެވެ.
އުމަރު ނަސީރުގެ ޓީމުން ބުނީ މާދަމާ ރޭ ކެމްޕެއިން ފަހު ޖަލްސާ ވިލިމާލޭގައި އޮންނާނެ ކަމަށާއި ޖަލްސާ ކެންސަލްވި ކަމަށް ބުނެ މެސެޖް ފޮނުވި ކަމުގައިވިޔަސް ބޮޑު ކަމެއް ދިމާނުވަންޏާ ޖަލްސާ ކެންސަލް ނުވާނެ ކަމަށެވެ.
އަދި މާދަމާ ރޭ ވިލިމާލެއަށް ދާން ބޭނުން ފަރާތްތަކަށް ޒީނަތްތެރިކުރެވިފައިވާ ހާއްސަ ދޯނިތަކެއް ހުންނާނެ ކަމަށް ވެސް ބުންޏެވެ.