ރައްޔިތުންގެ މަޖިީހުގެ ދިއްގަރު ދާއިރާގެ މެމްބަރު އަހްމަދު ފާރިސް މައުމޫނު ގާނޫނާ ހިލާފަށް ހައްޔަރުކޮށްގެން އުޅޭ ފަރާތްތަކުން އެކަމުގެ އަގު ދައްކަން ޖެހޭނެ ކަމުގައި ފާރިސްގެ ބައްޕަ އަދި ކުރީގެ ރައީސް މައުމޫން އަބްދުލްގައްޔޫމް ވިދާޅުވެއްޖެ އެވެ.
ރައީސް މައުމޫން މިހެން ވިދާޅުވީ ފާރިސް މައުމޫން ޖަލުގައި ހުންނަވާތާ އިއްޔެ އަށް 180 ދުވަސް ވުމާ ގުޅިގެން މިރޭ ކުރައްވާފައިވާ ޓްވީޓެއްގަ އެވެ.
ރައީސް މައުމޫންގެ ޓްވީޓްގައި ވިދާޅުވީ ކޯޓު ހުކުމެއް ނެތި ފާރިސް ޖަލުގައި ހުންނަވާތާ އިއްޔެއަށް 180 ދުވަސްވީ ކަމަށެވެ. ފާރިސް ޖަލުގައި ހުންނަވާތާ މިހާ ގިނަ ދުވަސްވީއިރު ފާރިސް ގޯސްކޮށް ކުރައްވާފައިވާ ކަމެއްގެ ހެތްކެއް ކޯޓަށް ހުށައެޅިފައި ނުވާ ކަމަށްވެސް ވިދާޅުވި އެވެ.
ރައީސް މައުމޫން އިތުރަށް ވިދާޅުވީ އިންސާފުގެ ބޭރުން ފާރިސް ހައްޔަރުކޮށްގެން އުޅޭ މީހުން ވަރަށް އަވަހަށް ނޫނީ ފަހުން ނަމަވެސް އެކަމުގެ އަގު ދައްކަންޖެހޭނެ ކަމަށެވެ.
ރައްޔިތުންގެ މަޖިލީހުގެ މެންބަރުންނަށް ރިޝްވަތު ހުށަހެޅި ކަމުގެ ތުހުމަތުގައި ފާރިސް ހައްޔަރުކުރީ މިދިޔަ އަހަރުގެ ޖުލައި މަހުގެ 18 ވަނަ ދުވަހު އެވެ. އަދި އޭނާގެ ޝަރީއަތް ނިމެންދެން ބަންދުގައި ބަހައްޓަން ކްރިމިނަލް ކޯޓުން އަމުރުކުރީ މިދިޔަ އަހަރުގެ ޖުލައި މަހުގެ 19 ވަނަ ދުވަހު އެވެ.
ފާރިސްއަށް ކުރާ ރިޝްވަތު ދިނުމުގެ ދައުވާ ސާބިތުވެއްޖެނަމަ ތިން އަހަރާއި ދެ މަހާއި 12 ދުވަހުގެ ޖަލު ހުކުމެއް އިއްވާނެ އެވެ. އެފަދަ ހުކުމެއް އިއްވައިފިނަމަ ފާރިސްގެ މަޖިލިސް މެންބަރުކަން ގެއްލި ދިއްގަރު ދާއިރާގެ ގޮނޑި ހުސްވާނެ އެެވެ.
ޕީޕީއެމްގެ ދިދައާއި ލޯގޯ ހުއްދަނެތި ބޭނުން ކުރެއްވި ކަމަށް ބުނެ ފާރިސްގެ މައްޗަށް ދައުލަތުން ވަނީ ޝަހްސު އޮޅުވާލުމުގެ ދައުވާ ވެސް އުފުލާފަ އެވެ. މިދައުވާ ފާރިސްގެ މައްޗަށް ސާބިތުވެއްޖެނަމަ ނުވަ މަހާއި 18 ދުވަހުގެ ޖަލު ހުކުމެއް އިއްވާނެ އެވެ.
ފާރިސް ހައްޔަރުކޮށްގެން އުޅޭ ފަރާތްތަކުން އެކަމުގެ އަގު ދައްކަންޖެހޭނެ: މައުމޫން
އަރުޝީފަށް ނެގީ
އެންމެފަހުން އަޕްޑޭޓްކުރީ
އެންމެފަހުން އަޕްޑޭޓްކުރީ