މާލޭގެ ބޮޑު ބަޔަކުން މިއަދު ހެނދުނު ކަރަންޓް ކަނޑައިގެން ހިނގައްޖެ އެވެ.
ސްޓެލްކޯގެ ޑިރެކްޓަރު މުހައްމަދު ޒަމީލް ވިދާޅުވީ މިއަދު ހެނދުނު މާލޭގެ ތިން ބައިކުޅަ ދެ ބައިން ކަރަންޓް ކަނޑައިގެން ދިޔަ ކަމަށެވެ.
އޭނާ ވިދާޅުވީ ކަރަންޓް ކަނޑައިގެން ދިޔައީ ސްޓެލްކޯގެ އެންމެ ބޮޑު ދެ ޖަނަރޭޓަރު ސިސްޓަމް، 6.5 މެގަވޮޓްގެ ދެ ޖަނަރޭޓަރުގެ ތެރެއިން އޭރު ހިންގާފައި ހުރި ޖަނަރޭޓަރަށް ދިމާވި ޓެކްނިކަލް މައްސަލައެއްގެ ސަބަބުން ކަމަށެވެ.
"ބޮޑު ދެ ޖަނަރޭޓަރުގެ ތެރެއިން އެއް ޖަރަނޭޓަރުގެ މެއިންޓަނަންސްގެ މަސައްކަތް މިހާރު ކުރަމުން ދަނީ. މިއަދު ހިންގާފައި ހުރި ބޮޑު ޖަނަރޭޓަރަށް ދިމާވި މައްސަލަ ހައްލު ނުކުރެވިގެން ކަރަންޓް ދިނީ އެހެން ޖަނަރޭޓަރުތައް ބޭނުންކޮށްގެން. މާލެ އިން ކަރަންޓް ދިޔަ ހުރިހާ ސަރަހައްދަކަށް ކަރަންޓް ދިނުމަށް 40 މިނެޓް ހޭދަވި. ބައެއް ސަރަހައްދުތަކަށް ވިއްސަކަށް މިނެޓް ތެރޭގައި ވެސް ކަރަންޓް ދެވުނު،" ޒަމީލް ވިދާޅުވި އެވެ.
މިހާރު ކުދި ޖަނަރޭޓަރުތައް ބޭނުންކޮށްގެން ކަރަންޓް ދެމުންދިޔައަސް، މިއަދަކީ ހޮނިހިރު ދުވަހަށް ވެފައި އަދި ފިނި ދުވަހަކަށް ވާތީ ލޯޑް ބޮޑުވެގެން ކަރަންޓް ދިއުމުގެ ފުރުސަތު ވަރަށް ކުޑަ ކަމަށް ޒަމީލް ވިދާޅުވި އެވެ.
މިއަދު މައްސަލަ ދިމާވި 6.5 މެގަވޮޓްގެ ޖަނަރޭޓަރަށް ކުރިމަތިވި މައްސަލަ މިއަދު ހައްލުކުރެވޭނެ ކަމަށް ޒަމީލް ވިދާޅުވި އެވެ.