މަޖުބޫރުން މަސައްކަތް ކުރުވައިގެން އަހަރަކު 150 ބިލިއަން ޑޮލަރުގެ ފައިދާ އެކި ފަރާތްތަކުން ހޯދާ ކަމަށާއި މިފަދަ ކަންކަމުގައި އެންމެ ބޮޑަށް އުޅެނީ ކުށްވެރިންގެ ޖަމާއަތްތައް ކަމަށް އިންޓަނޭޝަނަލް ލޭބަ އޯގަނައިޒޭޝަން (އައިއެލްއޯ) އިން ބުނެފި އެވެ.
އައިއެލްއޯގެ ދިރާސާ ރިޕޯޓްގައި ބުނެފައި ވަނީ މަޖުބޫރީ ހާލަތުގައި މަސައްކަތްކުރަމުން އަންނަ 21 މިލިއަން މީހުން އުޅޭ ކަމަށާއި މިކަމުގެ ނުރައްކާ އެންމެ ބޮޑީ އަމިއްލަ ގައުމު ނޫން އެހެން ގައުމުތަކަށް ގޮސްގެން ވަޒީފާ އަދާކުރާ މީހުންނަށް ކަމަށެވެ.
އައިއެލްއޯ އިން ބުނީ މަޖުބޫރުން މަސައްކަތް ކުރުވައިގެން ލިބޭ ކަމަށް އަންދާޒާ ކުރެވޭ ފައިދާ ކުރިން ހީކުރިވަރަށް ވުރެ އެތައް ގުނައެއް އިތުރު ކަމަށެވެ. އެހެންވެ މި މައްސަލާގައި ސަރުކާރުތަކުން ހަރުދަނާ ފިޔަވަޅުތަކެއް އެޅުމަށް އައިއެލްއޯ އިން ވަނީ ގޮވާލައިފަ އެވެ.
ދިރާސާގައި ބުނެފައި ވަނީ މަޖުބޫރީ ހާލަތުގައި މަސައްކަތްކުރާ މީހުންގެ ތެރެއިން ދެ ބައިކުޅަ އެއް ބަޔަށް ވުރެ ގިނަ މީހުން އުޅެނީ އޭޝިއާ ސަރަހައްދުގައި ކަމަށާއި 18 ޕަސެންޓް މީހުން އުޅެނީ އެފްރިކާގައި ކަމަށެވެ. އަދި ލެޓިން އެމެރިކާ ސަރަހައްދުގައި 10 ޕަސެންޓް މީހުން އުޅޭ ކަމަށް ވެސް ބުނެފައިވެ އެވެ.
"މި ރިޕޯޓާ އެކު ޓްރެފިކިން އާއި މަޖުބޫރުން މަސައްކަތް ކުރުވުމާއި ޒަމާނީ އަޅުވެތިކަމާ މެދު ދެކޭ ގޮތް އިތުރަށް ގޯސްވެގެން ހިނގައްޖެ،" އައިއެލްއޯގެ ޑިރެކްޓަ ޖެނެރަލް ރައިޑަ ވިދާޅުވި އެވެ.
ދިރާސާގައި ބުނެފައިވަނީ ގަދަކަމުން މަސައްކަތް ކުރުވައިގެން ހޯދާ ފައިދާގެ އެއްވެސް މިންވަރެއް އެ މަސައްކަތްކުރާ މީހާ އަށް ނުލިބޭ ކަމަށާއި އެއިން ޓެކްސް ވެސް ނުދައްކާ ކަމަށެވެ. އަދި މި ނަހަމަ ފައިދާގެ ބޮޑު ބައެއް ހިއްސާކުރަނީ ޖިންސީ ވިޔަފާރި ކުރުވައިގެން ކަމަށް ވެެސް ބުނެފައިވެ އެވެ. ދެން އެންމެ ބޮޑު ފައިދާއެއް ހޯދަނީ ގޭތެރޭގެ މަސައްކަތް ކުރުވައިގެންނެވެ. މީގެ އިތުރުން ދެން އެންމެ ފައިދާ ނަގަނީ ދަނޑުވެރިކަމާއި އިމާރާތް ކުރުމުގެ އިންޑަސްޓްރީންނެވެ.