ޕީޕީއެމުން މިރޭ ކާނިވާ ސްޓޭޖްގައި ބާއްވަން ހަމަޖައްސާފައިވާ ޖަލްސާގެ ކުރިން ޕީޕީއެމްގެ ޕްރައިމަރީގައި ނާކާމިޔާބުވެވަޑައިގެންނެވި އުމަރު ނަސީރު ޕަބްލިކުގައި މައާފަށް އެދުމަށް ޕީޕީއެމްގެ ކައުންސިލުން ނިންމާ އެކަން އުމަރަށް ރަސްމީކޮށް އަންގައިފިއެވެ.
ޕީޕީއެމްގެ ކުއްލި ކައުންސިލް ބައްދަލުވުމަކަށްފަހު މިއަދު މޫކައި ސުއިޓްސްގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ޕީޕީއެމްގެ ތަރުޖަމާން އަދި ގަލޮޅު ދެކުނު ދާއިރާގެ މެންބަރު އަހްމަދު މަހްލޫފް ވިދާޅުވީ އުމަރު ނަސީރު ރޭ އޭނާގެ ސަޕޯޓަރުންނާއިއެކު އާޓިފިޝަލް ބީޗުގައި ބޭއްވި ބައްދަލުވުމަކީ ޕާޓީގެ އަސާސީ ޤަވައިދާއި އަދި ޕްރައިމަރީގެ ކުރިން އެއްބަސްވެވިފައިވާ ގޮތާއި ޚިލާފަށް ބާއްވާފައިވާ ބައްދަލުވުމެއް ކަަމަށެވެ.
އަދި އެބައްދަލުވުމުގައި ވާހަކަ ދެއްކެވި ބައެއް ބޭފުޅުން ކުރައްވާފައިވާ ތުހުމަތުތަކަކީ ހަޤީގަތާއި ޚިލާފު ބޮޑެތި ތުހުމަތުތަކެއް ކަމަށާ، އެކަމުގެ ހަޤީގަތް ޕީޕީއެމްއިން ބަލަންވެސް ބޭނުން ނުވާ ކަމަށެވެ.
މަހްލޫފް ވިދާޅުވީ އުމަރު ނަސީރު ރޭ ދެއްކެވި ވާހަކަފުޅު ތަކާއި ގުޅިގެން ޕަބްލިކްގައި މައާފަށް އެދުމަށް ކައުންސިލުން ނިންމާފައިވާ ގޮތަށް އޭނާ އަމަލުނުކޮށްފިނަމަ ދެން އަޅަންޖެހޭ ފިޔަވަޅުތައް ޕާޓީން އަޅާނެ ކަަމަށެވެ.
މަހްލޫފް ވިދާޅުވީ އުމަރު ދެއްކެވި ހަޤީގަތާއި ޚިލާފު ވާހަކފުޅުތަކާއި ގުޅިގެން ޕާޓީން ފިޔަވަޅު އެޅުމުގެ ބަދަލުގައި އެވާހަކަތައް ރައްދުވާ ފަރާތްތަކުން އަމިއްލަގޮތުންވެސް ޤާނޫނީ ފިޔަވަޅު އަޅަމުންގެންދާނެ ކަމަށެވެ.
މަހްލޫފު ވިދާޅުވީ އުމަރު މައާފަށް އެދުމަށް ކައުންސިލުން ނިންމީ މިއަދުގެ ބައްދަލުވުމުގައި ބައިވެރިވި ފަންސަވީސް ބޭފުޅުންގެ ތެރެއިން ސައުވީސް ބޭފުޅުންގެ އަޣުލަބިއްޔަތުން ކަމަށެވެ. މަޝްހޫރު ޤާނޫނީ ވަކީލު މުޙައްމަދު ވަޙީދު އިބްރާހިމް އެއްވެސް ކޮޅަކަށް ވޯޓް ދެއްވާފައި ނުވާ ކަމަށްވެސް މަހްލޫފް ވަނީ ވިދާޅުވެފައެވެ.
ރައީސް މައުމޫންގެ އެންގެވުމާއި ޚިލާފަށް އުމަރު ނަސީރު ރޭ ޖަލްސާއެއް ބޭއްވުމަށްފަހު ޕީޕިއެމްގެ ޕްރައިމަރީ ކުރިއަށްދިޔަ ގޮތަށާއި ޕީޕީއެމްގެ ރިޔާސީ ކެންޑިޑޭޓް އަބްދުﷲ ޔާމިނަށް ވަނީ ވަރަށް ބޮޑަށް ފާޑު ވިދާޅުވެފައެވެ. އަދި މިރޭ ރައީސް މައުމޫން ބާއްވަވާ ޕީޕީއެމްގެ ޖަލްސާއަށް އުމަރުގެ ސަޕޯޓަރުން ނުދާނެ ކަމަށް އުމަރުގެ ކެމްޕޭން މެނޭޖަރު މާޒް އަޙްމަދު ސަލީމް ވަނީ މީޑިޔާގައި ވިދާޅުވެފައެވެ.
އުމަރު ނަސީރު ޕަބްލިކުގައި މައާފަށް އެދުމަށް ޕީޕީއެމްގެ ކައުންސިލުން ނިންމާ އެކަން އުމަރަށް ރަސްމީކޮށް އަންގާފައިވާނެ ކަމަށް ޕީޕީއެމްއިން ބުނި ނަމަވެސް އުމަރު މިރޭ ވިދާޅުވީ އޭނާއަށް ޕީޕީއެމް ކައުންސިލްގެ ނިންމުން އަދި ލިބިފައި ނުވާ ކަމަށާ، ކައުންސިލްެގެ ނިންމުމާއި މެދު އެއްޗެއް ބުނަން އިގޭނީ ކައުންސިލްގެ ނިންމުން ރަސްމީކޮށް ލިބުމުން ކަމަށެވެ.
އޭއެފްސީ ކަޕުގެ ދެ ވަނަ ބުރަށް ދިއުމުގެ އަމިއްލަ ބާރު ދެމެހެއްޓުމަށް ގްރޫޕް ޖީގެފުލުގައި އޮތް މިޔަންމާގެ އަޔޭއަވަދީ އަތުން މާދަމާ މޮޅުވުމުން ވަރަށް މުހިންމު ކަމަށް މާޒިޔާއިން ބުނެފި އެވެ.
މުބާރާތުގައި މާޒިޔާ މިހާތަނަށް ކުޅުނު ދެ މެޗުން ލިބިފައިވަނީ އެންމެ ޕޮއިންޓެކެވެ. އެއީ މެލޭޝިޔާގައި ކެލަންޓަންއާއެކު ކުޅުނު މެޗު އެއްވަރުކޮށްގެން ލިބުނު ޕޮއިންޓެވެ. މާޒިޔާގެ ދެ ވަނަ މެޗުގައި މާލެގައި ކުޅެގެން ބަލިވީ ވިއެޓްނާމުގެ ޑަނާންގް އަތުންނެވެ. މިހެންވެ ގްރޫޕް ޖީގައި އެ ޓީމު އޮތީ ތިން ވަނާގަ އެވެ. އަޔޭއަވަދީ އަށް އެއްވެސް ޕޮއިންޓެއް ނުލިބެ އެވެ. ގްރޫޕުގެ ކުރީގައި ވަނީ ހަ ޕޮއިންޓާއެކު ޑަނާންގެވެ. ކެލަންޓަން ދެވަނާގައިވަނީ ހަތަރޮ ޕޮއިންޓާއެކުގަ އެވެ.
މިހެންވެ އިންމަ ބުނީ އަމިއްލަ ދަނޑުގައި މާދަމާ މޮޅުވުންނޫން އެހެން ގޮތެއް ނެތް ކަމަށާއި ބަލިވެއްޖެނަމަ ދެ ވަނަ ބުރަށް ދިއުމަކީ ދުރުކަމެއް ކަމަށެވެ.
"އަސްލު މިއީ ވަރަށް މުހިންމު މެޗެއް. މޮޅުވެގެންނޫނީ ދެން ނެތް ކުރިއަށް ދެވޭކަށް. އަމިއްލަ ބާރު ނެތި ކިހިނެތް ކުރިއަށްދާނީ. އެހެންވެ މި މެޗު މިއީ ކޮންމެހެން ގެންނަން ޖެހޭ މެޗެއް،" އިންމަ ބުންޏެވެ.
މެޗާ ބެހޭ ގޮތުން އަޔޭއަވަދީގެ ކޯޗު މަރްޔާން ސެކޫލޯސްކީ ބުނީ އޭނާގެ ޓީމު ކުރީ ދެ މެޗުން ބަލިވީ ނިންމުން ގޯސްވުމުން ކަމަށާއި މާދަމާގެ މެޗަށް ކުޅުންތެރިން ވަރަށް ސީރިއަސް ކަމަށެވެ.
އަދި މާޒިޔާ އަކީ ވަރުގަދަ ޓީމެއް ކަމަށާއި މެޗުން މޮޅުވެވޭނީ ވަރަށް މަސައްކަތްކޮށްގެން ކަމަށެވެ،. އަދި ބަލިވެއްޖެނަމަ ބާކީ ތިން މެޗު އޮއްވައި މުބާރާތާ އަލްވަދާއުކިޔަން ޖެހޭކަން ކުޅުންތެރިންނަށް ވަރަށް ރަނގަޅަށް އެނގޭ ކަމުގަ އެވެ.
މި މެޗު ފަށާނީ މާދަމާ ހަވީރު ހަތަރެއް ޖަހާއިރު އެވެ. މެޗު ވީޓީވީން ވަގުތުން ދުރައް ދައްކާނެ އެވެ.