އިންޑިއާގެ ޖީއެމްއާރު އަތުން އިބްރާހިމް ނާސިރު އިންޓަނޭޝަނަލް އެއާޕޯޓް އަތުލުމަށް ސަރުކާރު ހިންގާ އިއްތިހާދުގެ ބައެއް ޕާޓީތަކާއި މަދަނީ އިއްތިހާދު ގުޅިގެން ހިންގާ ހަރަކާތަށް އެހީވުމަށް ރޭ ބެހެއްޓި ފަންޑުފޮށްޓަށް ކުރީގެ ވަޒީރު އުމަރު ޒާހިރު 10000ރ ހަދިޔާ ކުރައްވައިފިއެވެ.
"ދިވެހިންގެ އެއާޕޯޓް ދިވެހިންނަށް" މި ނަމުގައި އާރޓިފިޝަލް ބީޗް ސަރަހައްދުގައި ރޭ ވާހަކަ ދައްކަވަމުން ޢަދާލަތު ޕާޓީގެ ރައީސް އައްޝައިޚް އިމްރާމް އަބްދުﷲ ވިދާޅުވީ ފަނޑުފޮށްޓަށް އުމަރު ޒާހިރު 10 ހާސް ރުފިޔާ ދެއްވާފައިވާކަމަށާއި އަދި އެއަރޕޯޓް ހެދުމަށް މަސައްކަތް ކުރި ދުވަސްވަރުގެ ހަނދާންތައް އާވަމުން ދާކަމަށް ވިދާޅުވެ އެސްއެމްއެސް ފޮނުއްވާފައިވާކަމުގައެވެ. އުމަރު ޒާހިރު މިވަރުތު ހުންނެވީ އިންޑިއާގެ ކޮއިންޕަތޫރްގައެވެ.
ރޭގެ ހަރަކާތުގައި ބެހެއްޓި ފަންޑު ފޮށި ހުޅުއްވައިދީފައިވަނީ އިބްރާހިމް ނާސިރުގެ ދައުރުގައި އޭރު އެއާޕޯޓް ހެދުމުގައި އަމަލީގޮތުން ބައިވެރިވި އުމުރުން ދުވަސްވީ ދެމީހުންނެވެ.
ސަރުކާރު ހިންގާ އިއްތިހާދުގެ ތެރެއިން ޑީއާރުޕީ ފިޔަވައި ދެން ހިމެނޭ ސިޔާސީ ޕާޓީތަކާއި މަދަނީ އިއްތިހާދު ގުޅިގެން ރޭ ފެށި ސިލްސިލާ ހަރަކާތްތަކުގައި ޕާޓީތަކުގެ އިސްވެރިން ބައިވެރިވެވަޑައި ގަންނަވާފައެއް ނުވެއެވެ. ސިޔާސީ ޕާޓީތަކުގެ އިސްވެރިންގެ ތެރެއިން ރޭގެ އެއްވުމުގައި ބައިވެރިވެވަޑައިގެންނެވީ ޢަދާލަތު ޕާޓީގެ ރައީސް އައްޝައިޚް އިމްރާން އަބްދުﷲ އެކަންޏެވެ.