ލަންޑަނުގައި ދިރިއުޅުއްވާ ދިވެހިރާއްޖޭގެ ސިޔާސީ ބައެއް ފަރާތްތަކުގެ މައްޗަށް އެކުލެވޭ ލަންޑަން ކްލަބުގެ ފަރާތުން ރާއްޖޭގައި ހިންގަމުން ގެންދާ އިދިކޮޅު އިއްތިހާދު ހުއްޓުވަން ޖެހޭކަމަށް އެމްޑީޕީގެ ކުރީގެ ނައިބުރައީސް އަލްހާން ފަހުމީ ވިދާޅުވެއްޖެއެވެ.
އަލްހާން ވިދާޅުވީ އެމްޑީޕީއަކީ ރަސްމީ ސިޔާސީ ޕާޓީއެއް ކަމަށާއި އެހެންނަމަވެސް ނުރަސްމީކޮށް ހިންގަމުން އަންނަ އިދިކޮޅު އިއްތިހާދުގެ ސަބަބުން އެމްޑީޕީގެ ވަސް ފުހެމުންދާކަމަށެވެ. އިތުރަށް އޭނާ ވިދާޅުވީ އޮގަސްޓް 12-13 އަކީ މުޤައްދަސް ދުވަސްތަކެއް ކަމަށް ބަލާބަޔަކު މިޤައުމުގައި ނެތް ކަމަށެވެ. ކަންއެހެން އޮތުމާއެކު، "އިދިކޮޅު އިއްތިހާދު ހުއްޓުވަންޖެހޭ" ކަމަށް އަލްހާން ވިދާޅުވިއެވެ.
ރަސްމީ ސިޔާސީ ނިޒާމުގެ ތެރެއިން އިދިކޮޅު އެމްޑީޕީގެ ހަރަކާތްތައް ފަނޑުވެ، އިއްތިހާދެއްގެ ނަމުގައި އިދިކޮޅު ސިޔާސީ ހަރަކާތްތައް އިތުރުވެފައި ވުމުގެ ސަބަބުން ނިޒާމީ ސިޔާސީ ހަރަކާތްތައް ފަހުގެ ތާރީޚެއްގައި ނުދާ މިންވަރަށް ކިލަނބުވެފައި ވަނިކޮށް، އެކަން ހާމަކޮށް އަލްހާން ޓްވީޓް ކުރައްވަން ފެއްޓެވުމާއެކު އެމްޑީޕީގެ ބައެއް ހަރަކާތްތެރިންވެސް ވަނީ އޭނާއަށް ރައްދުދީ ހަދާފައެވެ.
އެހެންނަމަވެސް، އަލްހާން ވިދާޅުވީ އޭނާއަކީ އެމްޑީޕީގެ މެންބަރެއް ކަމަށާއި އެހެނަސް އިދިކޮޅު އިއްތިހާދުގެ މެންބަރެއް ނޫންކަމަށެވެ. އޭނާ އިތުރަށް ވިދާޅުވީ އެ އިއްތިހާދުގައި މާފިޔާ ހިމެނޭ ކަމަށެވެ.