ރިޔާސީ އިންތިހާބު ބާތިލް ނުކުރުމަށް މިއަދު ސުޕްރީމް ކޯޓުން ކުރި ހުކުމަށް އެމެރިކާއިން މަރުހަބާ ކިޔައިފިއެވެ.
އެމެރިކާގެ ފަރާތުން މި ނިންމުމަށް މަރުހަބާ ވިދާޅުވެފައިވަނީ ރާއްޖެއާއި ސްރީލަންކާއަށް އެމެރިކާއިން ކަނޑައަޅާފައި ހުންނެވި ސަފީރުގެ ދައުރު ހަމަވުމުން، ސްރީލަންކާގައި ހުންނަ އެމެރިކާ އެމްބަސީގެ އެންމެ އިސްވެރިއެއްގެ ގޮތުގައި މިވަގުތު ހުންނެވި ރޮބާޓް ހިލްޓަންއެވެ.
ސުޕްރީމް ކޯޓުގެ ހުކުމަށްފަހު ރޮބާާޓް ކުރެއްވި ޓުވީޓެއްގައި ވިދާޅުވެފައިވަނީ ރާއްޖޭގެ ސުޕްރީމް ކޯޓުގެ ނިންމުމަށް މަރުހަބާ ވިދާޅުވާ ކަމަށެވެ. އަދި އިންތިހާބީ ރައީސް އިބްރާހީމް މުހައްމަދު ސޯލިހު ހުވާކުރެއްވުމަށްފަހު އެމަނިކުފާނުގެ ޒައާމަތުގައި ދެގައުމު ގުޅިގެން ގިނަ މަސައްކަތްތަކެއް ކުރުމަށް އުންމީދު ކުރައްވާ ކަމަށެވެ. އަދި ދިވެހިންނަށް ލިބިގެން މިދިޔައީ ވަރަށް އުންމީދީ އާ ޒަމާނެއް ކަމަށްވެސް ރޮބާާޓްގެ ޓުވީޓުގައި ވިދާޅުވެފައިވެއެވެ.