ސެޕްޓެމްބަރ 11 އިގެ ޙަމަލާތަކަށްފަހު އެމެރިކާގެ އަމާޒާއި މިސްރާބު ގެއްލި އެމެރިކާގެ ސާފްކަފް (އެމެރިކަން ސެންޗަރީ) ނިމުމަކަށް އައިސްފި ކަމަށް އެމެރިކާގެ މަޝްހޫރު ލިޔުންތެރިއެއް ކަމަށްވާ ރޮޖަރ ކޯހެން ވިދާޅުވެއްޖެވެ.
އެމެރިކާގެ ނޫހެއް ކަމަށްވާ "ނިޔުޔޯކް ޓައިމްސް" ގައި ކޯހެން ލިޔުއްވާފައިވާ މަޒްމޫނެއްގައިވާ ގޮތުން ސެޕްޓެމްބަރ 11 އިގެ ޙަމަލާތަކަށްފަހު އެމެރިކާ ފެނިގެންދިޔައީ ކޮންމެފަދަ ނުބައިކަމެއްވެސް ކުރަން ޖެހިލުންނުވާ އަޚްލާޤެއްނެތް "ރެކްލެސް" ޤައުމެއްގެ ގޮތުގައެވެ. ސެޕްޓެމްބަރ 11 އިގެ ޙަމަލާތަކާއެކު 21 ވަނަ ޤަރުނު ފެށުނީ ބައިނަލްއަޤްވާމީ ބާރުގެ ތިލަފަތް އައު ނިޒާމަކަށް ބައްޓަންވުމުގެ ތެރެއިން ކަމަށާއި ބައިނަލްއަޤްވާމީ މި އައު ނިޒާމުގައި އެމެރިކާއަށްވެސް ޖެހިފައިވަނީ ބޮޑެތި ބާރުތަކަށް ވުމުގެ މަގުމަތީގައި އުޅޭ ރަޝިޔާ، ޗައިނާ، އިންޑިޔާ އަދި ބްރަޒިލް ފަދަ ޤައުމުތަކާއެކު ދުނިޔޭގެ ޒަޢާމަތަށް ވާދަކުރަން ކަމަށްވެސް ކޯހެން ލިޔުއްވާފައިވެއެވެ.
ބައިނަލްއަޤްވާމީ ބާރުގެ އައު ނިޒާމު ބައްޓަންވާންފެށީ ސެޕްޓެމްބަރު 11 އިގެ އެޙަމަލާތަކަށްފަހު އެމެރިކާ ކުރި ޚަރަދުބޮޑު ހަނގުރާމަތަކުގެ ސަބަބުން އިޤްތިސާދީ ގޮތުންނާއި އަޚްލާޤީ ގޮތުން އެމެރިކާ އިނދަޖެހުމުގެ ސަބަބުންތޯ މި މަޒްމޫނުގައި ކޯހެން ސުވާލު ކުރައްވާފައިވެއެވެ. މިސުވާލުގެ ޖަވާބުގައި އޭނާ ވިދާޅުވެފައިވަނީ ޒަމާނާއެކު ބައިނަލްއަޤްވާމީ ބާރުގެ ތިލަފަތަށް ބަދަލުތައް އަންނާނެ ކަމަށާ ނަމަވެސް ސެޕްޓެމްބަރު 11 އިގެ ޙަމަލާތަކަށްފަހު އެމެރިކާ އިނދަޖެހިގެން ދިޔުމުން މިބަދަލުތައް އައުން އަވަސްވެގެން ގޮސްފައިވާ ކަމުގައެވެ.
ކޮހެން ލިޔުއްވާފައިވާ ގޮތުގައި ސެޕްޓެމްބަރު 11 އިގެ ޙަމަލާ ތަކުގެ ދުވަސްވަރު އެމެރިކާގެ ޒަޢާމަތުގައި ހުންނެވީ ކަނާތު ފިޔައިގެ ހައްދު ފަހަނަޅާފައިވާ ނިއުކޮންޒެވެޓިވް އައިޑިޔޮލޮޖީގެ މޮޔަ ރައީސެކެވެ. އެ މޮޔަ ރައީސްގެ ޒަޢާމަތުގައި އެއްވެސް ތައްޔާރުވުމެއް ވިސްނުމެއްނެތި ބޭކާރު ދެހަނގުރާމައަށް އެމެރިކާ ވައްދާފައިވާ ކަމަށާއި އެކަމުގެ ސަބަބުން އެމެރިކާ ހަލާކުގެ ތެރެއަށްވެއްޓި އިޤްތިސާދު އިނދަޖެހި ކަރާމާތް ފުނޑުފުނޑުވެގެން ގޮސްފައިވާ ކަމުގައެވެ.
ނަތީޖާއަކީ ސެޕްޓެމްބަރު 11 އިގެ ޙަމަލާތަކުގައި މަރުވި އެމެރިކާގެ ރައްޔިތުންނަށްވުރެ ދެގުނަ އިތުރަށް ޢިރާޤާއި އަފްޣާނިސްތާނުގައި އެމެރިކާގެ ސިފައިން މަރުވެ އަދި އެމެރިކާގެ އަތްދަށުން އެދެޤައުމުގެ ކުށެއްނެތް އެތަށް ލައްކަަޔަކު މަރުވެގެން ދިޔުމުން ދުނިޔޭގެ އާންމުންގެ ރުޅިއާއި ނަފްރަތު އެމެރިކާއަށް އަމާޒުވެ ކުރިޔަށްވުރެ ބޮޑު ހަލާކެއްގެ ތެރެއަށް އެމެރިކާ ވެއްޓިގެން ދިޔުމެވެ.
އަދި ގުއަންޓެނާމޯ ޖަލާއި އާއި އަބޫޣޫރައިބު ޖަލާއި އެނޫންވެސް ދުނިޔޭގެ ކަންކޮޅުތަކުގައި އެމެރިކާ ޤާއިމް ކޮށްފައިވާ ސިއްރު ޖަލުތަކުގައި މުސްލިމުންނާ ދެކޮޅަށް އެމެރިކާ ހިންގި އިންސާނިއްޔަތާ ޚިލާފު ޢަމަލުތަކަކީ އެމެރިކާގެ ތާރީޚުގައިޖެހުނު ހަޑި ލައްތަކެއް ކަމުގައެވެ. އެޖަލުތަކުގައި މުސްލިމް އަސީރުންނާ ދެކޮޅަށް އެމެރިކާ ހިންގި އިންސާނިއްޔަތާ ޚިލާފް ޖަރީމާތަކުގެ ސަބަބުން އެމެރިކާގެ ޑިމޮކްރަސީ ބޭޒާރުވެ އަޚްލާޤީ ފޭރާން ވީދި އެންމެ ކުދި ޤައުމުތަކުގެ މެދުގައިވެސް އެމެރިކާގެ އަގުވެއްޓި އަމިއްލަ ނަފްސަށް މަކަރުހަދާ ދަށުދަރަޖައިގެ ޤައުމަކަށް އެމެރިކާ ބަދަލުވެގެން ދިޔަމަންޒަރު ކޮހެންގެ މަޒްމޫނުގައި ސިފަކުރައްވާފައިވެއެވެ.
އެ ދުވަސްވަރު އެމެރިކާގައި ވެރިކަންކުރެއްވި ހަރުކަށި ރައީސް ގެންނެވި ނަފްރަތާއި ނުރުހުމާއި ހަރުކަށި ކަމުގެ އައިޑިޔޮލޮޖީތަކުގެ އިތުރުން ވޯލްސްޓްރީޓާއި އެމެރިކާގެ ބޭންކްތަކާއި މާލީމުއައްސަސާތައް ބަނގުރޫޓްވުން ވެގެންދިޔައީ އެހަނގުރާމަތަކުން އެމެރިކާއަށް ކުރިމަތިވި އެންމެ ނުރައްކާތެރި ކާރިޘާކަމަށް ކޯހެން ސިފަކުރައްވާފައިވެއެވެ.
ސެޕްޓެމްބަރު 11 އިގެ ޙަމަލާތަކަށް ފަހު އެމެރިކާ ހިންގި އިންސާނިއްޔަތާ ޚިލާފު ޢަމަލުތަކުގައި ޢިރާޤާއި އަފްޣާނިސްތާނުގެ ކުށެއްނެތް އެތަށް ލައްކަބަޔަކު މަރުވެ ދިޔުމުގެ ސަބަބުން އެޙަމަލާތަކަށް ހަމްދަރްދީ ލިބުމުގެ ބަދަލުގައި އެމެރިކާއަށް ލިބުނީ ދުނިޔޭގެ ރުޅިއާއި ނަފްރަތު ކަމަށްވެސް ކޮހެން ލިޔުއްވާފައިވެއެވެ. (ނިޔުޔޯކް ޓައިމްސް)