ހޭންޑްބޯލް އެސޯސިއޭޝަން އޮފް މޯލްޑިވްސް އިން އިންތިޒާމްކޮށްގެން ބާއްވާ ފުރަތަމަ އިންޓަރ ސްކޫލް ހޭންޑްބޯލް މުބާރާތް މިއަދު ފަށައިފި އެވެ.
ފަސް ސްކޫލަކުން ޖުމްލަ 16 ޓީމު ވާދަކުރާ މި މުބާރާތުގެ ކުޅުން މިއަދު ރަސްމީކޮށް ފައްޓަވައިދެއްވީ ޑރ. ހުސައިން ހަލީމެވެ. ހެންވޭރު ބޯޅަ ދަނޑުގައި ކުރިއަށްގެންދާ މި މުބާރާތުގައި ތިން އުމުރުފުރާއަކުން ދެ ޖިންސުގެ ކުދިން ވަނީ ބައިވެރިވެފަ އެވެ.
މި މުބާރާތުގައި މިއަދު ހަވީރު ޖުމްލަ ހަތަރު މެޗު ކުޅުނު އިރު، ފުރަތަމަ މެޗުގައި ބައްދަލުކުރީ 12 އަހަރުންދަށުގެ އުމުރުފުރާ އިން ކަލާފާނު ސްކޫލާއި ގިޔާސުއްދީން އިންޓަނޭޝަނަލް ސްކޫލެވެ. މި މެޗު 6 ލަނޑު 1 ލަނޑުން ކާމިޔާބުކުރީ ކަލާފާނު ސްކޫލެވެ. މެޗުގެ މޮޅު ކުޅުންތެރިޔާގެ މަގާމަށް ހޮވިފައިވަނީ ކަލާފާނު ސްކޫލުގެ ޖާޒީ ނަމްބަރު 19، އިބްރާހިމް ނަބީހު ނަސީމެވެ.
މިއަދު ކުޅުނު 2 ވަނަ މެޗުގައި 14 އަހަރުންދަށުގެ އުމުރުފުރާއިން ބައްދަލުކުރީ ދަރުމަވަންތަ ސްކޫލާއި މަޖީދިއްޔާ ސްކޫލެވެ. މި މެޗު 8 ލަނޑު 2 ލަނޑުން ދަރުމަވަންތަ ސްކޫލުން ކާމިޔާބުކުރި އިރު، މޮޅު ކުޅުންތެރިޔާގެ މަގާމަށް ހޮވިފައިވަނީ އެ ސްކޫލުގެ ޖާޒީ ނަމްބަރު 11، އިބްރާހިމް އައިމަން އަސްލަމެވެ.
ދުވާލަކު 4 މެޗު ކުޅުމަށް ހަމަޖެހިފައިވާ މި މުބާރާތުގައި މިއަދު ކުޅުނު 3 ވަނަ މެޗުގައި ބައްދަލުކުރީ 12 އަހަރުން ދަށުގެ އުމުރުފުރާއިން ދަރުމަވަންތަ ސްކޫލާއި އިސްކަންދަރު ސްކޫލެވެ. މިމެޗު 8 ލަނޑު 5 ލަނޑުން އިސްކަންދަރު ސްކޫލް ކާމިޔާބުކުރި އިރު، މެޗުގެ މޮޅު ކުޅުންތެރިއަކަށް ހޮވިފައި ވަނީ އެ ސްކޫލުގެ ޖާޒީ ނަމްބަރު 7، އިބްރާހިމް ރަބީތު ތޮނާ އެވެ.
މިއަދު ކުޅުނު ފަހު މެޗުގައި 14 އަހަރުން ދަށުގެ އުމުރުފުރާއިން ކަލާފާނު ސްކޫލާއި އަރަބިއްޔާ ސްކޫލު ބައްދަލުކޮށް 9 ލަނޑު 4 ލަނޑުން ކަލާފާނު މެޗު ކާމިޔާބުކުރި އިރު، މޮޅު ކުޅުންތެރިޔާގެ މަގާމަށް ހޮވިފައި ވަނީ ކަލާފާނު ސްކޫލުގެ ޖާޒީ ނަމްބަރު 7، ފާރިޝް ލުގުމާން އެވެ.