މި ޖެނުއަރީގެ ސާވިސް ޗާޖު އެންމެ ގިނައިން ދިން ރިސޯޓަކަށް، 4،400 އަށްވުރެ ބޮޑު އަދަދަކާ އެކު ރިޒް ކާލްޓަން ވެއްޖެ އެވެ.
ވީ ކިހިނެއް؟ - 'މޯލްޑިވްސް ރިސޯޓް ވޯކާސް' ފޭސްބުކް ޕޭޖުން ހިއްސާކުރި މައުލޫމާތަށް ބަލާއިރު ރިޒް ކާލްޓަންއިން ވަނީ މި މަހު ސާވިިސް ޗާޖުގެ ގޮތުގައި 4،409 ޑޮލަރު ދީފަ އެވެ. އެއީ ބޭންކު ރޭޓުން ބަލައިފި ނަމަ 67,898ރ. އެވެ.
މިދިޔަ ޑިސެމްބަރުގައި ރިޒް ކާލްޓަންއިން ސާވިސް ޗާޖުގެ ގޮތުގައި މުވައްޒަފުންނަށް ދިނީ 1،481.33 ޑޮލަރެވެ.
ތަފްސީލު - ރިސޯޓް ވޯކާސްގެ ފޭސްބުކް ޕޭޖުގައި ހިއްސާކުރި ތަފާސްހިސާބުތަކުގައި ސާވިސް ޗާޖު އެންމެ ގިނައިން ދޭ ރިސޯޓުތަކުގެ ލިސްޓުގެ އެންމެ ކުރީގައި އުޅޭ ބައެއް ރިސޯޓުތަކުން ދިން އަދަދު އަދި ނެތެވެ.
އެންމެ ގިނައިން ސާވިސް ޗާޖު ދިން 10 ރިސޯޓު:
ރިޒް ކާލްޓަން - 4،409 ޑޮލަރު
ޖޯލި މޯލްޑިވްސް - 2،302 ޑޮލަރު
ޕާކް ހަޔަޓް މޯލްޑިވްސް ހަޑަހާ - 2،044.19 ޑޮލަރު
ސޮނޭވާ ޖާނީ - 1،865.42 ޑޮލަރު
އަނަންތަރާ ކިހާވައް - 1،813.51 ޑޮލަރު
ޕަޓީނާ މޯލްޑިވްސް - 1،801.59 ޑޮލަރު
އަވާނީ - 1،616.51 ޑޮލަރު
އެމެރަލްޑް މޯލްޑިވްސް - 1،597 ޑޮލަރު
ސިކްސް ސެންސަސް ކަނުހުރާ - 1،512.94 ޑޮލަރު
ޖޯލި ބީންގް - 1،484 ޑޮލަރު
ގުޅުންހުރި ކަމެއް - މިދިޔަ އަހަރާއި އޭގެ ކުރީ އަހަރުގެ ޖެނުއަރީގައި އެންމެ ގިނައިން ސާވިސް ޗާޖު ދިނީ ވޮލްޑޯފް އެސްޓޯރިއާއިންނެވެ. ނަމަވެސް 2023އާ އަޅާބަލާއިރު މިދިޔަ އަހަރުގެ ސީޒަން ދުވަސްވަރު ރާއްޖެއަށް އައި މަހުޖަނުން މަދުވުމުން ސާވިސް ޗާޖު ދެވުނީ 400 ވަރަކަށް ޑޮލަރު މަދުން، 2،896 ޑޮލަރު (44،656ރ.) އެވެ.
ވޮލްޑޯފް އެސްޓޯރިއާއަށް ފަހު މިދިޔަ އަހަރު އެންމެ ގިނައިން ސާވިސް ޗާޖު ދިން ބައެއް ރިސޯޓުތަކުގެ ތެރޭގައި އިތާފުށި އަދި ވަން އެންޑް އޮންލީ ރީތި ރަށް ހިމެނެ އެވެ. ރީތި ރަށުން މިދިޔަ ޑިސެމްބަރުގައި ސާވިސް ޗާޖުގެ ގޮތުގައި މުވައްޒަފުންނަށް 2،100 ޑޮލަރު ވަނީ ދީފަ އެވެ.