ރައްޔިތުންގެ މަޖިލިސް މެމްބަރުންގެ މުސާރަ ކުޑަކޮށް، ކުރީގެ މެމްބަރުންނަށް ދޭ އިނާޔަތް ކަނޑާލަން ގޮވާލާ ޕެޓިޝަނެއްގައި ސޮއިކުރަން ފަށައިފި އެވެ.
އޮންލައިންކޮށް ސޮއިކުރަން ފަށާފައިވާ އެ ޕެޓިޝަންގައިވަނީ އިގްތިޞާދަށް މާލީ ގޮތުން ބޮޑު ބުރައެއް ކުރިމަތިވެފައިވާ މި ދަނޑިވަޅުގައި މެމްބަރުންނަށް ދޭ ބޮޑު މުސާރަ އާއި ކޮމެޓީ އެލަވަންސް އަދި ޕްރިމިއަމް ހެލްތު އިންޝުއަރެންސްއަކީ ވަރަށް ކަންބޮޑުވާ ކަމެއް ކަމަށެވެ.
އެގޮތުން އެ މެންބަރުންނާއި އާއިލާތަކަށް ދޭ ހެލްތު އިންޝުއަރެންސް ކަނޑާލުމަށާއި ކުރީގެ މެންބަރުންނަށް ދޭ އެލަވަންސްތައް ކަނޑާލުމަށް މި ޕެޓިޝަނުގައި ވަނީ ގޮވާލާފައެވެ. މީގެ އިތުރުން ރައްޔިތުންނެކޭ އެއްގޮތަށް މެންބަރުންނަށް އާސައިންގެ ޚިދުމަތް ދޭން ވެސް ގޮވާލައިފައިވެއެވެ.
ރާއްޖޭގެ ދަރަންޏާއި ބަޖެޓް ޑެފިސިޓް އިތުރުވުން ފަދަ އިގްތިސޯދީ ބޮޑެތި ގޮންޖެހުންތަކާ ކުރިމަތިލާން ޖެހިފައިވާތީ ސަރުކާރުގެ ބޭކާރު ހަރަދުތައް ކުޑަކުރުމަށް ފިޔަވަޅުތައް އެޅުމަކީ ކޮންމެހެން ކުރަންޖެހޭ ކަމަށް ވެސް އެ ޕެޓިޝަނަށް ސޮއި ހޯދަން ފެށި ސަބަބުތަކުގެ ތެރޭގައި ބުނެފައިވެ އެވެ.
“އިންތިހާބުކުރާ މަންދޫބުންނަށް، އެ ބޭފުޅަކު ހިދުމަތްކުރާ އާއްމުންނަށް ނުލިބޭ ޕްރިމިއަމް ހެލްތު ކެއާ ކަވަރޭޖު ލިބުމަކީ ގަބޫލުކުރެވޭ އެއްވެސް ހަމައެއް ނޫން.” ޕެޓިޝަންގައި ބުނެފައިވެ އެވެ.
މީގެ އިތުރުން ކުރީގެ މެމްބަރުންގެ އިނާޔަތްތައް ވެސް ހުއްޓާލައި، މިހާރަށް ވުރެ ޒިންމާދާރުކަމާއެކު ރައްޔިތުންގެ ފައިސާއިން ހަރަދުކުރުމަށް އަވަސް ފިޔަވަޅުތަކެއް އެޅުމަށް އެ ޕެޓިޝަންގައި އިލްތިމާސްކޮށްފައިވެ އެވެ.
މެމްބަރުންނަށް މުސާރައިގެ ގޮތުގައި މަހެއްގެ މައްޗަށް 62،000ރ. އަދި ކޮމިޓީ އެލަވަންސްގެ ގޮތުގައި 20،000ރ. އާ އެކު މަހެއްގެ މައްޗަށް 82،500ރ. ލިބެ އެވެ.