ޞިއްޙީ ދާއިރާއަށް 47 އަހަރަށް ވުރެ ދިގު މުއްދަތަކު ޚިދުމަތް ކުރެއްވި، އެތައް ބަޔަކަށް ބޭސްފަރުވާ ކޮށްދެއްވި ޚިދުމަތްތެރިޔާ، ޢަބްދުލްކަރީމް އާދަމް (ކަރީމްބެ) އަވަހާރަވުމުގެ ހިތާމައިގާ، އެ މަރުޙޫމްގެ ޢާއިލާއަށް ރައީސް ޑރ. މުޙައްމަދު މުޢިއްޒު، ތަޢުޒިޔާ ވިދާޅުވެއްޖެއެވެ.
ރައީސުލްޖުމްހޫރިއްޔާ ވިދާޅުވީ، ކަރީމްބެ އަވަހާރަވުމަކީ ރާއްޖޭގެ ޞިއްޙީ ޚިދުމަތުގެ ދާއިރާއަށް ލިބުނު ބޮޑު ގެއްލުމެއް ކަމަށެވެ. އެމަނިކުފާނު ފާހަގަކުރެއްވި ގޮތުގައި، މި ގެއްލުނީ، ޞިއްޙީ ދާއިރާއަށް މި ވޭތުވި ބައި ގަރުނަށް ވުރެ ގިނަ ދުވަހު އައި ބަދަލުތައް ގާތުން ދެކެވަޑައިގެންނެވި، ތަޖްރިބާކާރު އަދި އެންމެންގެ ލޯތްބާއި އިޙްތިރާމް ލިބިވަޑައިގެން ހުންނެވި ނަމޫނާ ޝަޚްޞިއްޔަތެކެވެ.
މީގެ އިތުރުން ރައީސް ޑރ. މުޢިއްޒު ވިދާޅުވީ، މަރުޙޫމް ޢަބްދުލްކަރީމް އާދަމް އަކީ ދިވެހި ދައުލަތަށް ދިގު މުއްދަތަކު ޚިދުމަތްކުރެއްވުމުގެ އިނާމު ލިބިވަޑައިގެންފައިވާ ޝަރަފްވެރިއެއް ކަމަށެވެ.
ރައީސުލްޖުމްހޫރިއްޔާގެ ހިތުގެ އިޚްލާޞްތެރި ދުޢާއަކީ، މާތްﷲގެ ރުއްސެވުމާއި ފުއްސެވުމުގައި، ސުވަރުގޭގެ ދާއިމީ ނިޢުމަތުގައި މަރުޙޫމް ޢަބްދުލްކަރީމް އާދަމް ލެހެއްޓެވުމެވެ. އާމީން.
 
އަބްދުލްކަރީމް އާދަމް ދިވެހި ދައުލަތަށް 47 އަހަރު ޚިދުމަތް ކުރެއްވިއެވެ. 1961 ވަނަ އަހަރުން ފެށިގެން 2009 ވަނަ އަހަރާ ހަމައަށް ޞިއްޙީ ދާއިރާގައި ގިނަ މަސައްކަތްތަކެއް ކުރެއްވިއެވެ. ރިޓަޔަރ ކުރެއްވިއިރު ހުންނެވީ މޯލްޑިވްސް ފުޑް އެންޑް ޑްރަގް އޮތޯރިޓީގެ ޑެޕިއުޓީ ޑިރެކްޓަރުގެ މަގާމުގައެވެ.
އޭނާ ވަނީ ޓީ.ބީ.އާއި ފައިލޭރިއާއާއި، ލެޕްރަސީ ފަދަ ބަލިތަކަށް ފަރުވާދިނުމުގައި އެކި އަތޮޅުތަކުގައި 4 އަހަރަށްވުރެ ގިނަ ދުވަސް ހޭދަކުރައްވައިފައެވެ. މާލޭގެ ފެންވަޅު ކްލޮރިނޭޓް ކުރުމާއި، ބޯފެން ޓެސްޓް ކުރުމާއި، ކޮލެރާ ވެކްސިން ދިނުމުގެ މަސައްކަތް ވެސް ކުރެއްވިއެވެ. މީގެ އިތުރުން، ހޮޓާ ރެސްޓޯރެންޓްތަކުގެ ސާފުތާހިރުކަން ބައްލަވައި، ކަންނެލި އެކްސްޕޯޓް ކުރުމުގެ ސެޓްފިކެޓް ދޫކުރެއްވުމާއި، ބޭސް އިމްޕޯޓް ކުރުމުގެ ހުއްދަ ދިނުންފަދަ ގިނަ މަސައްކަތްތައް ވެސް ކުރައްވާފައިވެއެވެ. ބަލި މީހުންނަށް ފަރުވާ ދިނުމަށާއި، ކުދިން ޚިތާނުކުރުމުގެ މަސައްކަތް ވެސް ކުރެއްވިއެވެ.
ޢަބްދުލްކަރީމްގެ ޤައުމީ ޚިދުމަތްތައް ފާހަގަކުރައްވާ، 2023 ވަނަ އަހަރު ދިވެހި ދައުލަތަށް ޚިދުމަތް ކުރުމުގެ އިނާމު ވަނީ ދެއްވާފައެވެ.
ޢަބްދުލްކަރީމް އާދަމްގެ ކަށުނަމާދު އޮންނާނީ މިއަދުގެ ޢަޞްރު ނަމާދަށް ފަހު، އިސްލާމީ މަރުކަޒުގައެވެ.
Thiladhun © 2019 – 2023| Made with ❤️ in #Thiladhunmathi
Thiladhun © 2019 – 2022
Made with ❤️ in #Thiladhunmathi