މާލޭގެ ކަރަންޓުގެ ހާލަތު ރަނގަޅު ކުރުމަށް 8 މެގަވޯޓްގެ ޖަނަރޭޓަރު ސެޓެއް ބަހައްޓަން އެއްބަސްވުމުގައި ސޮއިކޮށްފިއެވެ.
އޭޝިއަން ޑިވެލޮޕްމަންޓް ބޭންކް (އޭޑީބީ)ގެ 8.5 މިލިއަން ޑޮލަރުގެ ހިލޭ އެހީގެ ދަށުން ބަހައްޓަން ހަމަޖެހިފައިވާ ޖަނަރޭޓަރު ސެޓުގެ މަސައްކަތް ހަވާލުކޮށްފައިވަނީ މިއަދު އެންވަޔަރަމަންޓް މިނިސްޓްރީގައި ބޭއްވި ރަސްމިއްޔާތެއްގައެވެ. އެ މަސައްކަތް ހަވާލުކޮށްފައިވަނީ ސްރީލަންކާގެ 'އެލްޓީއެލް ހޯލްޑިންސް' ގެ ދަށުން މަސައްކަތް ކުރާ ލަކްދަނަވި ލިމިޓެޑާއެވެ.
މިއަދުގެ ރަސްމިއްޔާތުގައި ވާހަކަ ދައްކަވަމުން މިނިސްޓަރު ތޯރިގް ވިދާޅުވީ، މާލޭގެ އާބާދީ ބޮޑުވެ ކަރަންޓު ބޭނުންކުރާ މިންވަރު އިތުރުވުމުން ކަރަންޓު އުފައްދާ މިންވަރުވެސް މަތިވާން ޖެހޭ ކަމަށެވެ. އަދި އެ އެއްބަސްވުމުގެ ދަށުން އެއްއަހަރު ދުވަސް ތެރޭގައި ޖަނަރޭޓަރު ސެޓު ބަހައްޓާ ނިންމަންޖެހޭނެކަމަށް މިނިސްޓަރު ވިދާޅުވިއެވެ.
މިނިސްޓަރުގެ ވާހަފުޅުގައި ރާއްޖެއިން ތެލަށް ބޮޑު ހަރަދެއްކުރާކަމާއި، އެގޮތުން 'ޖީޑީޕީ'ގެ 20 އިންސައްތަ ތެޔޮ އެތެރެކުރަން ހޭދަވާކަން ފާހަގަކުރެއްވިއެވެ. އެހެންކަމުން ކަރަންޓު އިސްރާފުކުރާ މިންވަރު ކުޑަކުރުމަށް މިނިސްޓަރ ތޯރިގް އިލްތިމާސް ކުރެއްވިއެވެ.