ރަމަޟާންމަހު މާލޭގެ 5 މުހިންމު ސަރަހައްދެއްގެ ޓްރެފިކް ބެލެހެއްޓުމަށް ޚާއްސަ ސަމާލުކަމެއް ދޭނެކަމަށް ދިވެހި ފުލުހުންގެ ޚިދުމަތުން ބުނެފިއެވެ. މި ސަރަހައްދުތަކުގެ ތެރޭގައި ބާޒާރުމައްޗާއި، މިސްކިތްތަކާއި، ބޮޑެތި މަގުތަކާއި ބްރިޖާއި ހައިވޭ ސަރަހައްދު ހިމެނެއެވެ.
ފުލުހުންގެ ފަރާތުން ބޭއްވި ނޫސްވެރިންގެ ބައްދަލުވުމެއްގައި އިންސްޕެކްޓަރ އޮފް ޕޮލިސް ތޮލްހަތު އަޙްމަދު ވިދާޅުވި ގޮތުގައި، ފެބްރުއަރީ 15 އިން ފެށިގެން ބާޒާރުމައްޗަށް ވަކި ޓީމެއް ވަނީ ކަނޑައަޅާފައެވެ. މި ޓީމުން ޕާކުކޮށްފައި ހުންނަ އުޅަނދުތައް ނެގުމާއި، ޕޭމަންޓާއި ޕޭމަންޓްމަތީގައާއި ޒޯންތަކުގައި ކުނި ބަހައްޓާފައި ހުންނަ ފަރާތްތަކަށް ނަސޭހަތްދިނުމުގެ މަސައްކަތް ކުރަމުންދާކަމަށް އޭނާ ވިދާޅުވިއެވެ.
"ބާޒާރުމަތީގެ ވަކި ސަރަހައްދެއް ވާނީ ހެނދުނު 6:00 އިން ފެށިގެން އިރުއޮއްސި 6:00 އާއި ހަމައަށް އެއީ ޕާކުކުރުން މަނާ ސަރަހައްދެއްގެ ގޮތުގައި ކަނޑައަޅާފައި," ތޮލްހަތު ވިދާޅުވިއެވެ. އަދި އިތުރަށް ވިދާޅުވި ގޮތުގައި ރޭގަނޑު 6:00 އިން ފެށިގެން އިރުއަރާ 6:00 އާ ހަމައަށް އެ ސަރަހައްދުގައި ޕާކުކުރެވޭނެއެވެ.
މީގެއިތުރުން، ސިޓީ ކައުންސިލާ ގުޅިގެން ބާޒާރު ސަރަހައްދުގައި މުދާ ބާލާ ސަރަހައްދުތަކާއި، ޕިކަޕްތައް މަޑުކުރަންވީ ސަރަހައްދުތައް ފާހަގަކޮށް ކުރެހުމުގެ މަސައްކަތް ކުރިއަށްދާކަމަށްވެސް ފުލުހުންގެ ފަރާތުން މަޢުލޫމާތު ދެއްވާފައިވެއެވެ.
މި އިންތިޒާމުތަކަކީ ރަމަޟާންމަހު ބާޒާރު ސަރަހައްދުގައި ދިމާވާ ޓްރެފިކް ޖެމްގެ މައްސަލަތައް ޙައްލުކުރުމަށާއި، އާންމު ރައްޔިތުންނަށް ފަސޭހަކަމާއެކު ބާޒާރަށް ވަދެނިކުމެވޭނެ މަގު ތަނަވަސްކޮށްދިނުމަށް އަޅާ ފިޔަވަޅުތަކެކެވެ.