ވައިގެ މަގުން ރާއްޖެއަށް މަސްތުވާތަކެތި އެތެރެކުރި ކަމަށް ތުހުމަތު ކުރެވޭ އިންޑިއާ ދެ މީހުން އަނެއްކާވެސް ހައްޔަރުކޮށްފިއެވެ. ރާއްޖެއަށް މަސްތުވާތަކެތި އެތެރެކުރި ކަމަށް ތުހުމަތު ކުރެވިގެން މި ފަހަރު ހައްޔަރު ކުރީ އިންޑީއާ އަންހެނަކާއި ފިރިހެނެކެވެ. މި ދެ މީހުންގެ ލަގެޖުން ގާތްގަނޑަކަށް ދެ ކިލޯގެ މަސްތުވާތަކެތި ފެނިފައިވެއެވެ. މިއީ ހަފްތާއެއްގެ ތެރޭގައި މަސްތުވާތަކެތީގެ މައްސަލަތަކުގައި ހައްޔަރުކުރި އިންޑިޔާގެ ހަތަރުވަނަ މީހާއެވެ. މި ހަފްތާގައި ކުރިން ހައްޔަރު ކުރި މީހުންގެ ލަގެޖުން ގާތްގަނޑަކަށް ހަތް ކިލޯގެ މަސްތުވާތަކެތި ފެނިފައިވެއެވެ. ފަހުން ހައްޔަރު ކުރި ދެ މީހުންގެ ބަންދާ މެދު ގޮތެއް ނިންމުމަށް އިއްޔެ ކްރިމިނަލް ކޯޓަށް ހާޒިރު ކުރުމުން، ދެ މީހުންގެ ބަންދަށްވެސް ފަސް ދުވަސް ޖަހައިފައިވެއެވެ. މިއީ 25 އަހަރުގެ ފިރިހެނަކާއި 21 އަހަރުގެ އަންހެނެކެވެ. މި ދެ މީހުންގެ ލަގެޖުން ފެނިފައިވަނީ ހަޝިޝް އޮއިލް ފުޅިތަކެކެވެ. ދެ މީހުންވެސް ކޯޓުގައިވަނީ ވަކީލުން ބޭނުންވާ ކަމަށް ބުނެފައެވެ. ނިމުނު ހަފްތާގައި މަސްތުވާތަކެއްޗާއެކު ހައްޔަރުކޮށްފައިވާ އިންޑިޔާ ދެ މީހުންނަކީ، އުމުރުން 21 އަހަރުގެ މީހަކާއި އުމުރުން 19 އަހަރުގެ މީހެކެވެ. މި މީހުންގެ ބަންދު އަމުރުން އެނގޭ ގޮތުގައި އެ މީހުންގެ ލަގެޖުންވެސްވަނީ ހަޝިޝް އޮއިލް ފުޅިތަކެއް ފެނިފައެވެ. އޭގެ ވަގުތީ ބަރުދަނުގައި 6.7 ކިލޯ ހުރިކަން ބަންދު އަމުރުގައ ގާޒީވަނީ ފާހަގަ ކުރައްވާފައެވެ. މި ނިމުނު ހަފުތާގައި މެލޭޝިޔާ އަންހެނަކާއި ދިވެހި ދެ ފިރިހެނުން، ދެ ކިލޯގެ މަސްތުވާތަކެއްޗާއެކު ހައްޔަރުކޮށްފައިވެއެވެ. މި މައްސަލައާ ގުޅިގެން ހައްޔަރުކޮށްފައިވަނީ ރަންޖިނި ޖީވަނަންތަން، މެލޭޝިއާ، (38އ) އާއި ގދ. ވާދޫ / ފުރުސަތު، ލޫޠު އިބްރާހީމް (29އ) އާއި ގއ. ދާންދޫ / ސަންލައިޓްވިލާ، އަޙްމަދު ރިޝްމާހް (21އ) އެވެ. މި ތިންމީހުންގެ ތެރެއިން ރަންޖިނި ޖީވަނަންތަން ހައްޔަރުކޮށްފައިވަނީ ވެލާނާ އިންޓަނޭޝަނަލް އެއާޕޯޓުންނެވެ. ލޫޠު އިބްރާހީމްއާއި އަޙްމަދު ރިޝްމާހް ހައްޔަރުކޮށްފައިވަނީ މާލެއިންނެވެ.