އިސްލާމީ އުންމަތަށް ކުރިމަތިވެފައިވާ ގޮންޖެހުންތަކުން އަރައިގަނެ، ނަޞްރާއި ފަތަޙަ ލިބޭނީ މުޅި އުންމަތް އެކަތިގަނޑަކަށް ވެގެން ކަމަށް މިއަދުގެ ހުކުރު ޚުތުބާގައި ބުނެފިއެވެ.
ރަމަޟާން މަހުގެ ފަހު ދިހައިގެ ދުވަސްތަކާ ގުޅޭގޮތުން މިއަދު ރާއްޖޭގެ މިސްކިތްތަކުގައި އިއްވި ޚުތުބާގައި ވަނީ އިސްލާމީ އަޚުވަންތަކަމާއި، ޒަކާތުގެ މުހިންމުކަމާއި، ޒުވާނުންގެ ދައުރާ ގުޅޭގޮތުން އަގުހުރި ނަސޭހަތްތަކެއް ދީފައެވެ.
ޚުތުބާގައި ފާހަގަކުރިގޮތުގައި، އިސްލާމީ އުންމަތް މިއަދު ގުނަމުންދަނީ ތާރީޚީ ގޮތުން ނުރައްކާތެރި ދުވަސްތަކެކެވެ. ދުޝްމަނުން ދަނީ އުންމަތް ބައިބައިކޮށް، އިސްލާމީ ޤައުމުތަކުގައި ލޭއޮހޮރުވުންތައް އިތުރުކުރުމަށް ގިނަގުނަ މަސައްކަތްތަކެއް ކުރަމުންނެވެ. މިފަދަ ޙާލަތެއްގައި މުސްލިމުންގެ ސަފުތައް ބަދަހިކޮށް، މަތިވެރި އިސްލާމީ ޢަޤީދާގައި ސާބިތުވެ ތިބުމަކީ ކޮންމެހެން ކުރަންޖެހޭ ކަމެއް ކަމަށް ޚުތުބާގައި ބުނެފައިވެއެވެ.
އަދި ބައިބައިވުމަކީ އުންމަތް ބަލިކަށިވާނެ ކަމެއްކަން ހަނދާންކޮށްދީ، މުޞީބާތްތަކުގެ ކުރިމަތީގައި ކެތްތެރިކަމާއި ޙިކުމަތްތެރިކަން އިސްކުރުމަށް ވަނީ ގޮވާލާފައެވެ.
ރަމަޟާން މަހަކީ ދީލަތިކަމާއި ހޭދަކުރުމުގެ މައްސަރުކަން ފާހަގަކޮށް، ފަހު ދިހައިގެ ދުވަސްތަކުގައި ޞަދަޤާތްކުރުން ގިނަކުރުމަށް ޚުތުބާގައި ބާރުއެޅިއެވެ. ވަކިން ޚާއްޞަކޮށް، ފިޠުރު ޒަކާތް ނެރުމަށް ސަމާލުކަންދީ އެކަމަށް އަވަސްވުމަށް ވަނީ ނަސޭހަތްތެރިވެފައެވެ. ފިޠުރު ޒަކާތަކީ ކޮންމެ މުސްލިމެއްގެ މައްޗަށް ވާޖިބުވެގެންވާ ކަމެއްކަން ހަނދާންކޮށްދެމުން، އޭގެ މިންވަރަކީ ބޮލަކަށް ޞާޢެއް ނުވަތަ މިޒަމާނުގެ މިނުން ނަމަ 2 ކިލޯ 400 ގުރާމުކަން ޚުތުބާގައި ބަޔާންކުރިއެވެ.
ޚުޠުބާގައި އިތުރަށް ބުނީ، އިސްލާމީ ޙަޟާރަތު އަލުން އިޢާދަކުރުމަށްޓަކައި ޒުވާން ޖީލު އިޚުލާޞްތެރި ޢަޒުމަކާއެކު ތެދުވަންޖެހޭ ކަމަށެވެ. އަދި މަސްތުވާތަކެއްޗާއި، ދުންފަތުގެ އިސްތިޢުމާލުކުރުމާއި، ނޭއްގާނީ ޢަމަލުތަކުން އެއްކިބާވެ، ރިވެތި އަޚުލާޤުން ޒީނަތްތެރިވުމަށް ޒުވާނުންނަށް ވަނީ ގޮވާލާފައެވެ.
މީގެ އިތުރުން، ޢިލްމާއި ފަންނިއްޔާތުގެ ގޮތުން ކުރިއަރައިދިއުމަކީ މުސްލިމުންނަށް ޢިއްޒަތާއި ޝަރަފު ލިބޭނެ މަގުކަމުގައި ވެސް ޚުތުބާގައި ފާހަގަކޮށްފައިވެއެވެ.