އެމެރިކާގެ ސަބްމެރިންއަކުން ދިން ހަމަލާއެއްގައި އީރާނުގެ އައިއާރުއައިއެސް ދޭނާ މަނަވަރު ފައްތާލައި އޭގައި ތިބި 87 ފަޅުވެރިން މަރުވިތާ އެއް ދުވަސް ފަހުން، ސްރީ ލަންކާގެ އައްސޭރިފަށުން އީރާނުގެ ދެވަނަ މަނަވަރެއްގެ 200އަށް ވުރެ ގިނަ ފަޅުވެރިން ލަންކާ ސަރުކާރުން ރައްކާތެރިކަމާ އެކު އިއްޔެ އެ ގައުމަށް ބާލައިފި އެވެ.
ލަންކާގެ ރައީސް އަނޫރާ ކުމާރާ ޑިސަނަޔަކަ ވިދާޅުވި ގޮތުގައި، ދެވަނަ މަނަވަރަށް ހަމަލާއެއް އަތުވެދާނެ ކަމުގެ ބިރު އޮތުމުން، އެ މަނަވަރު ލަންކާ ސިފައިންގެ ބެލުމުގެ ދަށަށް ގެނެސް، ރައްކާތެރިކަމަށްޓަކައި ޓްރިންކޮމަލީ ބަނދަރަށް ގެންދިއުމަށް ވަނީ ނިންމާފަ އެވެ. ކަމާ ބެހޭ ފަރާތްތަކުން ބުނާ ގޮތުގައި މި މަނަވަރު ފެނިފައިވަނީ ކޮލަމްބޯ ކައިރިން، ލަންކާގެ އިގްތިސާދީ ކަނޑުގެ ސަރަހައްދުގެ ތެރެއިންނެވެ.
އެމެރިކާގެ ޓޯޕިޑޯ ހަމަލާއެއްގައި ލަންކާގެ ދެކުނު އައްސޭރިން 44 ނޯޓިކަލް މޭލު ބޭރަށް އަޑިއަށްދިޔަ އީރާނުގެ މަނަވަރުން 87 މީހެއްގެ ހަށިގަނޑު ފެނިފައިވާއިރު، އަނިޔާވި 32 ފަޅުވެރިއަކު ވަނީ ސަލާމަތްކޮށްފަ އެވެ. ސަލާމަތްވި މީހުންނަށް ގޯލް ނޭޝަނަލް ހޮސްޕިޓަލުގައި ފަރުވާދެމުންދާއިރު، 10އަށް ވުރެ ގިނަ ފަޅުވެރިން އަދިވެސް ވަނީ ގެއްލިފަ އެވެ.
އެމެރިކާގެ ޑިފެންސް ސެކްރެޓަރީ ޕީޓް ހެގްސެތު މި ހަމަލާ ކަށަވަރުކޮށްދެއްވަމުން ވިދާޅުވީ، ބައިނަލްއަގުވާމީ ކަނޑުގެ ސަރަހައްދުގައި ރައްކާތެރިކަން އޮތް ކަމަށް ހީކޮށްގެން އޮތް އީރާނުގެ ހަނގުރާމަމަތީ މަނަވަރު އެމެރިކާގެ ސަބްމެރިންއަކުން ފައްތާލާފައިވާ ކަމަށެވެ.
މި ހަމަލާ އީރާނުން ވަނީ ވަރަށް ބޮޑަށް ކުށްވެރިކޮށްފަ އެވެ.
އީރާނުގެ ފޮރިން މިނިސްޓަރު އައްބާސް އަރަގްޗީ މި ހަމަލާ ސިފަކުރެއްވީ ކަނޑުމަތީގައި ހިންގި ލާއިންސާނީ ޖަރީމާއެއްގެ ގޮތުގަ އެވެ. އަދި މިފަދަ އަމަލެއް ހިންގުމުން އެމެރިކާއިން އެކަމާ ހިތާމަކުރަން ޖެހޭނެ ކަމުގެ އިންޒާރު ވެސް އޭނާ ވަނީ ދެއްވާފަ އެވެ.
މި ހަމަލާ ދީފައިވަނީ އެމެރިކާ އާއި އިޒްރޭލު ގުޅިގެން އީރާނާ ދެކޮޅަށް އަސްކަރީ ހަރަކާތްތައް ކުރިއަށްގެންދާ ދަނޑިވަޅެއްގަ އެވެ. އދ.ގެ ތަފާސްހިސާބުތަކުން ދައްކާ ގޮތުގައި މި ހަނގުރާމައިގައި މިހާތަނަށް 1,000އަށް ވުރެ ގިނަ މީހުން މަރުވެ، ތެހެރާނުން 100,000އަށް ވުރެ ގިނަ މީހުން ވަނީ ގެދޮރު ދޫކޮށް ރައްކާތެރި ހިސާބުތަކަށް ބަދަލުވެފަ އެވެ.
މި މައްސަލައިގައި ލަންކާއިން ގެންގުޅެނީ ވަކި ފަރާތަކަށް ނުޖެހޭ ސިޔާސަތެކެވެ.
"ވަކި ފަރާތަކަށް ނުޖެހުމާއި އިންސާނިއްޔަތުކަމަކީ އެންމެ އިސްކަންދޭ ކަންތައް... ހުރިހާ ފަރާތްތަކަކުން ވެސް ސުލްހައަށް މަސައްކަތް ކުރަންޖެހޭނެ،" ރައީސް ޑިސަނަޔަކަ ވިދާޅުވި އެވެ.