ބޮލީވުޑްގެ ބަތަލާ ކްރިތީ ސެނޮންއަށް އެންމެ މޮޅު ބަތަލާގެ އެވޯޑު ލިބުމާ ގުޅިގެން އެކަމަށް ފާޑުކިޔާފައިވާ ވީޑިއޯއަކަށް "ލައިކް" ދެވުނީ އޮޅިގެން ކަމަށް ބަތަލާ ޔާމީ ގޯތަމް ބުނެފިއެވެ. ކްރިތީއަށް ލިބުނު ކާމިޔާބީއަށް މަލާމާތްކުރާ ފަދަ ގޮތަކަށް ހަދާފައިވާ އިންސްޓަގްރާމް ރީލްއަކަށް ޔާމީ "ލައިކް" ދީފައިވާކަން ފާހަގަވުމާއެކު، ބޮޑު ބަހުސެއް ވަނީ އުފެދިފައެވެ. ނަމަވެސް، ޔާމީ ވަނީ އެއީ ގަސްތުގައި ކުރި ކަމެއް ނޫން ކަމަށާއި އެކަހަލަ ދަށު ދަރަޖައިގެ އަމަލު ހިންގުމަކީ އޭނާގެ މިޒާޖެއް ނޫން ކަމަށް ބުނެފައެވެ. ސޯޝަލް މީޑިއާގައި މިކަމާ ގުޅިގެން ޔާމީކުރި ޕޯސްޓެއްގައި ބުނެފައި ވަނީ ކޮންމެ ދުވަހަކުވެސް ވަރަށް ގިނަ ޕޯސްޓްތަކުގައި އޭނާ ޓެގް ކުރާ ކަމަށެވެ. މީގެ ސަބަބުން ބައެއް ފަހަރު ނޭނގި ލައިކް ދެވޭ ގޮތް ދިމާވާ ކަމަށް މި ޕޯސްޓުގައި ބަޔާންކޮށްފައިވެއެވެ. އެހެންވެ އެކީގައި މަސައްކަތްކުރާ އަދި ފިލްމު އިންޑަސްޓްރީގެ އެއްވެސް ފަންނާނަކަށް ފާޑުކިޔުމުގެ ނުވަތަ ދަށްކޮށްލުމުގެ އެއްވެސް ނިޔަތެއް ނެތްކަމަށް ޔާމީގެ ޕޯސްޓުގައި ބަޔާންކޮށްފައިވެއެވެ. އޮޅިގެން ރީލްއަކަށް 'ލައިކް' ދެވުމާ ގުޅިގެން ޔާމީ އެކްސްގައި ކުރި ޕޯސްޓް--ފޮޓޯ/އެންޑީޓީވީ މި ކަމަށް ސޯޝަލް މީޑިއާގައި ލިބުނު ސަމާލުކަމާ ގުޅޭގޮތުން ޔާމީ ބުނީ، "ކްލިކްބައިޓް" ނުވަތަ މީހުންގެ ސަމާލުކަން ހޯދަން ދޮގު ޚަބަރު ފަތުރާ މި ޒަމާނުގައި، ނޫސްތަކުން ވެސް މިފަދަ ކަންކަން ބޮޑުކޮށްގެން ދައްކަން ބޭނުންވާނެ ކަމަށެވެ. ނަމަވެސް، އޭނާއަކީ އެ ފެންވަރަށް ވެއްޓި އެހާ ދަށު ދަރަޖައިގެ އަމަލެއް ނުކުރާނެ މީހެއްކަން ޔާމީ ދަންނަ ކޮންމެ މީހަކުވެސް ގަބޫލުކުރާނެ ކަމުގެ ޔަގީންކަން އެބައޮތް ކަމަށް ބަތަލާ ވަނީ ބުނެފައެވެ. ޔާމީ އިތުރަށް ބަޔާންކުރި ގޮތުގައި މުނިފޫހިފިލުވުމުގެ ދާއިރާގެ އެވޯޑް ޝޯތަކާ މެދު އޭނާ ދެކޭގޮތް މީގެކުރިންވެސް ވާނީ ވަރަށް ހާމަކަން ބޮޑު ގޮތަކަށް ކިޔައިދީފައެވެ. އެހެންވެ މުސްތަގުބަލުގައި ވެސް އޭނާ ސަމާލުކަންދޭނީ އަމިއްލަ ފިލްމީ މަސައްކަތްތަކަށް ކަމަށާއި ޔާމީ އަކީ ވަކިން ޕީއާރު ޓީމެއް ވެސް ގެންގުޅޭ މީހެއް ނޫން ކަމަށް ބަތަލާ ވަނީ ބުނެފައެވެ. ސޯޝަލް މީޑިއާގައި މިކަމާ ގުޅިގެން ބޮޑު ބަހުސެއް ފަށާފައި ވަނީ ދާދިފަހުން ބޭއްވި ޒީސައިން އެވޯޑު ޝޯގައި އެންމެ މޮޅު ބަތަލާގެ އެވޯޑު ކްރިތީ ސެނޮންއަށް ފިލްމު "ތޭރެ އިޝްގް މޭ"އިން ލިބުމުންނެވެ. ގިނަ ބަޔަކު ވަނީ އެ އެވޯޑުގެ ހަގީގީ ހައްގުވެރިއަކީ ފިލްމު "ހައްގު"ގެ ލީޑް ރޯލް ކުޅުނު ޔާމީ ކަމަށް ބުނެ ކްރިތީއަށް އެ އެވޯޑު ދިނުމަކީ އިންސާފެއްތޯ އަހާ ބޮޑު ބަހުސެއް ސޯޝަލް މީޑިއާގައި ފަށާފައެވެ. ފިލްމު "ހައްްގު"ގައި ޔާމީ ކުޅުނު ކެރެކްޓާއަށް ގިނަ ބައެއްގެ ސަމާލުކަން ލިބުނުއިރު އެ ފިލްމުގައި ޔާމީ ދެއްކި މޮޅު އެކްޓިންގްއަށް ފިލްމު އިންޑަސްޓްރީގެ ވެސް ގިނަ ބަޔަކު ވަނީ ތައުރީފުކޮށްފައެވެ.