މާލޭގައި 2018 ވަނަ އަހަރުގެ ތެރޭގައި އުމުރުން 18 އަހަރު ނުވާ އަންހެން ކުއްޖަކު ރޭޕުކުރި މައްސަލަ ސާބިތުވެ، 20 އަހަރަށް ޖަލަށްލާފައިވާ ދެ މީހުން، އެ މައްސަލަ ހައިކޯޓުގައި އިސްތިއުނާފު ކޮށްފިއެވެ. މާލޭގައި 2018 ވަނަ އަހަރު ކުޑަ ކުއްޖަކު ރޭޕް ކުރި މި މައްސަލައިގައި ދެ މީހެއްގެ މައްޗަށް 20 އަހަރުގެ ހުކުމެއް އިއްވީ މިދިޔަ އޮގަސްޓް މަހުއެވެ. އެ މައްސަލަ އެ ދެ މީހުންގެ ފަރާތުން އިސްތިއުނާފު ކޮށްފައިވާއިރު، އެނގިފައިވާ ގޮތުގައި މައްސަލަ މިހާރު އޮތީ ހައިކޯޓަށް ބަލައިގަނެ ރަޖިސްޓްރީވެސް ކޮށްފައެވެ. އެކަމަކު މި މައްސަލަ ފަށާނެ އިރެއް އަދި ސާފެއް ނުވެއެވެ. މިއީ، 2018 ވަނަ އަހަރުގެ މެދު ތެރޭގައި މާލޭގައި، ރަސްމީ ބޯޅަ ދަނޑު ހުންނަ ސަރަހައްދުގައި ހިނގި ހާދިސާއެކެވެ. މި ހާދިސާގެ ހުކުމް ކްރިމިނަލް ކޯޓުން އިއްވީ، ހާދިސާ ހިނގިތާ ގާތްގަނޑަށް ހަތް އަހަރު ފަހުންނެވެ. މުޖުތަމައުގެ އަޚުލާގީ އުސޫލުތައް ހިފެހެއްޓުމުގެ ގޮތުން އަދި އަނިޔާ ލިބުނު އަންހެން ކުއްޖާގެ މަސްލަހަތުގައި މި މައްސަލަ ކްރިމިނަލް ކޯޓުގައި ކުރިއަށް ގެންގޮސްފައި ވަނީ އާއްމުކޮށް ހުޅުވައި ނުލައެވެ. މި މައްސަލައިގައި ޖިންސީ ކުށުގެ ޤާނޫނުގެ ދަށުން، ދެ މީހެއްގެ މައްޗަށް ރޭޕްކުރި ކަމަށް ކަނޑައަޅައި އެ ކުށުގެ އުގޫބާތެއްގެ ގޮތުން، އެ ދެ މީހުން 20 އަހަރަށް ޖަލަށްލީއެވެ. ދިވެހި ދެ ފިރިހެނުންގެ މައްޗަށް 20 އަހަރު ދުވަހުގެ ޖަލު ހުކުމެއް މި މައްސަލައިގައި އިއްވިއިރު، 2018 ވަނަ އަހަރުން ފެށިގެން އެ ދެ މީހުން ތިބީ ބަންދުކޮށްފައެވެ. އެހެންކަމުން ދެން މި ދެމީހުން ތަންފީޒުކުރަން ޖެހޭނީ 13 ވަރަކަށް އަހަރުގެ ހުކުމެވެ. މި ހާދިސާ ހިނގި ދުވަސްވަރު، ރޭޕް ކުރި ދެ ފިރިހެނުން ހޯދަން މާލޭގެ ބައެއް ގްރޫޕްތަކުންވެސް ނުކުމެ ބައެއް މާރާމާރީތައް ހިންގިއެވެ. އޭރުގެ ރިކޯޑްތައް ދައްކާ ގޮތުން މި ދެ ފިރިހެނުން އޭރު ފުލުހުންނާ ހަވާލުވީ އަމިއްލައަށެވެ. ރިކޯޑްތައް ދައްކާ ގޮތުން މި ކޭސްގައި އުމުރުން 18 އަހަރު ނުވާ ފިރިހެން ކުއްޖަކުވެސް ހިމެނެއެވެ. އެ ކުއްޖާއާ ދެކޮޅަށް މި މައްސަލައިގައި ދައުވާ ކުރި ކަމެއް އެނގިފައެއް ނުވެއެވެ.