ކުރިކެޓް ބޯޑް އޮފް މޯލްޑިވްސް (ސީބީއެމް) އިން އިންތިޒާމުކޮށްގެން ކުރިއަށްގެންދާ މައިލޯ ރަމަޟާން ކުރިކެޓު ކާނިވަލުގެ އޯޕަން ޓޭޕްބޯޅަ މުބާރާތުގެ ޗެމްޕިއަންކަން ފިނޮޅުން ހޯދައިފިއެވެ. އޯޕަން ބައިގެ ޗެމްޕިއަންކަން ފިނޮޅުން ހޯދީ ފައިނަލުގައި މީޓިއޯސް އާއި ވާދަކޮށް ހަ ވިކެޓުންނެވެ. ފައިނަލް މެޗުގެ ގުރުދިމާވުމުން ފިނޮޅުން ގަސްތުކުރީ ހޮވުމަށެވެ. އެއާއެކު އެގޮތުން މީޓިއޯސް ކުޅެންއަރާ އަށް އޯވަރުގެ ތެރޭގައި ތިން ކުޅުންތެރިން ނުބައިވެގެން ހެދީ 116 ލަނޑެވެ. އެންމެ ރަނގަޅަށް ކުޅުނީ 11 ބޯޅައިން 32 ލަނޑު ހެދި އިބްރާހިމް އަލީއެވެ. ޖަވާބުގައި ފިނޮޅުން ކުޅެންއަރާ 7.3 އޯވަރުގެ ތެރޭގައި 4 ކުޅުންތެރިން ނުބައިވެގެން 118 ލަނޑުހަދާ މުބާރާތުގެ ޗެމްޕިއަންކަން ހޯދިއެވެ. އެޓީމުން އެންމެ ރަނގަޅަށް ކުޅުނީ 13 ބޯޅައިން 31 ލަނޑު އެއްކުރި މުހައްމަދު ސައީދުއެވެ. އޯޕަން ޓޭޕްބޯޅަ މުބާރާތުގެ ފައިނަލް މެޗުގެ ތެރެއިން-- އޯޕަން މުބާރާތުގެ އެންމެ ގިނަ ލަނޑު ހެދި ކުޅުންތެރިއަކަށް ހޮވުނީ 134 ހެދި މީޓިއޯސްގެ އިބްރާހިމް އަލީއެވެ. އެންމެގިނަ ވިކެޓް ނެގީ ހަތް ވިކެޓު ނެގި މުހައްމަދު ސައީދެވެ. މީގެއިތުރުން އެންމެ ގިނަ ބޯޅަ ހިފި ކުޅުންތެރިންގެ ތެރޭގައި ހިމެނެނީ ފިނޮޅުގެ ހުސެއިން ރިމާޒް އާއި އިސްހާގު އަހުމަދުގެ އިތުރުން މީޓިއޯސްގެ ޝަފްރާޒް ޖަލީލެވެ. މުބާރާތުގެ އެންމެ ގިނަ ލަނޑު ހެދި ކުޅުންތެރިއަކަށް ހޮވުނީ މީޓިއޯސްގެ އިބްރާހީމް އަލީއެވެ. އޭނާ ވަނީ 134 ލަނޑު ހަދާފައެވެ. އޯޕަން މުބާރާތަށްފަހު ދެން ކުރިއަށްގެންދާނީ އޮފީސްތަކުގެ މުބާރާތެވެ. މިއަހަރުގެ އޮފީސް މުބާރާތުގައި ޖުމްލަ ހަ ޓީމެއް ވާދަކުރެއެވެ. އޮފީސް މުބާރާތް ކުރިއަށްދާނީ މާޗު 4-9 ގެ ނިޔަލަށެވެ. އެއަށްފަހު އެންމެ ފޯރިގަދަ އެއް މުބާރާތް ކަމަަށްވާ ކޮމްޕެނީ މުބާރާތް ކުރިއަށްދާނީ ޖުމްލަ 12 ޓީމާއެކުއެވެ. މުބާރާތް ކުރިއަށްދާނީ މާޗު 9-16 ގެ ނިޔަލަށެވެ.