ބްރޯޑްކާސްޓިން ލައިފްޓައިމް އެޗީވްމަންޓް އެވޯޑް ދާދި ފަހުން ލިބިވަޑައިގެންނެވި، ކުރީގެ އިންފޯމޭޝަން މިނިސްޓަރު ސަމަރުބްލޫ އިބްރާހީމް މަނިކު (ސަމަރޭ) އަކީ ހަގީގީ ޤައުމީ ބަޠަލެއް ކަމަށާއި، އޭނާގެ ހަނދާންތައް އަބަދުވެސް އައު ވާނެ ކަމަށް ކުރީގެ ރައީސް މައުމޫން އަބްދުލްގައްޔޫމް ވިދާޅުވެއްޖެއެވެ. އުމުރުފުޅުން 72 އަހަރުގައި އިބްރާހީމް މަނިކު އަވަހާރަވީ، ބެންގަލޫރުގެ ހޮސްޕިޓަލެއްގައި ފަރުވާ ދެމުން ދަނިކޮށް އިއްޔެގެ ހެނދުނުގެ ވަގުތެއްގައެވެ. އިބްރާހީމް މަނިކަށް ތައުޒިޔާ ވިދާޅުވެ، ރައީސް މައުމޫން ކުރެއްވި ޓްވީޓެއްގައި ވިދާޅުވީ، އޭނާއަކީ ވިސްނުމާއި ހިތްވަރު ހުރި ބޭފުޅެއް ކަމަށާއި، ވަކިވެގެން ދިޔައީ ހަގީގީ ބަޠަލެއް ކަމަށެވެ. ރައީސް މައުމޫން ވަނީ އިބްރާހީމް މަނިކު ކޮށްދެއްވާފައިވާ ޚިދުމަތައް ތައުރީފް ކުރައްވާފައެވެ. އެގޮތުން، ރާއްޖޭގައި ރޭޑިއޯ ބްރޯޑްކާސްޓިން އަށް އިންގިލާބީ ބަދަލެއް ގެނެސްދެއްވައި މިއުޒިކާއި ލަވަކިޔުން ގަބޫލު ނުކުރެވޭ މިންވަރަށް މަގުބޫލުކޮށް ދެއްވިކަން ވަނީ ފާހަގަކުރައްވާފައެވެ. https://twitter.com/maumoonagayoom/status/1598206623545425920 ދިވެހި ރާއްޖޭގެ އަޑާއި ޓީވީއެމްއަށް ގިނަ ގުނަ ޚިދުމަތްތަކެއް ކޮށްދެއްވާފައިވާ އިބްރާހީމް މަނިކަށް، ބްރޯޑްކާސްޓިން ކޮމިޝަނުން ދޭ، ބްރޯޑްކާސްޓިން ލައިފްޓައިމް އެޗީވްމަންޓް އެވޯޑް ލިބިވަޑައިގަތީ މިދިޔަ ސެޕްޓެމްބަރު މަހުގެ 14 ވަނަ ދުވަހުއެވެ. އޭނާ ކުރެއްވި ބައެއް ޚިދުމަތްތަކަށް ބަލާއިރު، ރާއްޖޭގެ ހުރިހާ ރަށަކަށް ޓީވީގެ ޚިދުމަތް ދިނުންފަދަ މުހިންމު މަޝްރޫއުތައް ހިންގެވިއިރު އެކަމުގައި އެންމެ އިސްކޮށް ހުންނެވި އެއްބޭފުޅަކީ އިބްރާހީމް މަނިކެވެ. އިއްޔެގެ 16:45 ގައި ބެންގަލޯގެ ޤުއްދޫސް ސެމެޓްރީގައި ވަނީ އޭނާގެ ޖަނާޒާ ބާއްވާފައެވެ. ރައީސް މައުމޫން ވިދާޅުވީ، ވަކިވެގެން ދިޔަކަމުގައި ވީނަމަވެސް އިބްރާހީމް މަނިކުގެ ހަނދާންތައް އަންނަން އޮތް ގިނަ އަހަރުތަކަކަށް ދިވެހީންގެ ހިތްތަކުގައި ހުންނާނެ ކަމަށެވެ. އިބްރާހީމް މަނިކު ކައިވެނި ބައްލަވައިގެން އުޅުއްވި ރައީސް މައުމޫންގެ އަނބިކަނބަލުން ނަސްރީނާ އިބްރާހީމްގެ އެއްބަނޑު އެއްބަފާ ކަނބަލަކާއެވެ.