ދިވެހިރާއްޖޭގެ އިސްލާމީ ޔުނިވަރސިޓީއިން ރާވާ ހިންގާ "އިޤްރައު ފޮތް މަޢުރަޒު 2024" މި އަހަރުގެ ނޮވެންބަރު 13 އިން 16 އަށް، ޔުނިވަރސިޓީގެ ހޯލުގައި ކުރިއަށްގެންދިޔުމަށް ތައްޔާރުވެއްޖެއެވެ.
މި އަހަރުވެސް މި މަޢުރަޒުގައި ފޮތް ވިއްކާ އަދި ޝާއިޢު ކުރައްވާ ފަރާތްތަކުގެ އިތުރުން ލިޔުންތެރިންވެސް  ބައިވެރިވުމަށް ވަނީ ހަމަޖެހިފައެވެ.
އައިޔޫއެމް "އިޤްރައު" ފޮތް މަޢުރަޒަކީ ހެޔޮއަގުގައި ފޮތް ގަތުމުގެ މާޙައުލެއް އުފެއްދުމަށާއި، ފޮތް ވިއްކާ ފަރާތްތަކަށް އެފުރުޞަތު ފަހިކޮށްދިނުމުގެ އިތުރުން، މުޖުތަމަޢުގެ އަފުރާދުންގެ މެދުގައި ފޮތްތެރިކަމަށް އޮންނަ ޝައުޤުވެރިކަން އިތުރުކުރުމުގެ މަޤްޞަދުގައި ބާއްވާ މަޢުރަޒެކެވެ. ފޮތް މަޢުރަޒުގައި އެކި ޢުމުރުފުރާތަކުގެ ތަފާތު މާއްދާތަކުގެ ފޮތްތައް ހެޔޮ އަގުގައި ލިބެން ހުންނާނެއެވެ.
އިޤްރައު ފޮތް މަޢުރަޒަކީ ޢާއްމުންނަށް ހުޅުވާލައިގެން ހިންގޭ ޙަރަކާތަކަށް ވާތީ، ޢާއްމުންގެ މެދުގައި ޢިލްމީ ހޭލުންތެރިކަން އިތުރުކުރުމުގެ ގޮތުން 2 މުނާޤަޝާއެއް (ޕެނަލް ޑިސްކަޝަން) 13 އަދި 14 ނޮވެމްބަރުގައި ޢާންމުންނަށް ހުޅުވާލައިގެން ކުރިއަށްދާނެއެވެ. މި މުނާޤަޝާތަކުގައި އިސްލާމީ ޝަރީޢަތުގެ އިތުރުން ދިވެހި ބަހާއި ފޮތްތެރިކަމުގެ މައްޗަށް ޢިލްމީ ގޮތެއްގައި އަލިއަޅުވާލާ މަޝްވަރާ ކުރެވޭނެއެވެ. މަޢުޟޫތަކަށް އިންޞާފުކުރައްވާނީ މި ދާއިރާތަކުން ފާހަގަކޮށްލެވޭ ޢިލްމީ ބޭފުޅުންނެވެ. މިމުނާޤަޝާގައި ބައިވެރިވާ ފަރާތްތަކަށް މަޢުޟޫއާ ގުޅޭގޮތުން ސުވާލު ހުށަހެޅުމުގެ ފުރުޞަތު ލިބިގެންދާނެއެވެ.
މަޢުރަޒު ހިނގަމުންދާއިރު އެކި ޢުމުރުފުރައިގެ ކުޑަކުދިންނަށް އަމާޒުކޮށްގެން މަދަޙަ، ބަނދި، ރައިވަރު އަދި ވާހަކަ ކިޔުމާއި ތަފާތު ހުނަރުތައް ދަސްވާނެފަދަ ޙަރަކާތްތައް ހިމެނޭގޮތަށް  "ނޮލެޖް ކޯނަރ" ހިންގުމަށްވަނީ ހަމަޖެހިފައެވެ. މި ޙަރަކާތްތައް ކުރިއަށް ދާނީ 15 އަދި 16 ވާ ހުކުރު އަދި ހޮނިހިރު ދުވަހުގެ ހަވީރު 16:00 އިން 18:00 އަށެވެ.  މީގެ އިތުރުން، ޢުމުރުން 6 އަހަރާއި 11 އަހަރާއި ދެމެދުގެ ކުދިންނަށް އަމާޒުކޮށްގެން ހިންގާ "ބުކްމާކް" ފަރުމާކުރުމުގެ މުބާރާތެއް ޔުނިވަރސިޓީގެ ކުތުބުޚާނާގައި ކުރިއަށްދާނެއެވެ. މި މުބާރާތް ކުރިއަށްދާނީ ނޮވެމްބަރ 15 ވާ ހުކުރު ދުވަހުގެ 16:00 އިން 18:00 އަށެވެ.
"އިޤްރައު ފޮތް މަޢުރަޒު 2024" ގައި އޮންލައިންކޮށް ފޮތް ވިއްކުމަށް www.iqra.com.mv މެދުވެރިކޮށް ބައިވެރިވުމާއި ފޮތް ގަތުމުގެ ފުރުޞަތު ހުޅުވައިލުމުގެ އިތުރުން، މަޢުރަޒު އިފްތިތާޙުކުރުމުގެ ޙަފުލާގައި ފޮތް އިފްތިތާޙުކުރުމާއި ތަޢާރަފުކުރުމާއި އަދި ފޮތް ހަދިޔާކުރުމަށް ބޭނުންވާ އެންމެހާ ފަރާތްތަކަށް އެ ފުރުޞަތުވަނީ ހުޅުވާލެވިފައެވެ.
2018 ވަނަ އަހަރުން ފެށިގެން އަހަރަކު އެއްފަހަރު ހިންގަމުން އަންނަ "އިޤްރައު" ފޮތް މަޢުރަޒު މިއަހަރު ދިވެހިރާއްޖޭގެ އިސްލާމީ ޔުނިވަރސިޓީގެ ލާރނިން ސެންޓަރުތައް ޤާއިމްކުރެވިފައިވާ ރަށްރަށުގެ ތެރެއިން، ލ. ފޮނަދޫ އަދި ފުވައްމުލަކުގައިވެސް ކުރިއަށްގެންދިޔުމަށް ވަނީ ހަމަޖެހިފައެވެ. މި ދެރަށުގައި ފޮތް މަޢުރަޒު ކުރިއަށްދާނީ ނޮވެމްބަރ 15 އަދި 16 ވަނަ ދުވަހުގެ ހަވީރު 4:00 އިން 6:00 އަށް ބޭއްވޭ ތަފާތު ޙަރަކާތްތަކާ އެކުގައެވެ.
އިސްލާމީ ޔުނިވަރސިޓީގެ އިލްތިމާސަކީ މިފޮތް މަޢުރަޒަށް ގިނަ ބޭފުޅުން ޒިޔާރަތްކުރައްވާ މިރަނުގެ ފުރުސަތުގެ ބޭނުން ހިފުމެވެ. އަދި މަޢުރަޒުގެ ތެރޭގައި ހިންގާ އެކިއެކި ޙަރަކާތްތަކުގައި ބައިވެރިވުމެވެ. ވަކިން ޚާއްޞަކޮށް މުނާޤަޝާއަކީ ވަރަށް ޢިލްމީ މަޢުލޫމާތު ތަކެއް ލިބިގެންދާނެ ޙަރަކާތަކަށް ވާއިރު މިޙަރަކާތުގައިވެސް ގިނަ ބަޔަކު ބައިވެރިވުމެވެ. އިތުރު މަޢުލޫމާތު ހޯއްދެވުމަށް އައިޔޫއެމްގެ ކޯލް ސެންޓަރ 1405 އަށް ގުޅުއްވުން އެދެމެވެ.