ތިބާ ޙާޞިލްކުރަން ބޭނުންވާ ކަމެއް ޙާޞިލްނުވަނީއެވެ. ލިބޭ އާމްދަނީ މަދުވެ ނުފުދެނީއެވެ. ބަލިވެ އުޅެންޖެހެނީއެވެ. މީހުން ނަފްރަތުގެ ބަސްތައް ބުނަނީއެވެ. ގެއްލުންދޭން މަސައްކަތްކުރަނީއެވެ. ލޯބިލިބެން ބޭނުންވާ މީހުންގެ ލޯބި ނުލިބެނީއެވެ. 
މިހެންގޮސް ތަފާތު އެތައް ކަންތައްތަކެއް އަހުރެމެންގެ ވަށައިގެން އަބަދުވެސް އެނބުރޭނެއެވެ. އެކަންތައްތަކުގެ ތެރެއިން ކޮންމެވެސް އެއްކަމެއް އަބަދުވެސް ކޮންމެވެސް މީހަކާއިއެކުގައިވާނެއެވެ. އެއީ މިދުނިޔޭގައި އެކަން ހިނގަމުންދާނެ ގޮތެވެ. 
ވީމާ ތިމާއާއިއެކު ތިމާ ހިތްނުއެދޭ ކަމެއް އަބަދުވެސް ވާނަމަ އޮތީ ކަންބޮޑުވެ މާޔޫސްވުމެއް ނޫނެވެ. އޮތީ އުފާކުރުމެވެ. އެހެނީ އެއީ އެމީހަކަށް ﷲ ތަޢާލާ ލައްވަވާ ބޮޑު ރަހްމަތެކެވެ. އެރަޙްމަތް ލައްވަވަނީ ﷲ ތަޢާލާ ރުހިވޮޑިގަންނަވާ އަޅުންނަށެވެ. 
މިހެން ބުނުމުން ހިތްދަތިކަމުގައި އުޅެންޖެހުމަކީ ރަހްމަތަކަށްވަނީ ކީއްވެގެންތޯ ސުވާލުކުރާނެއެވެ. ޖަވާބަކީ އުފަލުގައި ހުންނަ އިރަށްވުރެ ހިތްދަތިކަމުގައި ނުވަތަ ތަކްލީފް އުފުލަން ޖެހިފައިވާނަމަ އެމީހަކު ﷲ ތަޢާލާގެ މަތިން ހަނދުމަކުރުން ގިނަކުރާނެތީއެވެ. ﷲ ތަޢާލާގެ ރުހިވޮޑިގަތުން ހޯދަން އިތުރަށް މަސައްކަތްކުރާނެތީއެވެ. އެއިރުން އަޅުކަންކުރުންވެސް ގިނަކުރާނެއެވެ. ދުޢާކުރުންވެސް ގިނަކުރާނެއެވެ. ފާފަ ނުކުރަން މަސައްކަތްކުރާނެއެވެ. 
މިކަންކަން ވެގެންދާނީ އެމީހަކަށް ލިބޭނެ ޙަޤީޤީ އުފާވެރިކަމަށެވެ. ސަބަބަކީ އަހުރެމެންނަސް ލިބޭނެ ޙަޤީޤީ އުފާވެރިކަމަކީ ސުވަރުގެ ލިބުމެވެ. މިބަޔާންކުރި ކަންކަމުގެ ސަބަބުން އެމީހަކު  ސުވަރުގެ ވައްދަވާނެތެވެ. އިން ޝާ ﷲ
 
- އިސްލާމީ ތިލަފަތުގެ ދަރުސަކުން