ޒަޔަނިސްޓު ޔަހޫދީން ފަލަސްތީނުގައި ހިންގަމުންދާ އުދުވާނު ތަކާއި ދެކޮޅަށް ސައިކަލު ބުރެއް ބޭއްވުމަށް ނިންމައިފިއެވެ. 
މިއަދު ހަވީރު 16:00 ގައި "ފަލަސްޠީނާއެކު ދިވެހީން" ގެ ނަމުގައި އޮންނަ މި ސައިކަލު ބުރު ފެށުމަށް ހަމަޖެހިފައިވަނީ މާލޭގެ ރަސްފަންނު ސަރަހައްދުންނެވެ. 
މި ސައިކަލު ބުރު އިންތިޒާމް ކުރާ ފަރާތުން މައުލޫމާތު ދީފައިވާ ގޮތުގައި މިއީ، މާލެ ސިޓީ ކައުންސިލާއި، ޕްލޭނިންގ މިނިސްޓްރީ އާއި ދިވެހި ފުލުހުންގެ ވެސް ހުއްދަ އާއި، އެ ފަރާތްތަކުގެ އެއްބާރުލުމާއި އެކު ކުރިއަށް ގެންދެވޭ ސައިކަލު ބުރެކެވެ. 
Advertisement
މި ސައިކަލު ބުރުގެ އިތުރުންވެސް ފަލަސްޠީނުގެ ރައްޔިތުންނާއި އެކު ދިވެހީން ތިބިކަން އެންގުމަށް މިއަދު 4:30 ގައި ބޮޑު އެއްވުމެއް މާލޭގައި ބޭއްވުމަށްވެސް ވަނީ ހަމަޖެހިފައެވެ. އަދި މާލެ ނޫން ރާއްޖޭގެ ވަރަށް ގިނަ ރަށްރަށުގައި ފަލަސްޠީނުގެ ރައްޔިތުންގެ ހައްގުގައި އަޑު އުފުލުމަށް ހަރަކާތްތައް މިއަދު ކުރިއަށް ގެންދިޔުމަށް ވަނީ ހަމަޖެހިފައެވެ. 
ފަލަސްޠީނުގެ މިނިވަންކަމަށްޓަކައި ހަނގުރާމަ ކުރަމުންދާ ހަނގުރާމަވެރިން ފާއިތުވި ހޮނިހިރު ދުވަހު ދިން ކުއްލި ހަމަލާތަކުގެ ރައްދެއްގެ ގޮތުގައި އިޒްރާއިލްގެ ހައްދުފަހަނައެޅި ޔަހޫދީން ޣައްޒާއަށް ދެމުންދާ ހަމަލާތަކުގައި ޝަހީދުވި މީހުންގެ ޢަދަދު 1417 އަށް އަރައިފައިވާ ކަމަށް ފަލަސްޠީނުގެ ސިއްޚީ ވުޒާރާއިން ބުނެފައިވެއެވެ. 
ފަލަސްޠީނުގެ ސިއްޚީ ވުޒާރާއިން އެންމެ ފަހުން ނެރެފައިވާ އަދާހަމަތަކުގައި ބުނެފައިވަނީ ޝަހީދުވި މީހުންގެ ޢަދަދު 1417 އަށް އަރައިފައިވަ ކަމަށާއި އޭގެ ތެރޭގައި 447 ކުޑަކުދިން ހިމެނޭއިރު، 248 އަންހެނުން ހިމެނެއެވެ.
ޣައްޒާގެ އެކި ދިމާއަށް ދިން ހަމަލާތަކުގައި އެކިވަރުގެ ޒަޚަމްތައް ލިބުނު މީހުންގެ ޢަދަދު ވަނީ 6268 އަކަށް ވަނީ އަރައިފައެވެ. އޭގެ ތެރޭގައި 1531 ކުޑަކުދިންނާއި، 932 އަންހެނުން ހިމެނެއެވެ.