ކުރިއަށް އޮތް ރިޔާސީ އިންތިހާބުގައި އެމްޑީޕީގެ ޓިކެޓުގައި ވާދަ ކުރައްވާނީ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ. "ސަން"އާ ވާހަކަ ދައްކަވަމުން އުމަރު ވިދާޅުވި ގޮތުގައި އެ ޕާޓީ ތެރޭގައި މިހާރު ބާރު އޮތް ފަރާތަކީ ރައީސް ސޯލިހެވެ. އަދި މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވެރިކަމަށް ވާދަ ކުރައްވަން ބޭނުން ފުޅުވާ ނަމަ އިންތިހާބުގައި ބައިވެރިވެވަޑައިގަންނަވަން ޖެހޭނީ މިނިވަން ކެނޑިޑޭޓެއްގެ ގޮތުގައި ނުވަތަ އެހެން ޕާޓީއަކުން ކަމަށް އުމަރު ވިދާޅުވިއެވެ. "އެމްޑީޕީ ތެރެއިންވެސް މިހާރު ބާރު އޮތް ފަރާތަކީ އިބްރާހިމް މުހައްމަދު ސޯލިހް، ސޯލިހު އެމްޑީޕީގެ ޓިކެޓުގަ ވާދަ ކުރައްވާނީ. ނަޝީދު ވާދަ ކުރައްވަން ބޭނުންފުޅުވާ ނަމަ މިނިވަންކޮށް ވާދަ ކުރައްވަން ޖެހޭނީ ނުވަތަ އެހެން ޕާޓީއަކުން ވާދަ ކުރައްވަން ޖެހޭނީ. އެމްޑީޕީގެ ޓިކެޓު ނަޝީދަށް ލިބޭނެ ހަމަ އެއްވެސް ގޮތެއް އަޅުގަނޑަކަށް ނުފެނޭ،" އުމަރު ވިދާޅުވިއެވެ. މީގެ އިތުރުން، އުމަރު ތުހުމަތު ކުރެއްވި ގޮތުގައި ނަޝީދު މިހާ ހިސާބަށް އެމްޑީޕީގެ ލީޑާޝިޕްގައި ހުންނެވީ ގަދަ ބާރުންނެވެ. އެގޮތުން އެމްޑީޕީން ނަޝީދާ ވާދަވެރި ފަރާތްތައް ވަކިކޮށް، ޕާޓީގެ އެތެރޭގެ އިންތިހާބުތައް އޮޅުވާލެއްވި ކަމަށްވެސް އުމަރު ތުހުމަތު ކުރެއްވިއެވެ. ނަމަވެސް މިހާރު އެމްޑީޕީގެ ހުރިހާ ބާރެއް އޮތީވެސް އަދި ކުރިއަށް އޮތް ތަނުގައި އޮންނާނީވެސް ރައީސް ސޯލިހުގެ އަތްޕުޅުގައި ކަމަށް އުމަރު ވިދާޅުވިއެވެ. އުމަރު ލަފާ ކުރައްވާ ގޮތުގައި އެމްޑީޕީގެ އެތެރޭގައި މިހާރު އުފެދިފައިވާ މައްސަލަ ހައްލު ނުވެ، ދެން އިތުރަށް ގޯސް ވާނީއެވެ. އަދި އެމްޑީޕީ ތެރެއިން ދެ ޕާޓީއެއް އުފެދޭނީއެވެ. ނަމަވެސް ރިޔާސީ އިންތިހާބުގެ ފުރަތަމަ ބުރުގައި އެމްޑީޕީގެ ވޯޓުތައް ބައިބައިވުމަށް ފަހު ދެވަނަ ބުރަށްދާ ކެންޑިޑޭޓެއްގެ ފަހަތަށް ޕާޓީގެ އެންމެން ޖަމާވާނެ ކަމަށް ވެސް އޭނާ ވިދާޅުވިއެވެ. "އިންތިހާބުގެ ނަތީޖާގެ ފުރަތަމަ ބުރުގަ އެމްޑީޕީގެ ވޯޓުތައް ޑިވައިޑުވާނެ، ބައިބައިވާނެ. ދެވަނަ ބުރުގަ އަޅުގަނޑު ގަބޫލު ކުރަނީ އަނެއްކާވެސް އެ ވޯޓު ޖަމާވާނެޔޭ އެއް ތަނަކަށް. އޭގެ ވަރަށް ސާފު މިސާލެއްތާ އަޅުގަނޑާ ރައީސް އަބްދުﷲ ޔާމީނާ ވަރަށް ބޮޑަށް ވާދަކޮށް، އެކަކު އަނެކަކަށް ހަޅޭއްލަވާފަ ހަމަ ދެވަނަ ބުރުގަ ތިބީ އެއްކޮށްތާ. ވީމާ އެއީ އެކަން ހިނގާ ގޮތް ޕޮލިޓިކްސްގަ. ވީމާ ނަޝީދުއާ އިބްރާހީމް މުހައްމަދު ސޯލިހާ ޖެހިފަ އޮތް މައްސަލަވެސް ފުރަތަމަ ބުރުގަ ހައްލު ނުވެ އޮންނާނީ، ދެވަނަ ބުރުގަ އެކަން ހައްލު ވާނީ،" އުމަރު ވިދާޅުވިއެވެ. އުމަރު މިހެން ވިދާޅުވެފައިވާއިރު، އެމްޑީޕީގެ ރިޔާސީ ޕްރައިމަރީގައި ވާދަކުރައްވައި ކާމިޔާބު ހޯއްދަވާނެ ކަމަށް ރައީސް ނަޝީދު މީގެކުރިން ވަނީ ވިދާޅުވެފައެވެ. އެމްޑީޕީގެ ތެރޭގައި މިހާރު ވަނީ ދެ ފެކްޝަނެއް އުފެދިފައެވެ. ރައީސް ނަޝީދުގެ ފެކްޝަނާއި ރައީސް ސޯލިހުގެ ފެކްޝަންގެ މެދުގައި ބަހުގެ ހަމަލާތަކެއް ފަހަކަށް އައިސް އަމާޒުކުރަމުންދެއެވެ.