އަންނަ ބުރާސްފަތިދުވަހު ބާއްވާ ޕީޕީއެމްގެ ކޮންގްރެސްގައި ވާދަކުރައްވާ ބޭފުޅުންނަށް ޕާޓީގެ އިންތިގާލީ ރައީސް މައުމޫން އަބްދުލް ގައްޔޫމް މިއަދު ދެއްވި ފަރިއްކޮޅުގައި އުމަރު ނަސީރާއި އޭނާގެ އިސް ބައެއް ބޭފުޅުން ބައިވެރިވެވަޑައެއް ނުގެންނެވި އެވެ.އުމަރު ވިދާޅުވީ މައުމޫންގެ ދައުވަތަށް އޭނާ އަށް ވަޑައިނުގެންނެވުނީ މިރޭ ބާއްވާ އޭނާގެ ކެމްޕޭން ޖަލްސާގެ ތައްޔާރީތަކާ ބިޒީކޮށް އުޅުއްވަން ޖެހިވަޑައިގަތުމުން ކަމަށެވެ.ރާބާ ރެސްޓޯރަންޓްގައި ބޭއްވި ހަފްލާ އަށް އުމަރު ވަޑައިގެން ނެތަސް ޕީޕީއެމްގެ ރިޔާސީ ޕްރައިމަރީގައި އޭނާގެ އިތުރުން ވާދަކުރައްވާނެ ކަމަށް އިއުލާންކުރައްވާފައިވާ އަބްދުﷲ ޔާމީނާއި އޭނާގެ "ޔަގީން" ކެމްޕޭން ޓީމުން ބައިވެރިވި އެވެ."އެއްވެސް މައްސަލައެއް އޮވެގެނެއް ނޫން. އަޅުގަނޑު ޖަލްސާގެ ކަންތައްތަކުގައި ބިޒީވީމާ ނުދެވުނީ،" އުމަރު ވިދާޅުވި އެވެ.ޕީޕީއެމްގެ އިސް އޮފިޝަލަކު ވިދާޅުވީ "ބިޒީކަމުން ދެވެން ނެތް ކަމަށް" އުމަރު ވިދާޅުވީ ހަފްލާ ފެށެން ވަރަށް ކުޑަތަންވެފައި ވަނިކޮށް ކަމަށެވެ. ނަމަވެސް ބިޒީވީ ކޮން ސަބަބަކާ ހުރެ ކަން އޭރު އޭނާ އަންގަވާފައި ނުވާ ކަމަށް އޮފިޝަލް ވިދާޅުވި އެވެ.އެ ހަފްލާގައި މައުމޫނާ އެންމެ އަރިސްކޮށް އިންނެވީ ޕާޓީގެ ނައިބު ރައީސްކަމަށް ވާދަކުރައްވާ، އަދި މިހާރު ވެސް ޕީޕީއެމްގެ އިންތިގާލީ ނައިބު ރައީސްގެ މަގާމުގައި ހުންނެވި ފޮނަދޫ ދާއިރާގެ މެންބަރު އަބްދުއްރަހީމް އަބްދުﷲ އާއި ޔާމީނެވެ. އަބްދުއްރަހީމް އަކީ ޔާމީންގެ "ޔަގީން" ޓީމުގެ ސްލޯގަންގައި ވާދަކުރައްވާ ބޭފުޅެކެވެ.އިންތިގާލީ ވަގުތީ ނައިބު ރައީސަކަށް ހުންނެވި އުމަރުގެ ތާއީދާ އެކު ޕީޕީއެމްގެ ނައިބު ރައީސްކަމުގެ މަގާމަށް ވާދަކުރައްވާ ގެމަނަފުށީ ދާއިރާގެ އިލްހާމް އަހުމަދާއި އުމަރަށް ތާއީދުކޮށްގެން ޕާޓީގެ އެކި މަގާމުތަކަށް ވާދަކުރައްވާ އެހެން ބޭފުޅުން ވެސް މިއަދުގެ ހަފްލާއިން ނުފެނުނެވެ.ޕީޕީއެމްގެ ސްޕޯކްސްޕާސަން ގަލޮޅު ދެކުނު ދާއިރާގެ މެންބަރު އަހުމަދު މަހުލޫފް "ހަވީރަ"ށް ވިދާޅުވީ އިންތިހާބުތަކުގައި ވާދަކުރާ ހުރިހާ ކެންޑިޑޭޓުންނަށާއި ޕާޓީގެ ނައިބު ލީޑަރުންނަށް ދައުވަތު އެރުވި ކަމަށެވެ. ނަމަވެސް އުމަރު ހަފްލާ އަށް ވަޑައިނުގެންނެވީ ކީއްވެކަން އެނގިވަޑައިނުގަންނަވާ ކަމަށް އޭނާ ވިދާޅުވި އެވެ."އުމަރު ވަޑައިނުގެންނެވީ ކީއްވެ ކަމެއް ނޭނގޭ. އެއްވެސް ބޭފުޅަކު އިސްތިސްނާ ނުކޮށް ނައިބު ލީޑަރުންނަށް ވެސް އަދި ހުރިހާ ކެންޑިޑޭޓުންނަށް ވެސް ހުންނާނީ ދައުވަތު ފޮނުވާފައި،" މަހުލޫފު ވިދާޅުވި އެވެ.މައުމޫން  2008ގެ ރިޔާސީ އިންތިހާބުގައި ބޭނުންކުރެއްވި އަތްތިލަ ލޯގޯއާ އެކު، "ޓީމް އުމަރު"ން ކެމްޕޭން ކުރަމުން އަންނައިރު މައުމޫންގެ ގިނަ ބޭފުޅުން ފެނުނީ ޔާމީން ރޭ ދަރުބާރުގޭގައި ބޭއްވި " 2013 ޔަގީން" ޖަލްސާއިންނެވެ.ޕީޕީއެމްގެ އިންތިޚާބުތަކުގައި ވަކި ބޭފުޅަކަށް ތާއީދުނުކުރައްވާނެ ކަމަށް މައުމޫން މީގެ ކުރިން ވެސް ވިދާޅުވަމުން ގެންދެވި ވާހަކަފުޅު މިއަދު ވެސް ތަކުރާރުކުރެއްވި އެވެ.އުމަރުގެ ކެމްޕޭން ފެށުމުގެ ރަސްމީ ޖަލްސާ މިދިޔަ ހުކުރު ދުވަހުގެ ރޭ ބާއްވަން އޮވެފައި އެންމެ ފަހު ވަގުތު ވަނީ ކެންސަލްކޮށްފަ އެވެ.އުމަރުގެ ކެމްޕޭން ޓީމުން ބުނެފައިވަނީ އެރޭގެ ޖަލްސާ ކުއްލިއަކަށް ކެންސަލްކުރަން ޖެހުނީ މައުމޫންގެ ބޭފުޅުންތަކެއް މ. އެންދެރިކުރީގައި ބާއްވަން ހަމަޖެއްސި ބައްދަލުވުމަކާ ގުޅިގެން ކަމަށެވެ. އެ ޖަލްސާ ފަސްކުރަން ޖެހުމުން ޕާޓީގެ ބައެއް އެކްޓިވިސްޓުންގެ މެދުގައި އެރޭ ކޮންމެވެސް ވަރަކަށް ހޫނު ޒުވާބުތައް ވެސް ބަދަލުކުރި އެވެ.ޕީޕީއެމްގެ ފުރަތަމަ ކޮންގްރެސް ފަށާނީ އަންނަ ބުރާސްފަތި ދުވަހު އެވެ.