އަންނަ އަހަރު ސިޔާސީ ޕާޓީއަކާ ގުޅުމަށްޓަކައި ޕާޓީއަކާ އެކު ވާހަކަ ދައްކަވަމުން ގެންދަވާ ކަމަށް ކުޅުދުއްފުށީ ދެކުނު ދާއިރާގެ މެމްބަރު މުހަންމަދު ނަޝީދު ބުރާސްފަތިދުވަހު ވިދާޅުވެއްޖެ އެވެ.
ގުޅިވަޑައިގަންނަވަން ވާހަކަ ދައްކަވަނީ ސަރުކާރުގެ ތެރޭގައި ހިމެނޭ ޕާޓީއެއް ކަމެއް ނުވަތަ އިދިކޮޅު ޕާޓީއެއް ކަމެއް ވިދާޅެއް ނުވެ އެވެ. އެކަމަކު ވިދާޅުވީ އެމްޑީޕީން އޭނާ ފެނުމަކީ އެކަށީގެންވާ ކަމެއް ނޫން ކަމަށެވެ.
އޭނާ ވިދާޅުވި ގޮތުގައި އަންނަ އަހަރު އާ ސަފުހާއެއް ހުޅުވޭއިރު ސިޔާސީ ޕާޓީއެއްގެ ތެރެއިން ދިއުމަކީ މުހިންމު ކަމެކެވެ.
"އަޅުގަނޑު މިހާތަނަށް ވެސް މި ގޮތުގައި މި ހުރީ ކުޅުދުއްފުށީ ދެކުނު ދާއިރާގެ ގޮނޑި އަށް އިންތިހާބުވީ އެއްވެސް ޕާޓީއަކާ ނުގުޅި ކަމަށް ވާތީ. އެހެން ނަމަވެސް މިހާރު ހުރިހާ ކަމެއް މި ދަނީ ސިޔާސީ ޕާޓީތަކުގެ ތެރެއިން. ކަންކަން ވަރަށް ރީތިކޮށް އެ މަގުން ފެންނަމުން އެބަ ދޭ. އެހެންވީމާ އަޅުގަނޑު ނިންމީ ސިޔާސީ ޕާޓީއަކާ ގުޅެން،" ނަޝީދު ވިދާޅުވި އެވެ.
ދިޓީވީގައި ވެސް ނަޝީދު ވަނީ އެ މައުލޫއުގައި ވާހަކަ ދައްކަވައިފަ އެވެ. އަންނަ އަހަރުގެ ރިޔާސީ އިންތިހާބުގައި އެއްވެސް ބޭފުޅެއްގެ ރަނިން މޭޓެއްގެ ގޮތުގައި ފެނިދާނެތޯ ދިޓީވީން ސުވާލުކުރުމުން އެއަށް ސީދާ ޖަވާބެއް އޭނާ ނުދެއްވަ އެވެ. އެކަމަކު ވިދާޅުވީ އަންނަ އަހަރުގެ "ބޮޑު މަންޒަރުގެ ތެރެއިން" އޭނާ ފެންނާނެ ކަމަށެވެ.