ކަރަންޓުގެ މައްސަލާގައި ފުވައްމުލަކު މެދު ދާއިރާގެ މެންބަރު އަލީ ފަޒާދު ވެސް ހިތްހަމަ ނުޖެހުން ފާޅު ކުރައްވައިފިއެވެ.
އަލީ ފަޒާދު ހިތްހަމަ ނުޖެހުން ފާޅު ކުރެއްވީ ޕީޕީއެމް ޕީޖީ ވައިބަ ގުރޫޕުގައެވެ.
ޕިޖީ މެންބަރުން ތިއްބަވާ ވައިބަ ގުރޫޕުގައި ފަޒާދު މިއަދު ވިދާޅުވީ ކަރަންޓުގެ މައްސަލާގައި ކަމާ ބެހޭ ފަރާތްތަކުން މޮޅު ވާހަކަ ދައްކާ އިރު ކަންތައްތައް ވަނީ އެހެން ނޫން ކަމަށެވެ. އަދި އެފަދަ ކަންތައްތަކުގެ ސަބަބުން ވެއްޓެނީ ސަރުކާރުގެ އަގު ކަމަށާއި ރައްޔިތުންގެ ކަންބޮޑުވުން ވެސް އިތުރުވާ ކަމަށް ފަޒާދު ވިދާޅުވިއެވެ.
ފަޒާދު ވަނީ ވައިބަ ގުރޫޕަށް ކަރަންޓު ބިލެއް ވެސް ލާފައެވެ. އެ ބިލާއެކު ފަޒާދު ވިދާޅުވީ 16000 ރުފިޔާ އަރާ ބިލަކަށް ކަންކަން ނިމުނު އިރު އުނިވީ އެންމެ 500 ރުފިޔާ ކަމަށެވެ. އެއީ އެންމެ ތިން އިންސައްތަ ކަމަށް ވެސް ފަޒާދު ވިދާޅުވިއެވެ.
ފަޒާދު އިތުރަށް ވިދާޅުވީ ޑިއުޓީ ކުޑަކޮށްގެން 140 މިލިޔަން ރުފިޔާ އަހަރަކު ދައުލަތަށް ލިބޭޢ އާއްމުދަނީ ކުޑަވާ އިރު ބައެއް މަޝްރޫއުތައް ހުއްޓާލަން ޖެހޭނެ ކަމަށެވެ. ނަމަވެސް ކަރަންޓު ބިލުން އެ އުފާވެރިކަން ނުލިބޭ ކަމަށް ފަޒާދު ވިދާޅުވިއެވެ.
ކަރަންޓާ މެދު މެންބަރު ފަޒާދު ހިތްހަމަ ނުޖެހުން ފާޅު ކުރެއްވި އިރު ކަރަންޓު އަގު ހެޔޮ ކުރުމުން ހުރިހާ މެންބަރުން ރައީސް އަބްދުﷲ ޔާމީނަށް ޝުކުރު ދަންވަމުން ގެންދެވި އިރު މާފަންނު ދެކުނު ދާއިރާގެ އަބްދުﷲ ރިފާއުއާއި ފޭދޫ ދައިރާގެ މެންބަރު އިބްރާހީމް ދީދީ ވަނީ ކަންބޮޑުވުން ފާޅު ކުރައްވާފައެވެ.