ކުރިޔަށް އޮތް ރައްޔިތުން މަޖިލިހުގެ އިންތިޚާބިގައި ހުޅުމާލޭ ދެކުނު ދާއިރާއަށް ވާދަކުރައްވަން ނިންމަވާފައިވާ, ކުރީ ސަރުކާރުގައި ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރަކަށް ހުންނެވި އައިޝަތު ނަހުލާއަށް އެދާއިރާގެ ޕީޕީއެމް/ޕީއެންސީގެ މަޖިލިސް ޕްރައިމަރީގެ ޓިކެޓް ދިނުމަށް ރައީސް މުއިއްޒު ނިންމަވާފައިވާތީ, އެދާއިރާގެ ޕީޕީއެމް/ޕީއެންސީގެ ޕްރައިމަރީގައި ވާދަކުރުމަށް މިހާރުވެސް ކެމްޕޭން ކުރަމުންދާ ދުންޔާ މައުމޫނުގެ ކެނޑިޑަސީ މިއަދު ބާތިލް ކުރުމަށް ނިންމާފައިވާކަން “ދިޔަވަރު އޮންލައިން” ކަށަވަރު ކުރެެވިއްޖެއެވެ.
ދުންޔާގެ ޓިކެޓްވެސް ކެންސަލް ކުރުމަށް ހަމަޖެހިފައިވަނީ އޭނާއަކީ ޕީޕީއެމް/ޕީއެންސީއަށް އިޚްލާސްތެރި ފަރާތެެއް ނޫންކަމަށް ލީޑަރޝިލުން ނިންމުމަށްފަހުއެވެ. މައުލޫމާތު ލިބިފައިވާ ގޮތުގައި މިއަދު ހަވީރު ދުންޔާއަށް ސިޓީ ރައްދު ކުރުމަށް ވަނީ ހަމަޖެހިފައެވެ.
އަންނަ ހޮނިހިރު ދުވަހު ބޭއްވުމަށް ހަމަޖެހިފައިވާ, ޕީޕީއެމް/ޕީއެންސީގެ މަޖިލިސް ޕްރައިމަރީއަށް ކުރިމަތިލާފައިވާ ކެނޑިޑޭޓުންގެ ތެރެއިން ޕީއެންސީގެ ޗެއަރމަން, އަދި ރައީސް މުއިއްޒުގެ އިސް މުޝީރު އަބުދުއްރަހީމްގެ ރުހުން ނެތް ކެނޑިޑޭޓުންގެ ޕްރައިމަރީގެ ޓިކެޓް ޕީއެންސީން ދަނީ ކެންސަލް ކުރަމުންނެވެ.
އަދި ކެނޑިޑަސީ ބާތިލް ކުރުމަށް ނިންމި ބައެއް ކެނޑިޑޭޓުން ދަނީ އަބުދުއްރަހީމްއަށް ފައިސާ ދީގެން ޓިކެޓް އަލުން ކަށަވަރުވެސް ކުރަމުންނެވެ.
އެހެންނަމަވެސް ދުންޔާ މައުމޫނުގެ ޓިކެޓް ކެންސަލް ކުރުމަށް ނިންމާފައިވަނީ, އެ ޓިކެޓް, މަހުޖަނު ގާސިމް އިބްރާހިމްގެ އަބިކަނބަލުން ނަހުލާއަށް ދިނުމަށް މުއިއްޒު ނިންމެވުމާއި ގުޅިގެންނެވެ.
”ދިޔަވަރު އޮންލައިން“އަށް މައުލޫމާތު ދިން ޕީއެންސީގެ އިސް އޮފިޝަލަކު ވިދާޅުވި ގޮތުގައި ދާދިފަހުން ނަހުލާގެ ފިރިކަލުން, އަދި ޖޭޕީގެ ލީޑަރު ގާސިމް އިބުރާހިމް ރައީސް މުއިއްޒުއާއި ބައްދަލުކުރި ދުވަހު ގާސިމް ރައީސް މުއިއްޒުގެ ކިބައިން އެދިލެއްވީ މާމިގިލީ ދާއިރާގެ މަޖިލިސް ޓިކެޓްގެ އިތުރުން ހުޅުމާލެ ދެކުނު ދާއިރާގެ ޕީއެންސީގެ ޓިކެޓް ޖުމުހޫރީ ޕާޓީއަށް ދިނުމަށެވެ.
އޭގެ ބަދަލެއްގެ ގޮތުން, ޕީއެންސީގެ މަޖިލިސް ކެމްޕޭންއަށް 30 މިލިއަން ރުފިޔާ ޚަރަދު ކޮށްދިނުމަށް މުއިއްޒު އެދިލެއްވިކަމަށްވެސް އޮފިޝަލް ވިދާޅުވިއެވެ. އެގޮތުން ގާސިމްގެ ގޮޑިއާއި ނަހުލާގެ ގޮނޑި ދޫކޮށް ދީފިނަމަ 50 މިލިއަން ރުފިޔާ ޕީއެންސީގެ މަޖިލިސް ކެމްޕޭނަށް ޚަރަދު ކޮށްދެއްވުމަށް ގާސިމް އެއްބަސްވެވަޑައިގަތުމުން, ދެ ދެދާއިރާ ދޫކޮށްދެއްވުމަށް މުއިއްޒު އެއްބަސްވެވަޑައިގެންނެވި ކަމަށްވެސް ”ދިޔަވަރު އޮންލައިން“އަށް މައުލޫމާތުދިން އޮފިޝަލް ވިދާޅުވިއެވެ.
ހުޅުމާލެ ދެކުނު ދާއިރާގެ ޕީއެންސީގެ މަޖިލިސް ޕްރައިމަރީގައި ވާދަކުރުމަށް ކުރީގެ ފޮރިން މިނިސްޓަރ ދުންޔާ މައުމޫނުވަނީ ގެންދަވަނީ ކެމްޕޭންވެސް ކުރައްވަމުންނެވެ.
ހުޅުމާލެ ދެކުނު ދާއިރާއަށް ނަހުލާ ވާދަކުރައްވާއިރު, ކުރީ ސަރުކާރުގެ ޓްރާންސްޕޯޓު މިނިސްޓަރުކަމުގައި އޭނާ ހުންނެވިއިރު ވަނީ ކޮރަޕްޝަންގެ ބޮޑެތި ތުހުމަތުތަކެއް ކުރެވިފައެވެ. އޭގެ ތެރެއިން ބައެއް މައްސަލަތަށް އަދިވެސް ވީ އޭސީސީގައެވެ.