ސަރުކާރުގެ މަޝްރޫއުތައް ބިޑް ކުރުމަކާ ނުލައި އެކިއެކި ކުންފުނިތަކާ ހަވާލުކުރަނީ އިންތިހާބުތަކަށް ނުފޫޒު ފޯރުވުމަށް ބޭނުންވާ ފައިސާ ހޯދުމަށް ކަމަށް މެދުހެންވޭރު ދާއިރާގެ މެންބަރު އަލީ އާޒިމް ވިދާޅުވެއްޖެ އެވެ.
"ބިޑް ކުރުމެއްނެތި ހަމައެއް އުސޫލެއް ނެތި ވަކި މީހަކަށް އެއްވެސް ބެލުމެއް ނެތި ބޮޑެތި ޕްރޮޖެކްޓުތައް ހަވާލުކުރުމުން ދަނީ. ހަމަ ހިތަށްއެރި ގޮތަކަށް، ސަރުކާރުން ރިޔާސީ އިންތިހާބަށް ނުފޫޒު ފޯރުވުމަށް ނޫނީ އިންތިހާބަކަށް ނުފޫޒު ފޯރުވުމަށް ފައިސާ ލިބޭ ކޮންމެ ވަގުތެއްގައި އެކަން ކުރަން އެ ތިބެނީ ތައްޔާރަށް،" އާޒިމް ވިދާޅުވި އެވެ.
އާޒިމް ވިދާޅުވި ގޮތުގައި ސަރުކާރު ހިއްސާވާ ކުންފުނިތަކަށް ގިނަ ސިޔާސީ މަގާމުތައް އައްޔަންކޮށް ބޮޑެތި މުސާރަ ދެމުންދާއިރު، އެމީހުން އެއްވެސް މަސައްކަތެއްވެސް ކުރާކަށް ނުޖެހެ އެވެ.
"ކުންފުނިތަކަށް އެދަނީ އެއް ދުވަހުން އަނެއް ދުވަހަށް މީހުން، އެތަނަށް ނުބައްދަލުވާ ވަރަށް ނުބައްދަލު އަދަދަށް އެދަނީ ވައްދަމުން. އެމީހުންނަށް އޮންނަހާވެސް ކަމަކީ ހެނދުނު ގޮސް އިނގިލި ޖައްސާލާފަ ދިޔައީމަ އެމީހުންނަށް ނިމުނީ، ތިރީސް ހާސް، ސާޅީސް ހާސް އެމީހުންގެ މުސާރައަށް ލިބޭ، އެމީހުން އިށިއިންނާނެ ތަނެއް ނުހުރޭ،" އާޒިމް ވިދާޅުވި އެވެ.