މިއޯގަސްޓް މަހުގެ 6 ވަނަ ދުވަހު ދިވެހިރާއްޖޭގެ ސުޕްރީމް
ކޯޓުން އިއްވި ހުކުމަކީ މިއަހަރުގެ ރިޔާސީ އިންތިޚާބުގައި ވާދަކުރާ އެންމެ ބޮޑު
އިދިކޮޅު ސިޔާސީ ޕާޓީ، ޕީޕީއެމާއި އެޕާޓީގެ ލީޑަރ ޖަލުގައި އޮންނެވި ކުރީގެ ރައީސް
އަބްދުﷲ ޔާމީނަށް ތާއީދުކުރި އެއްލައްކައަށްވުރެ ގިނަ ދިވެހި ރައްޔިތުންނަށް
ވަރަށް ފުން އަސަރުތަކެއް ލިބިގެންދިޔަ ހުކުމަކަށް ވާނެއެވެ. އެ ހުކުމާއެކު ރައީސް
އަބްދުﷲ ޔާމީން މިއަހަރުގެ ރިޔާސީ އިންތިޚާބުގައި ވާދަކުރުމުގެ ދޮރު
ބަންދުވެގެންދިޔައީއެވެ.
ސުޕްރީމް ކޯޓުގެ ހުކުމުން ވަރަށް ގިނަ ކަންކަން
ދިވެހިންނަށް ތަސައްވުރު ވެގެން ހިނގައްޖެއެވެ. 2008 ވަނަ އަހަރު ދިވެހިރާއްޖެ
ޑިމޮކްރަސީއަކަށް އަނބުރުވައިލި ގާނޫން އަސާސީ އެއީ އަޅުގަނޑުމެންގެ ޑިމޮކްރަސީގެ
އަސާސްކަމުގައިވީނަމަވެސް އެއީ ހަމައެކަނި ދެލީގެ ކަރުދާސްގަނޑެއްކަމާއި، ދިވެހި
ރާއްޖޭގައި ޒަމާނުއްސުރެ ހަރުލައި އޮތް ޚުދުމުޚްތާރު ނިޒާމުގެ މައިތަނބަށް
ގުޑުމެއް ނާރާކަމެވެ. އެއީ ރަސްކަމުގެ ތަޚްތަށް އިސްވުމަށްފަހު ދެން އެމަގާމަށް
ވާދަކޮށްފާނެހެން ހީވާ މީހާގެ މުދާތައް ދައުލަތަށްނަގައި އޭނާގެ ފައިގައި
ހިލިހިލާޖަހައިފައި ރާއްޖޭގެ ދުރު ރަށަކަށް އަރުވައިލުމާއި ނުވަތަ މިހާރުގެ
މޮޑަންގޮތަށް ރައީސްކަމަށް އައުމަށްފަހު ދެން އެމަގާމަށް ވާދަކޮށްފާނެހެން ހީވާ
މީހާ ކޮންމެވެސް ކަމަކާ ގުޅިވައިގެން ޝަރީއަތް ހިންގައި ފަނޑިޔާރުގެ މެދުވެރިކޮށް
ވެރިކަމަށް ކުރިމަތި ނުލެވޭގޮތަށް ޖަލަށްލައިގެން ވެރިކަން ހިންގުމެވެ. އެމީހެއްގެ
ގޯތި ގެދޮރާއި މުދާތައްވެސް ނެގިދާނެ ކަމެވެ. ރައީސް އަބްދުﷲ ޔާމީންގެ
ރައީސްކަމުގައި އެމްޑީޕީގެ ލީޑަރ މުހައްމަދު ނަޝީދާއި ޖުމްހޫރީ ޕާޓީގެ ލީޑަރ
ގާސިމް އިބްރާހީމާއިމެދު ފަނޑިޔާރުގެ މެދުވެރިކޮށް ކަންތައްކުރީ މިގޮތަށެވެ. އެބޭފުޅުންގެ
އިންތިޚާބީ ހައްގު ސުޕްރީމް ކޯޓް މެދުވެރިކޮށް ނިގުޅައިގަނެވުނެވެ.
ސުޕްރީމް ކޯޓުގެ އޯގަސްޓް ހަވަނަ ދުވަހު ހިންގި ޝަރީއަތުގެ
މަޖިލީހުގައި ރައީސް އަބްދުﷲ ޔާމީން ވިދާޅުވީ އޭނާއަށް މިއަހަރުގެ ރިޔާސީ
އިންތިޚާބުގައި ވާދަކުރުމުގެ ހައްގު ގެއްލިގެންދަނީ ފަނޑިޔާރުގެއިން އަމަލު
ކުރިގޮތުން ކަމަށެވެ. ހައިކޯޓުގައި އެމަނިކުފާނުގެ އިސްތިއުނާގުގެ މައްސަލަ
ހިނގަމުންގޮސް އިންތިޚާބާ ކައިރިވިއިރު ފަހު އަޑުއެހުމަށްވެފައި އޮއްވައި މައްސަލަ
ބައްލަވާ ބެންޗުގެ ބައެއް ފަނޑިޔާރުން ޗުއްޓީ ނަންގަވައިގެން ވަޑައިގަތީއެވެ.
ފަނޑިޔާރުންގެ ޗުއްޓީ ނިމުނީ ސުޕްރީމް ކޯޓުން މައްސަލަ ބަލައި އިންތިޚާބުގައި
ވާދަކުމުރުގެ ދޮރު ބަންދުވިކަން ކަނޑައެޅި ހިސާބުންނެވެ. އެމްއެމްޕީއާރްސީގެ
މައްސަލަ ބެލުމަށް ރައީސް އިބްރާހީމް މުހައްމަދު ސާލިހް ރިޔާސީ ކޮމިޝަނެއް
ހައްދަވައި ރައްޔިތުންގެ މަޖިލީހުން އެކޮމިޝަނަށް ޚާއްސަ ބާރުތައްދޭ ގާނޫނެއް
ހަދައިގެން ތަހްގީގު ހިންގުމަށްފަހު ތުހުމަތު ކުރެވޭ 200 އަށްވުރެ ގިނަ މީހުންގެ
ނަން ހިމެނޭ ރިޕޯޓެއް ތައްޔާރު ކުރުމަށްފަހު ރައީސް އިބްރާހީމް މުހައްމަދު
ސާލިހްގެ އަތްޕުޅަށް އަރުވާފައި އޮތަސް ޝަރީއަތް ހިންގަނީ އޭގެތެރެއިން
މައިގަނޑުގޮތެއްގައި ރައީސް އަބްދުﷲ ޔާމީންގެ މައްޗަށެވެ.
Advertisement
ރައީސް އަބްދުﷲ ޔާމީންގެ މައްޗަށް ހިންގާ ޝަރީއަތަކީ
ސިޔާސީ ކުޅިގަނޑެއްކަން ތަސައްރަފްފުރިފައިވާ ކޮންމެ ދިވެހި ރައްޔިތަކަށް
އެނގެއެވެ. އެއީ ކޯޓްތަކުގެ ފަނޑިޔާރުންނަށްވެސް އެނގެއެވެ. އެކަން ކުރަނީ
އެމްއެމްޕީއާރްސީގެ ވައްކަން ބެލުމުގެ ނަމުގައެވެ. އޯގަސްޓް ހަވަނަ ދުވަހު ރައީސް
އަބްދުﷲ ޔާމީން ސުޕްރީމް ކޯޓުންނުކުމެވަޑައިގެން ޖަލުގޮޅިއަށް
ވެދެވަޑައިގެންނެވުމަށް ލޯންޗަށް އެރުއްވިއިރު އެމްއެމްޕީއާރްސީގެ ވައްކަމުގެ
އެންމެ އިސްދައުރެއް އަދާކުރެއްވި އަހްމަދު އަދީބް އަނބިކަނބަލުންގެ އަތްޕުޅުގައި
ހިތްޕަވައިގެން ސިންގަޕޫރުގެ ސެންޓް ފިހާރައަށް ވަންނަ ފޮޓޯގަނޑެއް ސޯޝަލް
މީޑިއާގައި އެނބުރެއެވެ.
އަދީބުގެ ވަކީލެއްގެ ގޮތުގައި ކުރިން މަސައްކަތްކުރެއްވި
ހުސައިން ޝަމީމް ޕްރޮސެކިއުޓަރ ޖެނެރަލްކަމަށް ރައީސް އިޚްތިޔާރުކުރެއްވުމުން
އަބްދުﷲ ޔާމީން މައްސަލަތައް ފުލުފުލުގައި ފަނޑިޔާރުގެއަށް ވައްދަވަމުން ގެންދަވައެވެ.
އެއްމައްސަލައެއް ނިމޭއިރު އަނެއް މައްސަލަ ހިނގައެވެ. ޔާމީންގެ މައްސަލާގައި
ވަކާލާތު ކުރައްވަން ޕްރޮސެކިއުޓަރ ޖެނެރަލްގެ އޮފީހުގައި މަސައްކަތްކުރައްވާ
ސީނިއަރ ޕްރޮސެކިއުޓަރުން އިދިކޮޅު ކަމަށް މައުލޫމާތު ލިބެއެވެ. އެހެންވީމާ
ރާއްޖޭގެ ކޯޓެއްގައި ހިންގާ އެންމެ ހައިޕްރޮފައިލް މައްސަލާގައި ދައުލަތުގެ
ފަރާތުން ކޯޓަށް ފޮނުއްވަނީ އެންމެ ޖޫނިއަރ ޕްރޮސެކިއުޓަރުންނެވެ.
ދަށު ކޯޓްގައި ޔާމީންގެ މައްސަލާގައި އެމަނިކުފާނާ
ދެކޮޅަށް ހުކުމެއް އިއްވަވައިފި ފަނޑިޔާރެއް ވެއްޖިއްޔާ މަތީ ކޯޓަކަށް ޕްރޮމޯޝަން
ލިބޭތަން ފެނެއެވެ. ޔާމީނާ އެއްކޮޅަށް ނިންމައިފިނަމަ އެފަނޑިޔާރެއްގެ މައްސަލަ
ކޮންމެވެސް ގޮތަކުން ބެލެއެވެ. ސުޕްރީމް ކޯޓްގެ ފަނޑިޔާރުގެ ބަތްޕާރު ސަލްގެ
މައްސަލައަކީ މީގެ މިސާލެކެވެ. އެމައްސަލަ ޖޭއެސްސީ ބަލަމުންދިޔުމަށްފަހު އެތައް
ދުވަހެއްވަންދެން ބާއްވާފައި ފަނޑިޔާރު ކްލިއަރކޮށްދިނީ ޔާމީންގެ ކެންޑިޑޭސީއާގުޅޭ
މައްސަލަ ބަލަން ފަނޑިޔާރުންގެ ބެންޗުން ތައްޔާރުވުމުންނެވެ.
މިފަހަރު އެންމެ ބޮޑަށް އަޅައިގަތީ ހައިކޯޓުގެ
ފަނޑިޔާރުންގެ ބެންޗުން އަމަލުކުރި ގޮތުންނެވެ. ރައީސް އަބްދުﷲ ޔާމީނަކީ އިދިކޮޅު
އެންމެ ބޮޑު ސިޔާސީ ޕާޓީގެ ލީޑަރެވެ. ޔާމީނަށް ދިވެހި ރާއްޖޭގައި ވޯޓްލާއުމުރުގެ
އެއްލައްކައަށްވުރެ ގިނަ މީހުންގެ ތާއީދު އޮންނަކަން އެންމެފަހުން ވާދަކުރެއްވި
އިންތިޚާބުން އެނގެއެވެ. އެ އެއްސަތޭކަ ހާސް ދިވެހި ރައްޔިތުން އަބްދުﷲ ޔާމީންގެ
މައްސަލާގައި ހައިކޯޓުން ނިންމާ ނިންމުގެ އިންތިޒާރުގައި ކެތްމަދުވެފައި ތިއްބައި
ފަނޑިޔާރު އާއިލާއާއެކު އެވަޑައިގަތީ ޗުއްޓީއަށެވެ. ފަނޑިޔާރުގެ އަމިއްލަ އުފަލުގެ ކުރިމަތީގައި އެރައްޔިތުންގެ އިހްސާސްތަކަކީ
އަގެއް ހުރިއެއްޗަކަށް ނުވިއެވެ. މިއަށްވުރެ ޣައިރު ޒިންމާދާރު ނިންމުމެއް ފަނޑިޔާރަކު ނިންމަވާނެތޯއެވެ. މިހުރިހާ މަންޒަރެއް ތަމްސީލުވަމުންދިޔައީ ޖުޑިޝަރީގެ އެންމެ މަތީ ކޯޓް ސުޕްރީމް ކޯޓުގެ ކުރިމަތީގައެވެ. އަބްދުﷲ ޔާމީނުގެ ޝަރުތު ހަމަނުވާކަމަށް ސުޕްރީމް
ކޯޓުން ނިންމުމާއެކު ފަނޑިޔާރުގެ ޗުއްޓީ ފުރިހަމަކޮށް ނިންމަވައި ޝަރީއަތުގެ
މަޖިލީހުގައި އެ އިށީނދެވަޑައިގަތީއެވެ.
ރައީސް އަބްދުﷲ ޔާމީންގެ މައްސަލާގައި ސަރުކާރުގެ
ވެރިންނަށް އެތެރެއާއިބޭރުން އޮތް ޕްރެޝަރު ބޮޑުކަން ވަރަށް ގިނަ ދިވެހި
ރައްޔިތުންނަށް ފަހުމް ވެއެވެ. ޕާކިސްތާނުގެ ބޮޑުވަޒީރު އިމްރާން ޚާން ރަޝިޔާއާއި
ޗައިނާއާއި ގާތްވެވަޑައިގަތުމުން އޭނާ މަގާމުން ވަކިނުކޮށްފިނަމަ ޕާކިސްތާން
އެކަހެރިކުރެވޭނެކަމަށް އެމެރިކާއިން ދިން އިންޒާރުތަކަކަށްފަހު ޕާކިސްތާން
ސިފައިންގެ ބާރުން އޭނާ މަގާމުން ވަކިކޮށް ޖަލަށް ލައި އިންތިޚާބުގައި
ވާދަކުރުމުގެ ހައްގުން އެވަނީ މަހްރޫމްކޮށްފައެވެ. ޕާކިސްތާނު ރައްޔިތުންނަށް
އެކަން އެގެއެވެ. އަބްދުﷲ ޔާމީނަކީވެސް އެކަހަލަ މަގާމެއްގައި ހުންނެވި
ބޭފުޅެކެވެ.
ކޮންމެއަކަސް ޑިމޮކްރަސީގައި އަޅުގަނޑުމެންނަށް އަދި
މާކަބޮޑު އުއްމީދުތަކެއް ނެތެވެ. އާ މީހަކު ރައީސްކަމުގެ މަގާމަށްވަޑައިގެން
މިޖެހެނީ ފަނޑިޔާރުގެ މުޅިން ބަދަލުކުރާށެވެ. ފުލުހުންގެ އިސްވެރިންތައް
ވަކިކުރާށެވެ. ސިފައިންގެ ޖެނެރަލުން މަގާމުން ވަކިވާން މަޖްބޫރުކުރުވާށެވެ. ސިވިލް
ސާވިސްއާއި މިނިވަން މުއައްސަސާތަކާ ކުޅެ، އެތަންތަނުގެ މިނިވަންކަން
ނިގުޅައިގަންނާށެވެ. އޭސީސީއަކީ އޭގެ މިސާލެކެވެ. އެޗްއާރްސީއެމަކީވެސް
މިސާލެކެވެ. ދެން ކުރަންޖެހޭ ކަމަކީ ވެރިކަމުން ވަކިވާ މީހާ ހައްޔަރުކޮށް ޖަލަށް
ލާށެވެ. މިކުޅިގަނޑު ހުއްޓޭނެ ދުވަހެއް ދިވެހި ގައުމުން ފެންނަން އެބައޮތް
ހެއްޔެވެ.