ރިޔާސީ އިންތިހާބަށް ކުރިމަތިލުމަށް ބޭނުންވާ ސޮއިގެ އަދަދު ހަމަކުރައްވާފައިވާ ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
އިލެކްޝަންސް ކޮމިޝަން (އީސީ) އިން ބުނެފައިވަނީ ރިޔާސީ އިންތިހާބަށް ކުރިމަތިލާން ފޯމު ހުށަހަޅަންވާނީ މަދުވެގެން 1،500 މީހުންގެ ސޮޔާއެކު ކަމަށެވެ. އަދި ފޯމު ހުށަހަޅާއިރު 100،000 ރުފިޔާގެ ފީއެއް ވެސް އީސީއަށް ދައްކަން ޖެހޭނެ ކަމަށެވެ.
އުމަރު މިއަދު ކުރި ފޭސްބުކް ލައިވްއެއްގައި ވިދާޅުވީ އީސީން ކަނޑައަޅައިފައިވާ އަދަދަށްވުރެ ގިނަ މީހުންގެ ސޮއި އޭނާއަށް ލިބިވަޑައިގެންފައިވާ ކަމަށެވެ.
"އިލެކްޝަންސް ކޮމިޝަނުން ކެންޑިޑޭޓަށް ބޭނުންވާ ސޮއި ހޯދުމަށް އިއުލާންކުރުމާ ގުޅިގެން އަޅުގަނޑުމެން މި ސޮއި ހޯދުމުގެ މަސައްކަތް ފަސް ދުވަސް ކުރިން ފަށައިގެން، ފަސްވަނަ ދުވަސް އައިއިރުގައި އަޅުގަނޑުމެންނަށް މިހާރު ވަނީ ސޮއި ހަމަކުރެވި އަދި އިތުރުކުރެވިފަ. މިހާރު އަޅުގަނޑުމެން 2،000 ސޮއި އަޅުގަނޑުމެން ކަލެކްޓު ކޮށްފިން، އަޅުގަނޑުމެންގެ ވޯ ރޫމަށް،" އުމަރު ވިދާޅުވިއެވެ.
އޭނާ ވިދާޅުވީ ސޮއި ހޯދުމުގެ މަސައްކަތަށް އޭނާއަށް ތާއިދުކުރާ މީހުން ހިލޭ ސާބަހަށް މަސައްކަތްކޮށްދިން ކަމަށެވެ. އަދި ބައެއް ގޭގެ މީހުން މިހާރުވެސް އޭނާގެ ކެންޑިޑަސީ ފޯމުގައި ސޮއިކުރަން ބޭނުންވާތީ ގުޅަމުންދާ ކަމަށެވެ.
މިއަހަރު ބާއްވާ ރިޔާސީ އިންތިހާބު ކާމިޔާބުކުރައްވާނެ ކަމަށާއި ވަރަށް ގިނަ ބަޔަކު ތިބީ "ހުދު ވަލުގައި" ހިފައިގެން ކަމަށް އުމަރު ވިދާޅުވިއެވެ.
އުމަރު ވިދާޅުވީ އޭނާ ކުރިއަށްގެންދާ ކެމްޕޭނަކީ ރައީސުލްޖުމްހޫރިއްޔާ ބަދަލުކުރަން ކުރާ ކެމްޕޭނެއް ނޫން ކަމަށާއި އެ ކެމްޕޭނަކީ މި ގައުމު އާ މިސްރާބަކަށް ބަދަލުކުރުމަށް ކުރިއަށްގެންދާ ކެމްޕޭނަށް ކަމަށެވެ. އަދި އޭނާއަށް ތާއީދުކުރާ ބައެއް ފަރާތްތަކަށް ކެމްޕޭނުގައި މަސައްކަތް ނުކުރެވޭނީ ވަޒީފާގެ ބިރު އޮތުމުން ކަމަށް އުމަރު ވިދާޅުވިއެވެ.
އުމަރު އޭނާގެ ރިޔާސީ ކެމްޕޭން ލޯންޗުކުރެއްވީ މިއަހަރުގެ ފެބްރުއަރީ މަހުގެ ހަތަރުވަނަ ދުވަހުގެ ރޭ ސަލްޓަން ޕާކުގައި ބޭއްވި ޖަލްސާއެއްގައެވެ. އެ ޖަލްސާގައި ވާހަކަދައްކަވަމުން އުމަރު ވިދާޅުވެފައިވަނީ ރައްޔިތުން ވަނީ އެންމެ ބޮޑު ދެ ޕާޓީއަށް ފުރުސަތު ދީފައި ކަމަށާއި ނަމަވެސް ރައްޔިތުންނަށް އެކަމުން ފައިދާއެއް ނުވެ، އެ ޕާޓީތައް ފެއިލްވެފައިވާ ކަމަށެވެ. އަދި ވިދާޅުވީ އޭނާ ރިޔާސީ އިންތިހާބުގައި ވާދަކުރައްވަން ނިންމެވީ ރައްޔިތުން އާ މިސްރާބަކަށް ގެންދިއުމަށްޓަކައި ކަމަށެވެ.
އުމަރު ވިދާޅުވީ އެ މިސްރާބަކީ 2045 ވަނަ އަހަރު އަންނަ އިރު، ރާއްޖެއަކީ ތަރައްގީވެފައިވާ ގައުމަކަށް ބަދަލުކުރުން ކަމަށެވެ. ވެރިކަމުގައި އޭނާގެ ޒިންމާއަކީ އިޖުތިމާއީ އަދި އިގުތިސޯދީ މައްސަލަތައް ހައްލުކޮށްދެއްވައި އިގުތިސޯދު ޑައިވާސިފައިކުރައްވައި، ދިގު މުއްދަތުގެ ތަރައްގީގެ މަޝްރޫއުތައް ފެށޭނެ އިންތިޒާމު ހަމަޖައްސައިދެއްވުން ކަމަށެވެ.
ސިންގަޕޫރާއި ރާއްޖެއަށް މިނިވަންކަން ލިބުނީ ދާދި އެއް ދުވަސްވަރެއްގައި ކަމަށާއި އެއިރު ރާއްޖެ އޮތީ އިގުތިސޯދީ ގޮތުން މާކުރީގައި ކަމަށެވެ. ނަމަވެސް މިހާރު ރާއްޖެ މިވަނީ ފަހަތަށް ސޮއްސާލާފައި ކަމަށްވެސް އުމަރު ވިދާޅުވިއެވެ.
"އަޅުގަނޑުމެންނަށް އަރައިގެން ނުދެވުނީ ކީއްވެގެންތޯ ކުޑަކޮށް ބައްލަވާ. ފުރަތަމަ ކަމަކީ ސިންގަޕޫރުގައި ގާނޫނު ތަންފީޒު ކުރާނެ. ގާނޫނުތަކާ ދޭތެރޭގައި ކުޅޭކުޅޭއެއް ނޯންނާނެ. ދެވަނަ ކަމަކީ ކޮރަޕްޝަން ފުނޑުފުނޑު ކޮށްލާނެ ދައުލަތުގެ ވެރިންނަށް ކޮރަޕްޓެއް ނުވެވޭނެ. ތިންވަނަ ކަމަކީ ދައުލަތުން ހަރަދުކުރާނެ އިންސާނީ ވަސީލަތްތައް ތަރައްގީކުރަން ހަރަދުކުރަމުން ގެންދާނެ،" އުމަރު ވިދާޅުވިއެވެ.
ރާއްޖެއިން ހަރަދުތައް ކުރަމުން ގެންދިޔައީ ސިޔާސީ ގޮތުން ވޯޓު ހޯދަން ކަމަށާއި ރަށްރަށުގެ ބިން ހިއްކާ އިރު، އެ ބިމުގައި 20 އަހަރުވާ އިރުވެސް މަސައްކަތެއް ނުފެށޭ ކަމަށް އުމަރު ވިދާޅުވިއެވެ.