އިންޑިއާގައި ކައްކާ ގޭސް ނުވަތަ އެލްޕީޖީ ލިބުމުގައި ބޮޑު ދަތިތަކަކާ ކުރިމަތިވެ، ގޭބިސީތަކަށާއި ވިޔަފާރިތަކަށް އޭގެ ނޭދެވޭ އަސަރު ވަރަށް ބޮޑަށް ކުރަން ފަށައިފިއެވެ. މި މަސް ތެރޭގައި މި މައްސަލަ އިތުރަށް ގޯސްވެ، ގޭސް ހޯދުމަށް އާންމުން ދިގު ކިޔޫތަކުގައި ތިބެން ޖެހިފައިވާއިރު، ގޭސް އެޖެންސީތަކަށް އޮންނަ ޑިމާންޑު ވަނީ އިންތިހާއަށް ބޮޑުވެފައެވެ. އިންޑިއާގެ ޕެޓްރޯލިއަމް އެންޑް ނެޗުރަލް ގޭސް މިނިސްޓްރީގެ ތަފާސްހިސާބުތައް ދައްކާގޮތުން، އާންމުކޮށް ދުވާލެއްގެ މައްޗަށް 5.5 މިލިއަން ގޭސް ފުޅި ބުކްކުރާއިރު، މިހާރު އެ އަދަދު ވަނީ 7.6 މިލިއަނަށް އަރާފައެވެ. މިއީ ރައްޔިތުންގެ މެދުގައި އުފެދިފައިވާ ބިރުވެރިކަމުގެ ސަބަބުން އިތުރުވެފައިވާ އަދަދެކެވެ. އެ ގައުމުގެ ސަރުކާރުގެ އިސް އޮފިޝަލުން ވަނީ މިއީ "ކަންބޮޑުވާންޖެހޭ" ހާލަތެއް ކަމަށް އެއްބަސްވެފައެވެ. ގޭސް ލިބުމުގެ ދަތިކަމާ އެކު، އާންމު ރައްޔިތުންގެ ދިރިއުޅުމުގެ ޚަރަދުތައް ބޮޑުވެ، ކޮންމެ ދުވަހަކު ކައްކައިގެން ކެއުމަކީ ވެސް މިހާރު އިންޑިއާގެ އެތައް މިލިއަން އާއިލާއަކަށް ކުރިމަތިވެފައިވާ ވަރަށް ބޮޑު ގޮންޖެހުމެކެވެ. މި ތަދުމަޑުކަމުގެ މައިގަނޑު ސަބަބަކީ މެދުއިރުމަތީގައި އުފެދިފައިވާ ހަމަނުޖެހުންތަކާ ގުޅިގެން، ދުނިޔޭގެ ހަކަތައިގެ ސަޕްލައިއަށް އައިސްފައިވާ ބޮޑު ލޮޅުމެވެ. ޚާއްސަކޮށް އެމެރިކާއާއި އިސްރާއީލުން އީރާނާ ދެކޮޅަށް ފަށާފައިވާ ހަނގުރާމައިގެ ސަބަބުން، ހޮރުމޫޒު ކަނޑުއޮޅި ހުރަސްކޮށް ކުރާ ދަތުރުތަކަށް ވަނީ ވަރަށް ބޮޑަށް ހުރަސްއެޅިފައެވެ. އިންޑިއާއަކީ އެ ގައުމަށް ބޭނުންވާ އެލްޕީޖީގެ 60 އިންސައްތަ އިމްޕޯޓުކުރާ ގައުމެކެވެ. މީގެ ތެރެއިން، 90 އިންސައްތަ ގޭސް އިންޑިއާއަށް އެތެރެކުރަނީ ހޮރުމޫޒު ކަނޑުއޮޅި ހުރަސްކޮށެވެ. އެހެންކަމުން، މި ކަނޑުއޮޅީގެ ދަތުރުފަތުރަށް އަންނަ ކޮންމެ ހުއްޓުމަކީ އިންޑިއާގެ ހަކަތައިގެ ސަލާމަތަށް އޮތް ވަރަށް ބޮޑު ނުރައްކަލެކެވެ. މިހާރު ވެސް ގޭސް އުފުލާ ބޯޓުފަހަރު ދަތުރުކުރުން މަޑުޖެހިފައިވުމުން، އިންޑިއާގެ ބަނދަރުތަކަށް ގޭސް ގެނައުން ވަނީ ވަރަށް ބޮޑަށް ލަސްވެފައެވެ. މީގެ ސަބަބުން ގައުމުގެ އެތެރޭގެ ރިޒާވްތަކަށް ބާރުބޮޑުވެ، ސަޕްލައި ޗެއިން ވަނީ އެއްކޮށް ރޫޅިފައެވެ. މީގެ އިތުރުން، އިންޝުއަރެންސް ކުންފުނިތަކުން ނަގާ ފީތައް ބޮޑުވުމާއި، ބޯޓުފަހަރު ކުއްޔަށް ހިފުމުގެ އަގު އުފުލުމަކީ ވެސް އިންޑިއާއަށް ގޭސް އެތެރެކުރުމުގައި ދިމާވެފައިވާ އިތުރު ހުރަހެކެވެ. ގޭސް ނުލިބުމުގެ މައްސަލަ އިންޑިއާގެ އެކި ކަންކޮޅުތަކުން މިހާރު ދަނީ ފެންނަމުންނެވެ. ގޭބިސީތަކަށް ގޭސްފުޅި އާކުރުމުގައި ހަފުތާތަކެއް ވަންދެން މަޑުކުރަން ޖެހިފައިވާއިރު، ގިނަ ބަޔަކު ވަނީ އަލުން ދަރު އުނދުންތަކަށާއި ބޯޓުދެލި ބޭނުންކޮށްގެން ކެއްކުމަށް ރުޖޫއަވެފައެވެ. ވިޔަފާރިތަކަށް، ޚާއްޞަކޮށް ރެސްޓޯރެންޓުތަކާއި ހޮޓާތަކަށް މީގެ އަސަރު ވަރަށް ބޮޑެވެ. ބޯޕާލް ފަދަ ސިޓީތަކުގައި މަގުމަތީގައި ކާތަކެތި ވިއްކާ މީހުންގެ 40 އިންސައްތަ ވިޔަފާރި ވަނީ ހުއްޓުމަކަށް އައިސްފައެވެ. އަދި، ބައެއް ބޮޑެތި ރެސްޓޯރެންޓުތަކުން ވަނީ ވަގުތީގޮތުން ޚިދުމަތް ދިނުން ހުއްޓާލާފައެވެ. މީގެ އިތުރުން، ގޭސް ލިބުން ދަތިވުމާ އެކު ކަޅު ބާޒާރުގައި ގޭސް ވިއްކުމާއި، ގޭސް ފޮރުވައިގެން ގެންގުޅުމުގެ މައްސަލަތައް ވަނީ އިތުރުވެފައެވެ. ފަރީދާބާދު ފަދަ ސަރަހައްދުތަކުގައި ގޭސް ވަގަށް ނަގައިގެން ވިއްކި މައްސަލަތަކެއްގައި ވެސް ފެންމަތިވިއެވެ. ކަމާބެހޭ ފަރާތްތަކުން ދަނީ މިފަދަ އަމަލުތައް ހުއްޓުވުމަށް ހަރުކަށި ފިޔަވަޅުތައް އަޅަމުންނެވެ. އެހެންނަމަވެސް، ޑިމާންޑާ އެއްވަރަށް ސަޕްލައި ނުކުރެވޭތީ، ގަވާއިދާ ޚިލާފަށް ގޭސް ވިއްކާ ފަރާތްތަކުން ދަނީ އާންމުންގެ އަތުން ބޮޑެތި އަދަދުތަކުން ފައިސާ ނަގަމުންނެވެ. މި ކާރިސާއިން އަރައިގަތުމަށް އިންޑިއާ ސަރުކާރުން އަންނަނީ ކުއްލި ފިޔަވަޅުތަކެއް އަޅަމުންނެވެ. މިގޮތުން، ގައުމުގެ އެތެރޭގައި ގޭސް އުފައްދާ މިންވަރު އިތުރުކުރުމަށް ރިފައިނަރީތަކަށް ވަނީ އަންގާފައެވެ. މި އެންގުމާ އެކު، އެތެރޭގެ އުފެއްދުންތެރިކަން ވަނީ 25 އިންސައްތައާއި 36 އިންސައްތައާ ދެމެދުގެ މިންވަރަކަށް އިތުރުކޮށްފައެވެ. އަދި، ވިޔަފާރިތަކަށް ދޫކުރާ ގޭހުގެ މިންވަރު 20 އިންސައްތައަށް މަދުކޮށް، އާންމު ގޭބިސީތަކަށް ގޭސް ފޯރުކޮށްދިނުމަށް ވަނީ އިސްކަންދީފައެވެ. ދިގު މުއްދަތުގެ ހައްލެއްގެ ގޮތުން، ހޮޅި މެދުވެރިކޮށް ގޭސް ފޯރުކޮށްދޭ ނިޒާމު (ޕީއެންޖީ) ބޭނުންކުރުމަށް ސަރުކާރުން ދަނީ ބާރުއަޅަމުންނެވެ. ޕެޓްރޯލިއަމް މިނިސްޓްރީން ވަނީ ހަ މިލިއަން ގޭބިސީއަކަށް ޕީއެންޖީއަށް ބަދަލުވުމަށް އިލްތިމާސްކޮށް، އިންދްރަޕްރަސްތާ ގޭސް އަދި މަހާނަގަރް ގޭސް ފަދަ ކުންފުނިތައް މެދުވެރިކޮށް ރަޖިސްޓްރޭޝަން ފީތައް ވެސް މާފުކޮށްދީފައެވެ. މީގެ އިތުރުން، އެމެރިކާ، ނޯވޭ އަދި ރަޝިއާ ފަދަ ގައުމުތަކުން ގޭސް އެތެރެކުރުމަށް އެއްބަސްވުންތައް ހަދައި، މެދުއިރުމައްޗަށް ބަރޯސާވާ މިންވަރު ކުޑަކުރުމުގެ މަސައްކަތް ވެސް ވަނީ ފަށާފައެވެ. ކައްކާ ގޭހަކީ އިންޑިއާގެ އެތައް މިލިއަން ރައްޔިތުންނެއްގެ ދުވަހުގެ ދިރިއުޅުމާ ގުޅިފައިވާ އެންމެ އަސާސީ އެއް ބޭނުމެވެ. ނަމަވެސް، މިހާރު ކުރިމަތިވެފައިވާ ތަދުމަޑުކަމާ އެކު، މިއީ އިންޑިއާގެ ރައްޔިތުންނަށް ދިރިއުޅުމުގެ ޚަރަދުތައް ހަމަޖެއްސުމުގައި ކުރިމަތިވެފައިވާ އެންމެ ބޮޑު އެއް ގޮންޖެހުމެވެ. ސަރުކާރުން އަޅަމުންދާ ފިޔަވަޅުތަކާ އެކު ވެސް، ބައިނަލްއަގުވާމީ މަސްރަހު ފިނި ނުވާހާ ހިނދަކު މި މައްސަލައަށް ދާއިމީ ހައްލެއް ލިބުމަކީ ނާދިރު ކަމެކެވެ. ކުރިއަށް އޮތް މަސްތަކުގައި ވެސް ގޭހުގެ އަގުތައް އުފުލި، އާންމުންނަށް މިކަމުގެ ތަކުލީފުތައް އުފުލަން ޖެހޭނެކަމަށް އިގުތިސާދީ މާހިރުން ލަފާކުރެއެވެ. މި ވަގުތު އިންޑިއާގެ ރައްޔިތުން ތިބީ، ސަރުކާރުން ގެންނަން އުޅޭ ޕީއެންޖީ ނެޓްވޯކް ފުޅާކުރުމުގެ މަސައްކަތް ނިމޭނެ ތާރީޚެއްގެ އިންތިޒާރުގައެވެ.