ރާއްޖެއަށް އަންނަ އާގުބޯޓުފަހަރަށް މިއަދުން ފެށިގެން 24 ގަޑިއިރު ޕޯޓް ލިމިޓު ސަރަހައްދަށް ވަދެވޭ ގޮތަށް ހުޅުވާލައިފި އެވެ.
ވީ ކިހިނެއް؟ - ނޮވެމްބަރު 1988 އިން ފެށިގެން އަމަލުކުރަމުން އައި އުސޫލުގެ ދަށުން ރޭގަނޑު 12ގެ ފަހުން މާލޭ ވިޔަފާރި ބަނދަރަށް އަންނަ ބައިނަލްއަގްވާމީ އުޅަނދުފަހަރަށް ހެނދުނު 6 ޖެހުމުގެ ކުރިން ޕޯޓް ލިމިޓު ސަރަހައްދަށް ނުވަދެވެ އެވެ.
ބުނީ ކީކޭ؟ - އެކަމާ ގުޅޭ ގޮތުން ޓްރާންސްޕޯޓް މިނިސްޓަރު މުހައްމަދު އަމީން އިއްޔެ ވިދާޅުވީ އެއީ 1988 ވަނަ އަހަރުން ފެށިގެން އަމަލުކުރަމުން އައި އުސޫލު ބަދަލުކޮށް، އިގްތިސާދީ ގޮތުން އެޅި މުހިންމު ފިޔަވަޅެއް ކަމަށެވެ.
"މި ބަދަލާ އެކު ކުރިން ވެސް އުޅަނދުފަހަރަށް ދެމުން އައި ކްލިއަރެންސް ދިނުމާއި ޕައިލޮޓޭޖުގެ ހިދުމަތް ދިނުމުގެ ކަންކަން ވެސް 24 ގަޑިއިރު ހިނގަމުންދާނެ،" އަމީން 'އެކްސް'ގައި ކުރެއްވި ޕޯސްޓެއްގައި ވިދާޅުވި އެވެ.
ތަފްސީލު - ޓްރާންސްޕޯޓް މިނިސްޓްރީން ނެރުނު ބަޔާނެއްގައި ބުނި ގޮތުގައި، އެ ގޮތަށް ބަދަލު ގެންނަން ނިންމީ ރާއްޖެއަށް އަންނަ އުޅަނދުފަހަރު އިތުރުވަމުން އަންނާތީ، ގައުމުގެ އިގްތިސާދަށް ފައިދާވާ ގޮތަށް، ކޮންމެ ވަގުތެއްގައި ވެސް ބަނދަރަށް ވަދެވޭނެ އިންތިޒާމުތައް ގާއިމުކުރުމަށެވެ.
މިނިސްޓްރީން ބުނި ގޮތުގައި، އެ ބަދަލާ އެކު:
އުޅަނދުފަހަރުގެ ރައްކާތެރިކަން ކަށަވަރުކުރުމާއި އިންޓަނޭޝަނަލް ޝިޕް އެންޑް ޕޯޓް ފެސިލިޓީ ސެކިއުރިޓީ ކޯޑުގެ މިންގަނޑުތަކާ އެއްގޮތަށް ދޭންޖެހޭ ހުއްދަތަކާއި ޕައިލޮޓޭޖުގެ ހިދުމަތްތައް މެދުނުކެނޑި ލިބޭނެ
ބޭރުގައި މަޑުކުރަން ޖެހުމުގެ ސަބަބުން ހިނގާ އިތުރު ހަރަދުތަކާއި ވަގުތު ސަލާމަތް ކުރެވޭނެ
މިނިސްޓްރީން ބުނީ އެ ނިންމުމަކީ ރާއްޖެއަށް އަންނަ އުޅަނދުފަހަރުގެ އަދަދު އިތުރުވުމަށް މަގުފަހިކޮށްދީ، މާލޭގެ ވިޔަފާރި ބަނދަރަކީ ބައިނަލްއަގްވާމީ ފެންވަރުގެ އިތުބާރު ހުރި ތަނަކަށް ހަދަން އެޅި މުހިންމު ފިޔަވަޅެއް ކަމަށެވެ.