ސްްރީލަންކާގެ ދެކުނު ކަނޑުގެ ސަރަހައްދުގައި ހިންގި ޚާއްސަ ޖޮއިންޓް އޮޕަރޭޝަނެއްގައި، 296 ކިލޯއަށްވުރެ ގިނަ މަސްތުވާތަކެތި ސްރީލަންކާގެ ނޭވީ އާއި ފުލުހުން ގުޅިގެން އަތުލައިގަނެފިއެވެ. މި އޮޕަރޭޝަނުގައި 11 މީހަކު ވަނީ ހައްޔަރުކޮށްފައެވެ. އަތުލައިގަތް ތަކެތީގެ ތެރޭގައި ހިމެނެނީ 184 ކިލޯއަށްވުރެ ގިނަ ހެރޮއިން އާއި 112 ކިލޯއަށްވުރެ ގިނަ 'އައިސް' (ކްރިސްޓަލް މެތައެމްފެޓަމިން) އެވެ. މި ތަކެތީގެ ބާޒާރުގެ އަގު 4.5 ބިލިއަން ލަންކާ ރުޕީސްއަށް ވުރެ މައްޗަށް އަރާނެ ކަމަށް ކަމާބެހޭ ފަރާތްތަކުން ލަފާކުރެއެވެ. https://sun.mv/213488 މި ތަކެތި ފެނިފައިވަނީ މަސް ބާނާ ދެ ޓްރޯލަރެއްގެ ތެރޭގައި 14 ގޯންޏެއްގައި ފޮރުވާފައި ހުއްޓައެވެ. "އޭ ނޭޝަން ޔުނައިޓެޑް" (އެއްބައިވަންތަ ގައުމެއް) ނަމަކަށް ކިޔާ ގައުމީ މިޝަނެއްގެ ދަށުން ހިންގި މި އޮޕަރޭޝަނަކީ ނޭވީ އާއި ފުލުހުންގެ އިންޓެލިޖެންސް މައުލޫމާތަށް ބިނާކޮށް ހިންގި އޮޕަރޭޝަނެކެވެ. މި އޮޕަރޭޝަނުގައި ނޭވީން ފުރަތަމަ ހިފެހެއްޓި އުޅަނދުން ފަސް މީހަކު ހައްޔަރުކުރިއިރު، އެ ސަރަހައްދުން ފެނުނު ދެވަނަ އުޅަނދުން އިތުރު ހަ މީހަކު ވަނީ ހައްޔަރުކޮށްފައެވެ. މި އުޅަނދުތަކާއި، މަސްތުވާތަކެއްޗާއި، ހައްޔަރުކުރި މީހުން އިއްޔެ ހެނދުނު ވަނީ ޑިކޮވިޓާ ފިޝަރީޒް ހާބަރަށް ގެންގޮސްފައެވެ. އަތުލައިގަތް ތަކެތި ބައްލަވާލެއްވުމަށް ޑިފެންސް ސްޓޭޓް މިނިސްޓަރު މޭޖާ ޖެނެރަލް (ރިޓަޔާޑް) އަރުނަ ޖަޔަސޭކަރަ އާއި، ނޭވީ ކޮމާންޑަރު ވައިސް އެޑްމިރަލް ކަންޗަނާ ބަނަގޮޑާގެ އިތުރުން އައިޖީޕީ ޕްރިޔަންތަ ވީރަސޫރިޔާ ވަނީ އެ ބަނދަރަށް ވަޑައިގެންފައެވެ. މީޑިއާއާ ވާހަކަދައްކަވަމުން ޑިފެންސް ސްޓޭޓް މިނިސްޓަރު ވިދާޅުވީ، ލަންކާ ރައީސްގެ އިރުޝާދުގެ ދަށުން މަސްތުވާތަކެއްޗާ ދެކޮޅަށް ހިންގާ މިފަދަ އޮޕަރޭޝަންތަކަކީ ގައުމީ ފެންވަރުގައި ވަރަށް އިސްކަމެއްދީގެން ކުރިއަށްގެންދާ މަސައްކަތްތަކެއް ކަމަށެވެ. އަދި މަސްވެރިކަމުގެ ނަމުގައި ފޮރުވިގެން ތިބެ މަސްތުވާތަކެތީގެ ވިޔަފާރިކުރާ މީހުންނަށް ސަލާމަތްނުވެވޭނެ ކަމުގެ އިންޒާރުވެސް އޭނާ ދެއްވިއެވެ. މި މައްސަލަ އިތުރަށް ތަހުގީގު ކުރުމަށްޓަކައި، އަތުލައިގަތް ތަކެއްޗާއި ހައްޔަރުކުރި 11 މީހުން މިހާރު ވަނީ ޕޮލިސް ނާކޮޓިކްސް ބިއުރޯއާ ހަވާލުކޮށްފައެވެ. ސްރީލަންކާއަކީ އިންޑިއާ ކަނޑުގެ ސަރަހައްދުގައި ފުޅާދާއިރާއެއްގައި މަސްތުވާތަކެތީގެ ވިޔަފާރިކުރާ ފަރާތްތަކުން ބޭނުންކުރާ މައިގަނޑު އެއް "ޓްރާންސިޓް ޕޮއިންޓް" އަށް ވާއިރު، ފަހަކަށް އައިސް އެ ގައުމުގެ ކަނޑުގެ ސަރަހައްދުން މަސްތުވާތަކެތި އަތުލައިގަންނަ މިންވަރު ވަނީ ވަރަށް ބޮޑަށް އިތުރުވެފައެވެ. ޚާއްސަކޮށް، މަސްވެރި އުޅަނދުފަހަރު ބޭނުންކޮށްގެން ސަރަހައްދީ ގައުމުތަކަށް މަސްތުވާތަކެތި އެތެރެކުރުމާއި ފަތުރުވާ މައްސަލަ ހައްލުކުރުމަށް ލަންކާގެ ސަލާމަތީ ބާރުތަކުން އަންނަނީ "ޔުކްތިޔާ" ފަދަ ޚާއްސަ ގައުމީ މިޝަންތަކުގެ ދަށުން ވަރުގަދަ އޮޕަރޭޝަންތަކެއް ހިންގަމުންނެވެ. މިގޮތުން ހިންގާ އޮޕަރޭޝަންތަކުގައި މިދިޔަ އަހަރުގެ ތެރޭގައިވެސް އެތައް ބިލިއަން ރުޕީސްއެއްގެ މަސްތުވާތަކެތި އަތުލައިގަނެ، ބައިނަލްއަގުވާމީ ޑްރަގް ނެޓްވޯކްތަކަށް ބޮޑެތި ލޮޅުންތަކެއް ވަނީ އަރުވާލާފައެވެ.