ރާއްޖެ އިގްތިސާދީ ގޮތުން މިހާރު މިއޮތް ހާލަތަށް ވެއްޓެން ޖެހުނީ ކުރީގެ ތިން ސަރުކާރުގެ ވެރިކަމުގައި އެކި ނަންނަމުގައި ދަރަނި ނަގައި އަދި ބޮންޑު ވިއްކައިގެން ކަމަށް ޖުމްހޫރީ ޕާޓީގެ ލީޑަރު އަދި މާމިގިލި ދާއިރާގެ މެންބަރު ގާސިމް އިބްރާހިމް މިއަދު ވިދާޅުވެއްޖެއެވެ.
މިއަދު މެންދުރު ފަހު މަޖިލީހުގައި ބޭއްވި ނޫސްވެރިންގެ ބައްދަލުވުމެއްގައި ގާސިމް ވިދާޅުވީ، ގައުމު މިއަދު ވެއްޓިފައިވާ ހާލަތު ބަޔާންކުރަނީ ވަކި ބޭފުޅަކަށް ތާއީދުކޮށް ވަކި ބޭފުޅަކަށް އެއްޗެއް ކިޔުމުގެ ނިޔަތުގައި ނޫން ކަމަށާއި ބޭނުންވެވަޑައިގަންނަވަނީ ގައުމުގެ މަސްލަހަތާއި އަމާންކަމާއި ގައުމުގެ ކުރިއެރުން ކަމަށެވެ. އެ އަޒުމުގައި ގާސިމް މަސައްކަތް ފެއްޓެވީ 1984 ވަނަ އަހަރު ކަމަށާއި އެދުވަހުން ފެށިގެން މިއަދާ ހަމައަށް ސަރުކާރު ތެރެއިންނާއި ސަރުކާރު ބޭރުން އެކި ދާއިރާތަކުގައި މަސައްކަތް ކުރެއްވި ކަމަށް ގާސިމް ވިދާޅުވިއެވެ.
ކޮންމެ ވެރިއަކު ވެސް ވެރިކަމަށް ވަޑައިގަންނަވަނީ ވައުދުތަކެއް ވެވަޑައިގެން އެ ވައުދުތައް ފުއްދެވުމަށް ކަމަށާއި އެކަން ކެމޕްެއިންގައި ދައްކަވާ ވާހަކަތަކުން އެނގިވަޑައިގަންނަވާ ކަމަށް ގާސިމް ވިދާޅުވިއެވެ. ނަމަވެސް ވެރިކަމާ ހަވާލުވެވަޑަިއގަތުމަށްފަހު ކޮންމެ ބޭފުލަކުވެސް ވެވަޑައިގެން ވައުދުތައް ތަފާތުވެ ބަދަލުވަމުން އަންނަ ކަމަކީ ފެނިވަޑައިގެން ކަމެއްގެ ގޮތުގައި ގާސިމް ވިދާޅުވިއެވެ.
މިއަދު އިގްތިސޯދީ ގޮތުން، އިޖްތިމާއި ގޮތުން އަދި ސިޔާސީ ގޮތުން ސަރުކާރުތަކުގައި ތިއްބެވި ވެރިންގެ އަތްޕުޅުގައި ބޮޑެތި ޒިންމާތަކެއް އޮތް ކަމަށް ގާސިމް ވިދާޅުވިއެވެ. އެގޮތުން މިއަދު ގައުމު މިއޮތީ ވަރަށް ނިކަމެތި ހާލަތެއްގައި ކަމަށާއި ގައުމު މިއޮތް އަނދަވަޅުން ސަލާމަތް ކުރުމަށްޓަކައި މި ސަރުކާރުން ވަރަށް ރަނގަޅު ފިޔަވަޅުތަކެއް އަޅުއްވަމުން ގެންދަވާ ކަމަށް ގާސިމް ވިދާޅުވިއެވެ. އަދި މިހާރު އޮތް ހާލަތަށް ގައުމު އަންނަން ޖެހުނީ ކުރީގެ ސަރުކާރުތަކުގެ އިހުމާލުން ކަމަށް އޭނާ ވިދާޅުވިއެވެ.
އެގޮތުން ގައުމު މިހާލަތަށް އައީ ރައީސް މައުމޫން އަބްދުލްގައްޔޫމްގެ ވެރިކަމުގައި ނޫން ކަން ވަރަށް ސާފު ކަމަށާއި އެއީ 2008 ވަނަ އަހަރު އައި ސަރުކާރާއި 2013 ވަނަ އަހަރު އައި ސަރުކާރާއި 2018 ވަނަ އަހަރު އައި ސަރުކާރުތަކުން ކުރައްވާފައިވާ ކަންތައްތަކުގެ ނަތީޖާ ކަމަށް ގާސިމް ވިދާޅުވިއެވެ. އެ ތިން ވެރިކަމުގައި އެކި ނަންނަމުގައި ދަރަނި ނަގައި އަދި ބޮންޑު ވިއްކައިގެން 126 ބިލިއަން ރުފިޔާއިން ދަރަނިވެރިކޮށްފައިވާ ކަމަށް ގާސިމް ވިދާޅުވިއެވެ.
ސަރުކާރުތަކުން ރައްޔިތުންގެ ފައިސާއަށް ހިޔާނާތްތެރިވާ ވާހަކައަކީ އަބަދުވެސް އިވޭ ވާހަކައެއް ކަމަށާއި ނަމަވެސް މި ސަރުކާރުން ފެނިގެންދަނީ އެކަންކަން ހުއްޓުވަން ގިނަ ފިޔަވަޅުތަކެއް އަޅާ މަންޒަރު ކަމަށް ގާސިމް ވިދާޅުވިއެވެ. މި ސަރުކާރުން ވެރިކަމާ ހަވާލުވިއިރު ވެސް އާސަންދަ އާއި އެންސްޕާގެ ބިލުތަކަށް އެކަނި ވެސް ބިލިއަނަކަށް ވުރެ ގިނަ ރުފިޔާ ނުދައްކާ ހުރި ކަމަށް ގާސިމް ވިދާޅުވިއެވެ. މި ސަރުކާރުން ކުންފުނިތަކުގެ މެނޭޖިން ޑިރެކްޓަރުންނާއި އެ ނޫން ވެސް މިނިސްޓަރުންނާއި ބޭބޭފުޅުން ވެސް ވަކި ކުރައްވައި ކަންތައްތައް ރަނގަޅު މަގަށް ގެންދިއުމަށް ކުރައްވާ ކަން ގާސިމް ފާހަގަކުރެއްވިއެވެ.