"ހަވީރު" ނޫހުގެ އޮފީހުގައި ރޭ ދަންވަރު ބަޔަކު ރޯކޮށްލައިފިއެވެ. އަމީނީ މަގުގައި ހުންނަ އެ ނޫހުގެ އޮފީހުގައި ރޯކޮށްލާފައިވަނީ ދަންވަރު ދެ ގަޑި ބައިކަން ހާއިރުކަމަށް މައުލޫމާތު ލިބެއެވެ.
މައުލޫމާތު ލިބިފައިވާގޮތުގައި ރޯކޮށްލާފައިވަނީ ހަވީރު އޮފީހުގެ ރިސެޕްޝަނުގައެވެ. ރިސެޕްޝަން އަނދާ، އެ ތަނުގައި ހުރި ބައެއް ތަކެތި ބޭނުންނުކުރެވޭ ވަރަށް ހަލާކުވެފައިވީ ނަމަވެސް ސިފައިންނާއި ފުލުހުންގެ މަސައްކަތުން އަލިފާންގަނޑު ފެތުރުމުގެ ކުރިންވަނީ ނިއްވާލާފައެވެ.
މި ހަމަލާ ދިންކަމަށް ތުހުމަތު ކުރެވޭ މީހާ އެ ސަރަޙައްދުން ފިލާފައިވާކަމަށް ބެލެވޭއިރު ހަމަލާ ދިން މީހާ ގެންގުޅުނުކަމަށް ތުހުމަތު ކުރެވޭ ދަބަހެއްވަނީ އެ ސަރަޙައްދުން ފެނިފައެވެ.
މީގެކުރިންވެސް ރާއްޖޭގެ އެކި މީޑިޔާ ސްޓޭޝަންތަކުގައި އަލިފާން ރޯކޮށްލާފައިވެއެވެ.