މާލޭގައިވެސް ކޮވިޑް-19އާ ދެކޮޅަށް މިހާރުން މިހާރަށް ފިޔަވަޅު އަޅަންޖެހޭ ކަމަށް ކުރީގެ ރައީސް މައުމޫން އަބްދުލްގައްޔޫމް ވިދާޅުވެއްޖެއެވެ.
ރައީސް މައުމޫން އެގޮތަށް ގޮވާލެއްވީ މިއަދު ރާއްޖޭގައި ރެކޯޑު އަދަދަކަށް މީހުން ކޮވިޑް-19 އަށް ޕޮޒިޓިވްވުމުން ކުރެއްވި ޓުވީޓެއްގައެވެ. އެގޮތުން މިދިޔަ 24 ގަޑިއިރުގެ ތެރޭގައި (އިއްޔެ ހަވީރު 6:00 އިން މިއަދު ހަވީރު 6:00 އަށް) މާލެއިން ވަނީ 508 މީހަކު ޕޮޒިޓިވްވެފައެވެ.
ރައީސް އޮފީހާއި ހެލްތު ޕްރޮޓެކްޝަން އެޖެންސީ ޓެގު ކުރައްވައި ރައީސް މައުމޫން ކުރެއްވި ޓުވީޓުގައި ވިދާޅުވީ، ރަށްރަށަށް ދަތުރު ކުރުން މަނާ ކުރުން އެއީ ކޮވިޑް-19 ކޮންޓްރޯލު ކުރަން ކޮންމެހެން ކުރަންޖެހޭ ކަމެއް ކަމަށެވެ.
“މާލޭގައި ވެސް ލަސްނުކޮށް ހަރުދަނާ ފިޔަވަޅުތަކެއް މިހާރުން މިހާރަށް އަޅަން ޖެހޭ. ނޫނީ މާ ލަސްވެދާނެ،“ ރައީސް މައުމޫން ވިދާޅުވިއެވެ.
ރަށްރަށަށް ދަތުރު ކުރުން މަނާކުރުމަށް ރައީސް މައުމޫން ގޮވާލެއްވި އިރު، އެޗްޕީއޭ އިން މިއަދު ވަނީ އަންނަ އަންގާރަ ދުވަހުން ފެށިގެން އެއް ހަފުތާގެ މުއްދަތަށް މާލެ ސަރަހައްދު ފިޔަވައި އެހެން ރަށްރަށަށް ދަތުރުކުރުމުގައި ބައެއް ފިޔަވަޅުތައް އަޅަން ނިންމައިފައެވެ.
އެގޮތުން ޒަރޫރީ ބޭނުންތަކަށާއި ސިއްހީ ފަރުވާ ހޯދުމަށްޓަކައި މެނުވީ، މީހުން ދިރިއުޅޭ އެއްރަށުން އަނެއް ރަށަށް ދަތުރުކުރުން ހުއްޓާލަން ވަނީ އަންގައިފައެވެ. އަދި އެ ހާއްސަ ހާލަތުގައިވެސް ރައްޔިތުންނަށް ބޭނުންވާ ކާބޯތަކެއްޗާއި އެނޫންވެސް ޒަރޫރީ ތަކެތި ފޯރުކޮށް ދިނުމަށް ކުރާ ދަތުރުތަކާއި މަސައްކަތްތަކަށް ލޯކަލް ކައުންސިލުން މަގުފަހިކޮށްދޭނެ ކަމަށް ބުނެފައިވެއެވެ.