ރާއްޖެއަށް އެތެރެ ކުރާ މަސްތުވާތަކެތި ކޮންޓްރޯލް ކުރުމުގެ ގޮތުން ރާއްޖޭގެ ހުރިހާ ބަނދަރުތަކެއްގައި "ސްނިފާ ޑޯގްސް" ބޭއްތިބުމަށް ވިސްނަވާ ކަމަށް ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.
މިނިސްޓަރު އުމަރު ވިދާޅުވީ ރާއްޖެ އަށް ކުރިމަތިވެފައިވާ މަސްތުވާތަކެތީގެ މައްސަލަ އަށް ހައްލު ހޯދޭނީ ރާއްޖެ އަށް މަސްތުވާތަކެތި އެތެރެވުން ހުއްޓުވިގެން ކަމަށެވެ. އޭނާ ވިދާޅުވި ގޮތުގައި މަސްތުވާތަކެތި އެތެރެވުން ހުއްޓުވަން ދުނިޔޭގެ ކުރިއަރާފައިވާ ގައުމުތަކުން ބޭނުން ކުރާ ވަސީލަތްތައް ރާއްޖޭގައި ވެސް ގާއިމް ކުރުމުގެ ހާއްސަ މަސައްކަތްތަކެއް މިހާރު ވަނީ ފަށައިފަ އެވެ. އުމަރު ވިދާޅުވި ގޮތުގައި ރާއްޖޭގެ ބަނދަރުތައް ބޭނުންކޮށްގެން އެތެރެކުރެވޭ މަސްތުވާތަކެތި ކޮންޓްރޯލް ކުރެވޭނެ އެންމެ ފަސޭހަ ގޮތަކީ އެތަންތަނުގައި ކުއްތާ ގެންގުޅުމެވެ. އަދި މަސްތުވާތަކެތި އަތުލައި ގަތުމުގައި ކުއްތާ ވަރަށް މުހިންމު ދައުރެއް އަދާ ކުރާ ކަމަށް އޭނާ ވިދާޅުވި އެވެ.
"ރާއްޖޭގެ ކޮންމެ ޕޯޓެއްގައި އަދި އެއާޕޯޓްތަކުގައި ކުއްތާ ބައިތިއްބުމަކީ އަޅުގަނޑުމެން މިހާރު ވިސްނަމުން އަންނަ ކަމެއް. އެކަން ކުރަން މަޝްވަރާކުރަމުން މިދަނީ އިސްލާމިކް މިނިސްޓްރީ އާއި ފުލުހުންނާއި ކަސްޓަމްސް އަދި ވެސް ގުޅުން ހުރި އެހެން ވެސް މުއައްސަސާތަކާ އެކު. މަސްތުވާތަކެތި ރާއްޖެއިން ފުހެލުމަށް ކުރަންޖެހޭ ހުރިހާ ކަމެއް އަޅުގަނޑު ކުރަމުން މި އަންނަނީ،" އުމަރު ވިދާޅުވި އެވެ.
ރާއްޖެއަށް ގެންނަ މަސްތުވާތަކެތި ދެނެގަންނަން މީގެ އަހަރުތަކެއް ކުރިން އެއާޕޯޓްގައި ވެސް ކުއްތާ ބޭނުން ކުރި އެވެ. ސްރީލަންކާ ސަރުކާރުން ހަދިޔާ ކުރި އެ ކުއްތާތައް ފަހުން ވަނީ ބޭނުން ކުރުން ހުއްޓާލައިފަ އެވެ.
އުމަރު ވިދާޅުވީ އޭނާގެ މިނިސްޓަރު ކަމުގެ އެންމެ މުހިންމު މަސައްކަތަކީ ރާއްޖޭން މަސްތުވާތަކެތި ނައްތާލުން ކަމަށެވެ. އަދި އެކަމުގެ ވިޔަފާރި ކުރާ ފަރާތްތަކަށް ގާނޫނުގެ ތެރެއިން ދެވެން އޮތް އެންމެ ހަރުކަށި އަދަބުތައް ދިނުމަށް އޭނާ ބާރުއަޅުއްވަމުން ގެންދަވާ ކަމަށް އުމަރު ވިދާޅުވި އެވެ. މަސްތުވާތަކެތީގެ މައްސަލައާ ދެކޮޅަށް އެޅޭނެ ފިޔަވަޅުތައް ދެނެގަތުމަށްޓަކައި ލީގަލް ޓީމެއް އެކުލަވާލައި އެ ބޭފުޅުންނާ މަޝްވަރާ ކުރަމުން އަންނަ ކަމަށް އުމަރު ވިދާޅުވި އެވެ.
"އަޅުގަނޑުމެންގެ މުޖުތަމައު މި ވަބާއިން ސަލާމަތް ކޮށްގެން އަޅުގަނޑުމެންނަށް އަމާންކަން ގެނެވޭނީ. މަސްތުވާތަކެތީގެ ވިޔަފާރި ކުރާ ފަރާތްތަކުގެ ކަންތައްތައް ހުއްޓުވަން އަޅުގަނޑުމެން މި ވަނީ ހާއްސަ މަސައްކަތްތަކެއް ފަށާފައި. އެކަމުގައި ގާނޫނުތަކުގެ ތެރެއިން އަޅުގަނޑުމެން ކޮންމެ ފިޔަވަޅެއް ވެސް އަޅާނަން،" އުމަރު ވިދާޅުވި އެވެ.
އޭނާ ވިދާޅުވީ ފުލުހުންގެ އަގު ވައްޓާލުމަށް އެއްވެސް ފަރާތަކަށް މަސައްކަތް ކުރުމުގެ ފުރުސަތު ނުދެއްވާނެ ކަމަށެވެ. އަދި ފުލުހުންގެ އަބުރު ކަތިލުމަށް އެކި ނަންނަމުގައި ފުލުހުންނާއި މުހާތަބު ކުރުމާއި އެފަދަ އެހެން ވެސް ހަރަކާތްތައް ހުއްޓުވާނެ ކަމުގެ ޔަގީންކަން އޭނާ ދެއްވި އެވެ. އޭނާ ވިދާޅުވީ ކޮންމެ ސިޔާސީ ފިކުރަކަށް ނިސްބަތްވީ ނަމަވެސް ކުށެއްކޮށްފި ނަމަ ގާނޫނުގައި އޮންނަ އަދަބެއް ދެއްވާނެ ކަމަށެވެ. އަދި ކޯޓުތަކުން ކުރާ ހުކުމްތައް ތަންފީޒް ކުރުމުގައި އޭނާގެ މިނިސްޓްރީން ޒިންމާ އަދާކުުރުމުގައި ފަސް ނުޖެހޭނެ ކަމަށް އުމަރު ވިދާޅުވި އެވެ.
"ފުލުހުންގެ ޝަހުޝިއްޔަތު ކަތިލާކަށް ޖާގައެއް ނުދޭނަން. ކުށްކުރާ މީހުން ނުކުމެ، ސިޔާސީ މީހުންގެ ތާކިހާ އަޅައިގެން ކުށްކުރުމުގެ ފުރުސަތެއް ނުދޭނަން. ބޮލުގައި ކޮންމެ ކުލައެއްގެ ބޭންޑެއް އައްސާފައި އޮތް ނަމަވެސް، ކުށްކުރާ މީހުންނަށް އަދަބު ދޭނަން،" އުމަރު ވިދާޅުވި އެވެ.
އުނގޫފާރު ދާއިރާގެ ކުރީގެ މެންބަރު ޑރ. އަފްރާޝީމް އަލީ އަވަހާރަކޮށްލުމުގައި ބައިވެރިވާ ފަރާތްތައް ހޯދައި އެ މީހުން އިންސާފުގެ ކުރި މައްޗަށް ގެނައުމުގެ މަސައްކަތް ސަރުކާރުން ހުއްޓާނުލާނެ ކަމަށް އުމަރު ވިދާޅުވި އެވެ. އަދި އެކަމުގެ އަޑީގައި ތިބި މީހުންނާއި އެކަން ހިންގި އެންމެން މި ސަރުކާރުގައި އިންސާފުގެ ކުރިމައްޗަށް ގެންނަން މަސައްކަތް ކުރައްވާނެ ކަމަށް ވެސް އުމަރު ވިދާޅުވި އެވެ.