ޕީޕީއެމްގެ ކުރީ ސަފުން ފެނިވަޑައިގެންނެވި ނަމަވެސް އެއާކޮންޑިޝަން ކޮޓަރި ތެރޭގައި ތިއްބަވާ ބޭފުޅުންނަށް ޕާޓީ ލީޑްނުކުރެއްވޭނެ ކަމަށް ވިދާޅުވެ، ޕާޓީ އާއި ގައުމުގެ ކުރިމަގަށްޓަކައި ކޮންގްރެސްގައި އޭނާގެ ޓީމު ހޮވައިދިނުމަށް އެ ޕާޓީގެ އިންތިގާލީ ނައިބު ރައީސް އުމަރު ނަސީރު ރޭ އެދިވަޑައިގެންފި އެވެ.
އާޓިފިޝަލް ބީޗުގައި ބޭއްވި "ޓީމް އުމަރު"ގެ ކެމްޕޭން އިފްތިތާހް ކުރުމުގެ ރަސްމިއްޔާތުގައި އޭނާ ވަނީ ޕާޓީގެ މެމްބަރުންނަށް މުހިއްމު މެސެޖްތަކެއް ދެއްވައިފަ އެވެ. އަދި ޕާޓީއަށްޓަކައި މިހާތަނަށް ގުރުބާންވެފައިވަނީ ކޮން ބައެއް ކަން ހާމަކޮށްދެއްވައި، ޕާޓީގެ ކުރިމަގާ މެދު މި ދެ ދުވަހު މެމްބަރުން ވިސްނައި ވޯޓު ދެއްވުމަށް ވެސް އޭނާ އެދިވަޑައިގަތެވެ.
އުމަރު ކެމްޕޭންގައި ލޯގޯއެއްގެ ގޮތުގައި ބޭނުންކުރައްވާފައިވަނީ 2008 ގެ އިންތިހާބުގައި ކުރީގެ ރައީސް މައުމޫން އަބްދުލްގައްޔޫމް ބޭނުންކުރެއްވި އަތްތިލަ އެވެ. "ޓީމް އުމަރު"ގައި ހިމެނޭ ބޭފުޅުންގެ ފޮޓޯ ކެމްޕޭނުގައި ޖަހާފައިވާ އިރު، އެ ޓީމްގެ މެދުގައި ހުރީ މައުމޫނާއި އުމަރުގެ ފޮޓޯއެކެވެ.
"ކުރީ ސަފުން ލީޑްކުރާ މީހުން ހޮވަންވީތޯ، ކުރީ ސަފުން ލީޑްކުރާ މީހުން ގެއަށް ފޮނުވާލާފައި ނަތީޖާ ނެރެދޭނެ ކަމަށް ބުނާ މީހުން ހޮވަންވީތޯ، މިއޭ ކުރިއަށް އޮތް ދެ ދުވަހު ތި ބޭފުޅުން ]ޕާޓީ މެމްބަރުން] ނިންމަވަންވީ އެއްޗަކީ. ތިބޭފުޅުން ނިންމަވާ ނިންމުމެއްގެ ސަބަބުން މި ޕާޓީ އޮޔާ ވެސް ހިނގައިދާނެ، މި ޕާޓީގެ ލީޑަޝިޕް ގެއްލިދާނެ. އެއާކޮންޑިޝަން ކޮޓަރި ތެރޭގައި ޕާޓީ ލީޑެއް ނުކުރެވޭނެ،" ޕީޕީއެމްގެ މެމްބަރުންނަށް ދެއްވި މެސެޖުގައި އުމަރު ވިދާޅުވި އެވެ.
އޭނާ ވިދާޅުވީ ޕީޕީއެމް ހިންގާނީ ވާދަވެރި އިންތިހާބު ތެރެއިން ކަމަށާއި އެމްޑީޕީން ކަންކުރަމުން އަންނަ އުސޫލުން އެކަކަށް ހުރިހާ މަގާމެއް ނުދެއްވާނެ ކަމަށެވެ. ޕީޕީއެމަކީ ހުރިހާ އެންމެންނަށް ވެސް ހަމަހަމަ ފުރުސަތު ދޭނެ ޕާޓީއެއް ކަމަށާއި ދޮރުތަކުން ޕާޓީ އަށް ވަނުމަށް "ހުރިހާ ދޮރެއްގައި ވެސް ހުންނާނީ ހަރުގަނޑުތައް ލައްގާފައި" ކަމަށާއި "އެ ހަރުގަނޑުން އެ މީހަކަށް ކުރިއަށް ދެވޭ މިންވަރަކަށް ކުރިއަށްދާންވީ" ކަމަށް ވެސް ވިދާޅުވި އެވެ.
އުމަރު ވިދާޅުވީ މާދަމާ ފަށާ ކޮންގްރެސް އާއި މާޗް މަހު ބާއްވާނެ ކަމަށް ލަފާކުރެވޭ ރިއާސީ ޕްރައިމަރީ ނިމުމަށް ފަހު ވެސް އެ ޕާޓީ ބައިބައިވުމުގެ ފުރުސަތު ނުދެއްވާނެ ކަމަށެވެ.
އިންތިހާބުގައި ކެމްޕޭންކުރަމުން އަންނަނީ ދެ ޓީމެއްކަން ފާހަގަކުރައްވައި އުމަރު ވިދާޅުވި ގޮތުގައި "ޓީމް އުމަރު" ގައި ހިމެނެނީ ވޭތުވެދިޔަ ތިން އަހަރު ދުވަހުގެ ތެރޭގައި މި ގައުމުގެ އިސް ސަފުން ފެނުނު ފަހުލަވާލުންނެވެ. އަދި އެއީ މަގުތަކާއި ކޮމާންޑް ސެންޓަރުތަކުގައި ވެސް ބައިވެރިވެފައިވާ ބޭފުޅުން ކަމަށާއި އެއީ ނަތީޖާ ނެރެދީފައިވާ ބައެއް ކަމަށް ވެސް ވިދާޅުވި އެވެ.
ޕާޓީގެ ޑެޕިއުޓީ ލީޑަރު ކަމަށް އުމަރު އެންޑޯސް ކުރައްވާފައި ވަނީ މިހާރު އެ ޕާޓީގެ ޕާލަމެންޓްރީ ގުރޫޕުގެ ނައިބު ލީޑަރު އިލްހާމް އަހުމަދެވެ. ކައުންސިލަށް ހޮވާ ފިރިހެން އަށް މެމްބަރުންގެ ލިސްޓަށް އުމަރު ތައާރަފުކޮށްދެއްވީ އަބްދުﷲ ޝިނާން، މާޒް އަހުމަދު ސަލީމް، އަހުމަދު ނަސީމް، އިލްޔާސް ފަރުހާދު، ފާރިސް މައުމޫން، ޣައްސާން މައުމޫން، އަހުމަދު ނާޒިމް )ހެރިންސް އަންމަޑޭ( އަދި އިބްރާހިމް ހުސެއިން އެވެ.
މީގެ ތެރެއިން މައުމޫންގެ ދެ ދަރިކަލުން ކަމަށްވާ ޣައްސާނާއި ފާރިސް މި ހަފުލާ އަށް ވަޑައެއްނުގަންނަވަ އެވެ. އެއީ ކޮންގްރެސްގައި ވާދަކުރާ އަބްދުﷲ ޔާމީންގެ ޓީމުގައި ވެސް ހިމެނިވަޑައިގަންނަވާ ދެ ބޭފުޅުންނެވެ. ކައުންސިލަށް އައްޔަންކުރާ ތިން އަންހެން މެމްބަރު ކަމަށް އުމަރު ހުށަހެޅުއްވީ އަނީސާ ސައީދާއި ޝަހީމާ އަބްދުއްރަހުމާން އަދި ނަހުލާ އަލީ އެވެ. މީގެ އިތުރުން ޒުވާނުންގެ ގޮފީގެ ރައީސް ކަމަށާއި ނައިބު ރައީސް ކަމަށާއި އެކި ކޮމެޓީތަކަށް އެ ޓީމުން ވާދަކުރާ މީހުން ވެސް ތައާރަފުކޮށްދެއްވި އެވެ.
"މި ޓީމް، ޓީމު އުމަރު ވަނީ ވޭތުވެދިޔަ ތިން އަހަރު ދުވަހުގެ ތެރޭގައި ނުކުރެވޭނެ ކަމަށް ސިޔާސީ ފަރާތްތައް ބުނި ހުރިހާ ކަމެއްކޮށް ސާބިތުކޮށްދީފައި،" އުމަރު ވިދާޅުވި އެވެ.
ކުރީގެ ރައީސް ނަޝީދާ ދެކޮޅަށް 129 ހަރަކާތް ހިންގައި 173 މީހުން ހައްޔަރުކޮށް 254 މީހުން ހޮސްޕިޓަލްތަކަށް ގެންގޮސްފައިވާ ކަމަށް ވެސް އުމަރު ވިދާޅުވި އެވެ.
އުމަރަކީ ބިރު ކުޑަ މީހެއްކަން އޭނާގެ ސަޕޯޓަރުންނަށް އަންގައިދެއްވުމަށް ވިދާޅުވީ އޭނާ އާއި އޭނާގެ ޓީމުން ވެސް ހޫނު އަވީގައި ވަޅިތަކުގެ ކުރިމައްޗަށް ނުކުންނަން ތައްޔާރު ކަމަށެވެ. މީގެ ކުރިން ވެސް އެމްޑީޕީގެ އެކްޓިވިސްޓުން ވަޅި އާއި ލަޓިބުރި އަދި ދަގަނޑުބުރި ހިފައިގެން ތިއްބައި މައިދާނަށް ނުކުންނަން ކެރުނީ ޓީމު އުމަރަށް ކަމަށް ވެސް ވިދާޅުވި އެވެ. އަދި ބައެއް މީހުން ބުނަމުން އަންނަ ގޮތަށް އޭނާގެ ޓީމުގައި ތިބީ ނިކަމެތިންކަން އަމިއްލަ އަށް ވެސް ގަބޫލުކުރައްވާ ކަމަށް ވިދާޅުވި އެވެ.
ކުރިއަށް އޮތް އިންތިހާބުގައި އޭނާގެ ޓީމަށް ކާމިޔާބު ހޯދައިދީފި ނަމަ، ގައުމު ޗަކަ ވަޅުގަނޑަށް ވެއްޓޭ ކޮންމެ ފަހަރަކު، އެ ވަޅުގަނޑަށް ފައިބަން އެ ޓީމު ތައްޔާރު ކަމަށް ވެސް އުމަރު ވިދާޅުވި އެވެ. އޭނާގެ ޓީމުގައި އާދައިގެ މީހުންނާއި ތައުލީމީ މީހުންނާއި ގާނޫނީ ވަކީލުން ވެސް ހިމެނިވަޑައިގަންނަވަ އެވެ.
އުމަރަށް ތާއީދުކުރާ ގިނަ ބަޔަކު ހާޒިރުވި ޖަލްސާގައި އޭނާ ވިދާޅުވީ ފެބުރުއަރީ 7 ގައި ރައީސް ނަޝީދުގެ ވެރިކަން ބަދަލުކޮށްފައިވަނީ "އޮޓެމެޓިކުން ނޫން" ކަމަށެވެ. އެކަން ކޮށްފައި ވަނީ ކޮންމެވެސް ބަޔެއްގެ ރޭވުންތެރިކަމާއި ޕްރޮޕެގެންޑާ އާއި މަސައްކަތްތަކެއްގެ ނަތީޖާ އިން ކަމަށް ވިދާޅުވި އެވެ. އަދި ވިދާޅުވީ އެކަން ހަގީގަތަކަށް ހެދުމަށް އޭނާގެ ޓީމަކީ ފުލް ޓައިމް މަސައްކަތް ކޮށްފައިވާ ބައެއް ކަމަށެވެ.
"އެއީކީ އޮޓެމެޓިކުން އައި ކަމެއް ނޫން. އެއްގޮތަކަށް ވެސް އޮޓެމެޓިކުން ނޫން އައީ،" އުމަރު ވިދާޅުވި އެވެ.