ޓީވީ މޯލްޑިވްސްގެ ސްކޫލު ކުދިންގެ ލަވަ މުބާރާތް 2015ގެ ފަޚުރުވެރި އެއްވަނަ އިސްކަންދަރު ސްކޫލުގެ ދަރިވަރު ޔޫސުފް ޔޫޙާން އާތިފް ހޯދައިފިއެވެ.
ޔޫޙާން މުބާރާތުގެ އެއްވަނަ ހާސިލްކޮށްފައި ވާއިރު، 19 އަހަރުން ދަށުގެ އެއްވަނަ އާއި، ސީނިއަރ ގްރޫޕުގެ އެއްވަނަވެސް އޭނާ ވަނީ ޙަސިލްކޮށްފައެވެ. އަދި އެންމެ މޮޅު އަމިއްލަ ރާގުގެ އެވޯޑުވެސް ލިބިފައި ވަނީ ޔޫހާންގެ ލަވައަށެވެ.
ޔޫޙާންގެ ފަހަތުން މުޅި މުބާރާތުގެ ދެވަނަ އަދި ސީނިއަރ ގްރޫޕުން ދެވަނަ ހޯދާފައި ވަނީ ޖަމާލުއްދީން ސްކޫލުގެ ދަރިވަރި އާމިނަތު ސައިނާ މުހައްމަދު ރަޝީދެވެ. މުބާރާތުން އަދި ސީނިއަރ ގްރޫޕުން ތިންވަނަ ދަރިވަރަކަށް ހޮވިފައި ވަނީ ހަމަ އެ ސްކޫލުގެ މުހައްމަދު ޚަލަފް ޙާފިޒެވެ.
ސައިނާ އަދި ޚަލަފްވެސް ވަނީ ބައިވެރިވި އުމުރުފުރާއިން އެއްވަނަ ހޯދާފައެވެ. ސައިނާއަކީ 16 އަހަރުން ދަށުގެ އުމުރުފުރައިގެ އެއްވަނަ ލަވަކިޔުންތެރިޔާއެވެ. އަދި ޚަލަފްވަނީ 13 އަހަރުން ދަށުގެ އުމުރުފުރާއިން އެއްވަނަ ހާސިލްކޮށްފައެވެ.
ޔޫހާން، ސައިނާ އަދި ޚަލަފް އަކީވެސް ވޭތުވެދިޔަ މުބާރާތުގައިވެސް ބޮޑެތި ކާމިޔާބީތަކެއް ހޯދާފައިވާ ތިން ކުދިންކަން ފާހަގަކޮށްލަމެވެ.
މުބާރާތުގެ އެންމެ މޮޅު ސްކޫލަށް ހޮވިފައި ވަނީ ޖަމާލުއްދީން ސްކޫލެވެ. ދެވަނަ ސްކޫލަކަށް އިސްކަންދަރު ސްކޫލް ހޮވުނު އިރު، ތިންވަނަ ހޯދާފައިވަނީ ބިލަބޮންގ ހައި އެވެ.
ޖޫނިއަރ ގްރޫޕުން އެއްވަނަ ދަރިވަރަކަށް ހޮވިފައި ވަނީ އިމާދުއްދީން ސްކޫލުގެ ދަރިވަރު އާމިނަތު ރާޔާ އަޝަރަފްއެވެ. އިސްކަންދަރު ސްކޫލުގެ ދަރިވަރު އާމިނަތު އައިނީ ދެވަނަ ހޯދާފައި ވާއިރު، ތިންވަނަ މަޤާމު ހޯދާފައި ވަނީ ޣިޔާސުއްދީން އިންޓަރނޭޝަނަލް ސްކޫލްގެ އާމިނަތް ލީންއެވެ.
ވަކިވަކި އުމުރުފުރާތަކަށް ބަލާލާއިރު، 6 އަހަރުން ދަށުގެ އެއްވަނަ ހޯދާފައި ވަނީ އައިޝަތް މިޝްކާ ނަބީލްއެވެ. 9 އަހަރުން ދަށުގެ އެއްވަނަ ލަވަކިޔުންތެރިޔަކަށް ހޮވިފައި ވަނީ ތާޖުއްދީން ސްކޫލްގެ އައިޝަތު އާލާ ހަސަންއެވެ. 11 އަހަރުން ދަށުގެ އުމުރުފުރާއިން އެއްވަނަ ޙާޞިލްކުރީ ޖޫނިއަރ ގްރޫޕުގެވެސް އެއްވަނަ މަޤާމު ހޯދި ރާޔާއެވެ.
ގްރޫޕް ހުށަހެޅުންތަކުގެ ތެރެއިން ޕްރީސްކޫލްތަކުގެ ބައިން އެއްވަނަ ހޯދާފައިވަނީ ކެންގަރޫ ކިޑްސް ޕްރީސްކޫލުންނެވެ. ގްރޭޑް ސްކޫލްތަކުން، އެއްވަނަ ގްރޫޕް ހުށަހެޅުމަކަށް ހޮވިފައި ވަނީ ޣިޔާސުއްދީން އިންޓަނޭޝަނަލްގެ ހުށަހެޅުމެވެ. ދެވަނަ މަޤާމު އިސްކަންދަރު ސްކޫލުން ގެންދިޔަ އިރު، ތިންވަނަ ހުށަހެޅުމަކަށް ހޮވިފައި ވަނީ ޖަމާލުއްދީންގެ ގްރޫޕް ހުށަހެޅުމެވެ.
މުބާރާތުގައި ބައިވެރި ކުރި ޅެންތަކުގެ ތެރެއިން އެންމެ މޮޅު ޅެމެއްގެ ގޮތުގައި ހޮވިފައިވަނީ، އައިޝަތު ސާރާއަށް، އާދަމް ހަލީމް އަދުނާން ހަދައިދިން ޅެމެކެވެ. އެންމެ މޮޅު އަމިއްލަ ރާގެއް ކަމުގައި ހޮވިފައިވަނީ މުހައްމަދު އިކްރާމް، ޔޫހާންގެ ލަވައަށް ހަދައިދީފައިވާ ރާގެވެ.
މިފަހަރުގެ މުބާރާތުގައި 12 ސްކޫލަކުން 169 ކުއްޖަކު ވަނީ ބައިވެރިވެފައެވެ.