ރާއްޖެއަށް މަކިޓާ ތައާރަފު ކުރިތާ 25 އަހަރު ފުރުމާއި މަކިޓާ ޝޯރޫމަށް އެއް އަހަރު ފުރުން ފާހަގަކުރުމަށް މަކިޓާގެ އުފެއްދުންތަކުގެ ޚާއްސަ ޕްރޮމޯޝަނެއް އެސްޓީއޯއިން ފަށައިފި އެވެ.
މިއަދުން ފެށިގެން އަންނަ ޖުލައި މަހުގެ ނިޔަލަށް ކުރިއަށް ގެންދާ އެ ޕްރޮމޯޝަން ފައްޓަވައިދެއްވީ އެސްޓީއޯގެ މެނޭޖިން ޑިރެކްޓަރު އަބްދުﷲ ސައީދެވެ. އަދި ދުވަހާ ގުޅިގެން ހާއްސަ ކޭކެއް ފަޅާފައިވާއިރު، ކޭކު ފަޅަން ބޭނުންކުރީ މަކިޓާ ބްރޭންޑުގެ ކަރަންޓު ކީހެކެވެ.
އެސްޓީއޯ އިން ބުނީ، އެ ޕްރޮމޯޝަންގެ ދަށުން ގަންނަ މަކިޓާ އުފެއްދުންތަކުން 40 ޕަސެންޓާ ހަމައަށް ޑިސްކައުންޓް ލިބޭނެ ކަމަށެވެ.
މަކިޓާ ޝޯ ރޫމުގެ އަހަރީ ދުވަސް ފާހަގަކުރުމުގެ ހަފުލާގައި އެ ޝޯރޫމުން ވަނީ މިދިޔަ އަހަރުގެ ޖޫން އިން މި އަހަރުގެ މެއި އަށް އެ ޝޯ ރޫމުން އެންމެ ގިނައިން ތަކެތި ގަނެފައިވާ ފަސް ފަރާތަކަށް ހާއްސަ ހަދިޔާއެއް ދީފަ އެވެ. އަދި މިއަދު މަކިޓާ ޝޯ ރޫމުން ވިޔަފާރިކުރި ކަސްޓަމަރުންގެ ތެރެއިން ކޮންމެ 25 ވަނަ ކަސްޓަމަރަކަށް ވަނީ ހާއްސަ ހަދިޔާއެއް ދީފަ އެވެ.