ދިވެހިރާއްޖޭގެ އިމިގްރޭޝަންގެ މުވައްޒަފުންނަށް ސައުދީ އަރަބިއްޔާ އިން ތަމްރީންގެ ފުރުސަތު ހޯދަން މަޝްވަރާކޮށްފިއެވެ.
މިމަޝްވަރާތައް ކުރައްވާފައިވަނީ ސަޢުދީ ޢަރަބިއްޔާގެ ޖެނެރަލް ޑައިރެކްޓްރޭޓް އޮފް ޕާސްޕޯޓްސްގެ ދަޢުވަތަކަށް ރާއްޖޭގެ ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްޢާން ވަޙީދު ސަޢުދީގެ ވެރިރަށް ރިޔާޒަށް މިހާރު ކުރައްވަމުން ގެންދަވާ ދަތުރުފުޅުގައެވެ.
އިމިގްރޭޝަނުން ބުނީ ކޮންޓްރޯލަރ ޝަމްޢާންގެ ދަތުރުފުޅުގައި ތަމްރީންގެ ފުރުސަތުތައް ހޯދުމުގެ މަޝްވަރާތަކުގެ އިތުރަށް މައުލޫމާތު ބަދަލުކުރުމާއި، އިންޓެލިޖެންސް ހިއްސާކުރުމާއި ބެހޭގޮތުންވެސް މަޝްވަރާ ކުރެވުނު ކަމަށެވެ.
މި ދަތުރުފުޅުގައި އިމިގްރޭޝަން ކޮންޓްރޯލަރ ޝަމްޢާން ވަނީ ސަޢޫދީ ޢަރަބިއްޔާގެ ޖެނެރަލް ޑައިރެކްޓްރޭޓް އޮފް ޕާސްޕޯޓްސް މޭޖަރ ޖެނެރަލް ޑރ.ސާލިޙް އަލްމިރްބާއާއި، ސަޢޫދީ ޢަރަބިއްޔާގެ އިސް އޮފިޝަލުންނާ ބައްދަލުކުރައްވާފައި ކަމަށް އިމިގްރޭޝަނުން ބުނެއެވެ.