އިންޑިއާގެ އަހްމަދުއާބާދުގައި މިއަދު އެއާ އިންޑިއާގެ ފްލައިޓެއް ވެއްޓި، ހިނގި ހާދިސާއާ ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު، ހިތާމަފާޅުކުރައްވައިފިއެވެ.
ވެއްޓުނު އެއާ އިންޑިއާގެ ފްލައިޓް އޭއައި 171 ގެ ހާދިސާއާ ގުޅިގެން ރައީސް އެކްސްގައި ކުރެއްވި ޕޯސްޓެއްގައި ވަނީ ދިވެހި ސަރުކާރާއި ރައްޔިތުން، މި ހިތާމައިގައި ބައިވެރިވާކަން ހާމަކުރައްވާފައިވެއެވެ.
242 ފަސިންޖަރުންނާއެކު ދަތުރުކުރި އެއާ އިންޑިއާގެ މަތިންދާބޯޓެއް ވެއްޓުނީ މިއަދު މެންދުރު ފަހުގެ ވަގުތެއްގައެވެ. ބޯއިން 787-8 ޑްރީމްލައިނާ ބޯޓަކީ އިނގިރޭސި ވިލާތުގެ ލަންޑަނަށް ދިއުމަށް ފުރި ބޯޓެކެއެވެ.
މި ބޯޓު ވެއްޓެން ދިމާވި ސަބަބު އަދި ސާފުވެފައިނުވާއިރު ބޯޓުން ދަތުރުކުރި އެއްވެސް މީހަކު ސަލާމަތްވިކަމެއް ނުވަތަ ނޫން ކަމެއް ވެސް އަދި ސާފެއް ނުވެއެވެ.