ރައްޔިތުންގެ މަޖިލީހުގެ އިންތިހާބުގައި ވާދަކުރެއްވުމަށް ޕްރައިމަރީއަކާ ނުލައި ނޮޅިވަރަމް ދާއިރާގެ ޓިކެޓް އަނެއްކާވެސް އިތުރު ބޭފުޅަކަށް ލިބިއްޖެ އެވެ.
ނޮޅިވަރަމް ދާއިރާގެ ޓިކެޓް އެންމެ ފުރަތަމަ ޕްރައިމަރީއަކާ ނުލާ ލިބުނީ އުބައިދުﷲ މުއާޒު އަށެވެ. ނަމަވެސް އޭނާ ކެމްޕޭނަށް އެއްބާރުލުން ނުދެއްވާތީއާ ފޯނަށް ޖަވާބު ނުދެއްވާ ކަމަށް ބުނެ އެމްޑީޕީން ވަނީ މިދާއިރާގެ ޕްރައިމަރީ ބާތިލްކޮށްފަ އެވެ. އަދި އަލުން މިދާއިރާގެ ޕްރައިމަރީއަށް ހުޅުވާލާ މިއަދު މެންދުރު 12:00 ޖެހުމާއި ހަމައަށް ފުރުސަތު ހުޅުވާލުމުން ކުރިމަތިލެއްވީ އެންމެ ފަރާތަކުން ކަމަށްވާތީ އެ ފަރާތަށް މިހާރު ޓިކެޓް ދީފައިވާ ކަމަށް ވެސް އެމްޑީޕީން ބުނެ އެވެ.
ނޮޅިވަރަމް ދާއިރާގެ ޓިކެޓް މިހާރު ލިބިފައިވަނީ ހ. އަދުންގެ އަލީ އާރިފަށެވެ. އޭނާ ވަނީ މިފަހަރުގެ އިންތިހާބުގައި ހެންވޭރު ދެކުނު ދާއިރާގެ ޓިކެޓް ހޯދުމަށްޓަކައި ޕްރައިމަރީގައި ވާދަކުރައްވާ ނާކާމިޔާބުވެފަ އެވެ.
އިންތިހާބުގައި ވާދަކުރައްވާ އެމްޑީޕީގެ ގިނަ ކެންޑިޑޭޓުންގެ ފޯމްތައް މިއަދު އިލެކްޝަނަށް ހުށަހަޅާފައިވާއިރު، އަލީ އާރިފްގެ ފޯމް ހުށަހެޅޭނީ އޭނާގެ ކުށުގެ ރެކޯޑް ސާފުކުރުމަށްފަހުގައި ކަމަށް ވެސް އެމްޑީޕީން ބުނެ އެވެ.
އިންތިހާބުގައި ވާދަކުރައްވާ ކެންޑިޑޭޓުން އިލެކްޝަންސް ކޮމިޝަނަށް ފޯމް ހުށަހަޅަންޖެހޭ އެންމެ ފަހުގެ ތާރީހަކީ މިމަހުގެ 11 ވަނަ ދުވަހެވެ. އިންތިހާބު ބޭއްވުމަށް ހަމަޖެހިފައިވަނީ ކުރިއަށް އޮތް މާޗް މަހުގެ 22 ވަނަ ދުވަހު އެވެ.