ސްކޫލް ކުދިން މަސްވެރިކަމަށް ޝައުގުވެރިކުރުމަށް ފިޝަރީޒް މިނިސްޓްރީ އާއި އެޑިއުކޭޝަން މިނިސްޓްރީ އަދި މޯލްޑިވްސް ފިޝަމެން އެސޯސިއޭޝަން ގުޅިގެން ކްލަބެއް އުފައްދައިފި އެވެ. މަސްވެރިކަމާ ގުޅުންހުރި ކަންކަމަށާއި އެ ދާއިރާގެ މަސައްކަތަށް ސްކޫލްތަކުގެ ދަރިވަރުން ހޭލުންތެރިކޮށް، ޝައުގުވެރިކަން އުފެއްދުމުގެ ގޮތުން "ޔަންގް ފިޝާސް"ގެ ނަމުގައި އުފެއްދި މި ކްލަބު އިފްތިތާހު ކޮށްފައިވަނީ މަސްވެރިންނާއި ދަނޑުވެރިންގެ ދުވަސް ފާހަގަ ކުރުމަށް ރޭ ބޭއްވި ރަސްމިއްޔާތުގަ އެވެ. މި ރަސްމިއްޔާތުގައި ވަނީ ކްލަބްގެ ޔުނީފޯމް ދައްކާލާފަ އެވެ. އަދި ކްލަބްގެ ބައިވެރިންނަށް ބެޖެއް ވެސް ހަވާލުކުރި އެވެ. ދަރިވަރުންނަށް ބެޖް ހަވާލުކޮށްދެއްވީ އެޑިއުކޭޝަން މިނިސްޓަރު ޑރ. އައިޝަތު ޝިހާމް އެވެ. ސްކޫލް ނިމުމަށްފަހު މަސްވެރިކަމުގެ ސިނާއަތަށް ދަރިވަރުން ވަދެ، އެ ދާއިރާއިން ކުރިއަށްދާ އަދަދު މިހާރު ގިނަ ކަމަށް ފިޝަމެންސް އެސޯސިއޭޝަނުން ބުނެ އެވެ. އަދި މި ކްލަބްގެ ޒަރިއްޔާއިން ދަރިވަރުންނަށް މަސްވެރިކަމާ ގުޅުންހުރި މާއްދާތަކުން ކިޔަވައިދިނުމަށް ހަމަޖެހިފައިވާ ކަމަށް އެ އެސޯސިއޭޝަނުން ބުންޏެވެ. ގްރޭޑް ހަތަކުން ދަށުގެ ދަރިވަރުންނާއި ގްރޭޑް ހަތަކުން މަތީގެ ދަރިވަރުންނަށް ތަފާތު ހަރަކާތްތައް ރާވާފައިވާ މި ކްލަބްގައި ހދ. ކުޅުދުއްފުށީ ޖަލާލުއްދީން ސްކޫލް، ރ. ދުވާފަރު ސްކޫލް، ދ. ކުޑަހުވަދޫ އެޑިއުކޭޝަން ސެންޓަރު، ގއ. ވިލިނގިލި އެޑިއުކޭޝަން ސެންޓަރު އަދި ސ. މަރަދޫ އިރުޝާދިއްޔާ ސްކޫލްގެ ދަރިވަރުން ބައިވެރިވި އެވެ. ފިޝަމެންސް އެސޯސިއޭޝަނުން ބުނި ގޮތުގައި ކުރިއަށް އޮތް ތަނުގައި މި ކްލަބަށް ރާއްޖޭގެ އެކި ހިސާބުތަކުގެ ސްކޫލްތަކުގެ އިތުރު ކުދިންނަށް ފުރުސަތު ދޭނެ އެވެ. މި ކްލަބްގެ ހަރަކާތްތައް ފެށުމަށް ހަމަޖެހިފައި ވަނީ އަންނަ އަހަރު އެވެ.