ފުލުހުންގެ ތެރޭގައި ސަރުކާރަށް ވަފާތެރި ނޫން ބަޔަކު އެބަތިބި ކަމަށާއި، އެމީހުން ފުރިހަމަ ކޮންޓްރޯލްގެ ދަށަށް ގެންދިއުމަށް އެދި، ޕޮލިސް ކޮމިޝަނަރ ހުސައިން ވަހީދަށް، ޕީޕީއެމްގެ ކައުންސިލް މެމްބަރ އަދި ޕީޕީއެމްގެ ރައީސް މައުމޫން އަބްދުލްޤައްޔޫމްގެ ދަރިކަލުން އަހްމަދު ފާރިސް މައުމޫން ފޮނުއްވި މެސެޖެއް ލީކުވި ކަމަށް ބުނެ އިއްޔެ "ހަވީރު" ނޫހުގައި ޖެހި ޚަބަރު ޕީޕީއެމްއިން ދޮގުކޮށްފިއެވެ.
އެޕާޓީއިން މިއަދު ނެރުނު ނޫސްބަޔާނެއްގައި ބުނެފައި ވަނީ، އެޕާޓީގެ ކައުންސިލް މެމްބަރުންނަށް ނިސްބަތްކޮށް ބައެއް މީޑިޔާތަކާޢި ސޯޝަލް މީޑިޔާގައި ފަތުރަމުންދާ ޚަބަރުތަކަކީ ހަޤީޤަތާ ޚިލާފު ވާހަކަތަކެއް ހިމަނައިގެން ފަތުރަމުންދާ ވާހަކަތަކެއް ކަމަށެވެ.
"މިޕާޓީގެ ކައުންސިލް މެމްބަރު އަހްމަދު ފާރިސް މައުމޫނާއި އަދި މިނޫންވެސް ބޭފުޅުންގެ ނަންފުޅުގައި މިފަދަ ޚަބަރުތައް ފެތުރުމުގެ ބޭނުމަކީ މި ޕާޓީގެ ނަން ކިލަނބުކޮށް، ޕާޓީއާއި ސަރުކާރާމެދު ރައްޔިތުންގެ މެދުގައި އޮތް އިތުބާރު ނަގާލުމެވެ،" ޕީޕީއެމްގެ ބަޔާނުގައި ވެއެވެ.
"ޕީޕީއެމްއަކީ ސަރުކާރު ހިންގާ ޕާޓީއަށް ވުމާއެކު، މިޕާޓީއާއި ސަރުކާރުގެ އިސް މަޤާމުތަކުގައި ތިއްބަވާ ބޭފުޅުން އަބަދުވެސް މަސައްކަތް ކުރައްވަމުން ގެންދަވާނީ މިސަރުކާރުން ރައްޔިތުންނަށް އެންމެ ފުރިހަމައަށް ޚިދުމަތް ފޯރުކޮށްދިނުމަށެވެ. ވީމާ މިފަދަ ޚަބަރުތައް ފަތުރަމުން ގެންދާ އިރު، ހުރިހާ ފަރާތަކުން ވެސް ޒިންމާދާރުކަމާ އެކު އެކަން ކުރުމަށް މިޕާޓީއިން ގޮވާލަމެވެ،" ޕީޕީއެމްއިން މިއަދު ނެރުނު ބަޔާނުގައި ބުނެފައި ވެއެވެ.
އިއްޔެ "ހަވީރު ނޫހުގައި" ޝާއިޢުކުރި ޚަބަރުގައި ވަނީ، އިއްޔެ ފެތުރުނު މެސެޖުގައި،ފުލުހުންގެ މުއައްސަސާގައި ތިބި ސަރުކާރަށް ވަފާތެރި ނޫން މީހުން ސީޕީ ހުސެއިންގެ ފުރިހަމަ ކޮންޓްރޯލުގެ ދަށަށް ގެނެސް ދިނުމަށް ވަރަށް ބޮޑަށް ފާރިސް އެދިވަޑައިގަންނަވާފައިވާ ކަމަށާއި، ބައެއް މީހުން ކުރަމުންދާ ބައެއް ކަންތައްތަކުގެ ހުތުރު ނަން ރައީސް އަބްދުﷲ ޔާމީންގެ އިސްތަށިފުޅުގައި ވެސް އެޅެމުންދާ ކަމަށެވެ.
އަދި، ހުރިހާ ކަމެއް ގޯސްވުމުގެ އަސްލަކީ ޕޮލިސް ކޮމިޝަނަރު ހުސެއިން ކަމަށް ހެދުމަށް ވެސް ބައެއް މީހުން ދަނީ މަސައްކަތް ކުރަމުންދާ ކަމަށް ފާރިސްގެ މެސެޖުގައި ވާ ކަމަށާއި، އެހެންވެ އެކަން ގޯސްވުމުގެ ކުރިން ޕޮލިސް ކޮމިޝަނަރަށް އެހީތެރިވެ ވަޑައިގަންނަވަން ބޭނުންވާ ކަމަށް ފާރިސް ވިދާޅުވި ކަމަށް ވެސް "ހަވީރު" ނޫހުގައި ޖަހާފައި ވެއެވެ.