މި ސަރުކާރުން ރައްޔިތުންނަށް ގެނެސްދޭނީ އުންމީދު ކަމަށާއި ރައްޔިތުން ނާއުންމީދުގެ ތެރޭގައި ނުބައިތިއްބާނެ ކަމަށް ރައީސް އަބްދުﷲ ޔާމީން މިރޭ ވިދާޅުވެއްޖެ އެވެ.
މަސްވެރިންގެ ދުވަހުގެ ޖަލްސާ ޝަރަފުވެރިކޮށްދެއްވަމުން ރައީސް ވިދާޅުވީ މި ސަރުކާރުން މަސައްކަތް ކުރަނީ ރައްޔިތުންގެ އުންމީދުތައް ހަގީގަތަކަށް ހަދައިދިނުމަށް ކަމަށެވެ. ރައީސް ވިދާޅުވީ އެމަނިކުފާނަކީ ނާއުންމީދު ކަމެއްގެ ތެރޭގައި ހަށަން ބަދެގެން ހުންނާނެ ބޭފުޅެއް ނޫން ކަމަށެވެ. އޭގެ ބަދަލުގައި ހުވަފެން ދެކި އެކަން ހަގީގަތަކަށް ހެދުމަށް މިންނަތާ އެކު މަސައްކަތް ކުރުމުގެ އަޒުމުގައި ހުންނެވި ބޭފުޅެއް ކަމަށް ރައީސް ވިދާޅުވި އެވެ. 
"އަޅުގަނޑަކީ އަބަދުވެސް ހުވަފެން ފެންނަ މީހެއް. އަދި އެ ހުވަފެން ހަގީގަތަކަށް ހެދޭތޯ މަސައްކަތް ކުރާ ހިތްވާ މީހެއް. އަޅުގަނޑަކީ ނާއުއްމީދުގެ ތެރޭގައި ހަށަން ބަނދެލައިގެން ހުންނަން ބޭނުންވާ މީހެއް ނޫން،" ސަރުކާރުގެ ވައުދުތައް ފުއްދުމުގައި ވަރުބަލި ނުވާނެކަން ފާހަގަ ކުރައްވަމުން ރައީސް ވިދާޅުވި އެވެ. 
ރައީސް ވިދާޅުވީ މަސްވެރިކަމުގެ ދާއިރާއަށް ވެސް ސަރުކާރުން ގިނަކަންކަން ކޮށްދޭ ކަމަށާއި ނަމަވެސް އިދިކޮޅު ފަރާތްތަކުން އެ ކަންކަމުގެ ވާހަކަ އެއްގޮތަކަށް ވެސް ދައްކަން ބޭނުން ނުވާ ކަމަށެވެ. އެހެން ނަމަވެސް ސަރުކާރަކުން ރައްޔިތުންނަށް ކަމެއް ކޮށްދޭ ނަމަ އެވާހަކަ ދައްކަން ޖެހޭ ކަމަށް ރައީސް ވިދާޅުވި އެވެ. އަދި ރާއްޖޭގެ އިގްތިސާދާ މެދު ވިސްނާ ނަމަ އިދިކޮޅު ފަރާތްތަކުން ރާއްޖޭގެ މައްސަލަތަކުގެ ވާހަކަ ބޭރު ދުނިޔޭގައި ބޮޑުކޮށްގެން ނުދައްކާނެ ކަމަށް ވެސް ރައީސް ވިދާޅުވި އެވެ.
ކޮންމެ ދާއިރާއަކަށް ވެސް ގޮންޖެހުންތައް ހުންނާނެ ކަމަށާއި ސަރުކާރުން މަސައްކަތް ކުރަނީ ގޮންޖެހުންތަކުން އަރައިގަންނަން މަސައްކަތްތަކެއް ކުރުމަށް ކަމަށް ވެސް ރައީސް ވިދާޅުވި އެވެ. އެމަނިކުފާނު ވިދާޅުވީ ކޮންމެ ޕާޓީއަކުން ވެސް މަސައްކަތް ކުރާނީ ވެރިކަމަށް އަންނަން ކަމަށާއި ރައްޔިތުންނަށް އެންމެ ބޮޑު ހިދުމަތެއް ކޮށްދެވޭނީ ވެރިކަމުގައި ތިބެގެން ކަމަށެވެ. ރައީސް ވިދާޅުވީ ވެރިކަމުގެ ނިއުމަތް ލިބުމުން ޕާޓީގެ ތެރޭގައި ހަމަނުޖެހުން އުފައްދައި އެ ނިއުމަތަށް ފުރަގަން ދިނުމަކީ އެއްގޮތަކަށް ވެސް ކޮށްގެން ވާނެ ކަމެއް ނޫނެވެ.
ރައީސް ވިދާޅުވީ ދިވެހިން ބޭނުންވަނީ އަމާން އޮމާން ހިތް ފަސޭހަ ދިރިއުޅުމެއް އުޅޭށެވެ. އެކަމަށް ޓަކައި ޕާކްތަކާއި ގޮޑުދޮށްތައް ވެސް ބޭނުންވާ ކަމަށް ރައީސް ވިދާޅުވި އެވެ.