ރާއްޖޭގައި ހަރަކާތްތެރިވަމުންދާ ގޭންގުތަކަށާއި މަސްްތުވާތަކެތީގެ ބޮޑު ވިއުގަ އެއްކޮށް ނައްތާލެވޭ ވަރުގެ ވަރުގަދަ ހަމަލާއެއް ވަރަށް އަވަހަށް ދެވޭނެ ކަމަށް ހޯމް މިނިސްޓަރ ޢުމަރު ނަސީރު ވިދާޅުވެއްޖެ އެވެ.
ސިފައިންގެ މުއައްސަސާއިން ފުލުހުން ވަކިކޮށް، ވަކި މުއައްސަސާއެއްގެ ގޮތުން ޚިދުމަތް ދޭން ފެށިތާ 10 އަހަރު ފުރުމުގެ މުނާސަބާ ފާހަގަ ކުރުމަށް މިއަދު އިސްކަންދަރު ކޮށީގައި ބޭއްވި ރަސްމިއްޔާތުގައި ވާހަކަ ދައްކަވަމުން، ހޯމް މިނިސްޓަރ ޢުމަރު ނަސީރު ވިދާޅުވީ ރާއްޖޭގައި މިހާރު ހިނގަމުންދާ ބޮޑެތި ކުށްތައް ހިނގަމުން މެދުވެރި ކުރާ އެންމެ ބޮޑު ސަބަބަކީ މަސްތުވާތަކެތި ކަމަށެވެ.
އެގޮތުން، ރާއްޖޭގައި ހިނގަމުންދާ ގޭންގު ކުށްތަކާއި މީހުން މެރުމުގެ ހާދިސާތައް މަގުމަތީގައި ހިނގަމުން ދަނީ މަސްތުވާތަކެތީގެ ވަބާ ރާއްޖޭގައި ޖެހިފައިވާ ވަރުގެ ބޮޑު ކަމުން ކަމަށް އުމަރު ވިދާޅުވި އެވެ.
ޢުމަރު ވިދާޅުވީ، ރާއްޖޭގައި މަސްތުވާތަކެތި ބޭނުންކުރާ ކަމަށް ލަފާ ކުރެވޭ 10،000 މީހުން ތިބޭ ކަމަށާއި، އޭގެ ތެރޭގައި 5000 މީހުންނަކީ ވަޒީފާ އަދާކުރާ މީހުން ނޫން ކަމަށެވެ. އެހެންކަމުން، އެމީހުން މަސްތުވާތަކެތި ހޯދުމަށް ފައިސާ ހޯދަން ތަފާތު ގޮތްތަކެއް ހޯދާ ކަމަށާއި، ވައްކަން ކުރުމާއި ފޭރުމާއި ސަލާން ޖެހުން، ނުވަތަ އާއިލާގެ މީހުން އަތުން ގަދަކަމުން ވެސް ފައިސާ ހޯދާ ކަމަށް ޢުމަރު ވިދާޅުވި އެވެ.
"މިހާރު ހިނގަމުންދާ ކްރައިމްލައިން ހުއްޓުވުމަށްޓަކައި ސަރުކާރުން ވަނީ އަޒުމް ކަނޑައަޅާފައި. އިރާދަ ކުރެއްވިއްޔާ ކުރިޔަށް މި އޮތް ދުވަސްތަކުގެ ތެރޭގައި ވަރަށް ހަރުދަނާ ފިޔަވަޅުތަކެއް އަޅުގަނޑުމެން އިޢުލާން ކުރާނަން. މި މަސައްކަތަށް ބނޭނުންވާ ޕްލޭން އެކުލަވާލުމުގެ މަސައްކަތް ރައީސުލްޖުމްހޫރިއްޔާ ވަނީ މިހާރު އަޅުގަނޑާ ހަވާލު ކުރައްވާފައި." ޢުމަރު ވިދާޅުވި އެވެ.
ޢުމަރު ވިދާޅުވީ މިފަދަ ކުށްތައް ކޮށްގެން ގޭންގު ހިންގާ ފަރާތްތަކާ ޤައުމު ހަވާލު ނުކުރެވޭނެ ކަމަށެވެ. އެމީހުން މަގުމަތީގައި ބޭނުން ގޮތަކަށް އުޅުމަށް ފަހު، ފުލުހުން އެމީހުންގެ ކުށްތައް ތަހްޤީޤު ކުރަން ފަށާ ތަނާ ފިލައިގެން ރާއްޖޭގެ ރަށަކަށް ނުވަތަ ރާޢްޖެއިން ބޭރަށް ފުރައިގެން ދިޔުމުގެ ފުރުސަތު ވެސް ނުދެވޭނެ ކަމަށް ޢުމަރު ވިދާޅުވި އެވެ.
މިނިސްޓަރ ވިދާޅުވީ، ހަމައެކަނި މާލޭގައި ވެސް ހަރަކާތްތެރިވާ 30 އަށް ވުރެ ގިނަ ގޭންގު އޮންނަ ކަމަށެވެ. އޭގެ ތެރެއިން 13 ގޭންގަކީ ނުރައްކާތެރި ކުށްތަކަށް އަރައިގަންނަ ފަދަ ގޭންގުތައް ކަމަށާއި، މި ގޭންގުތަކުގެ މައްސަލަތައް ކޯޓުތަކުގައި ހުރި ނަމަވެސް އެ މައްސަލަތައް ނުހިނގާ އޮތީ ގޭންގުތަކުގެ ނުފޫޒުން ހެކިވެރިންނަށާއި ފަނޑިޔާރުންނަށް ބިރު ދައްކަމުން ދާތީ ކަމަށް ޢުމަރު ވިދާޅުވި އެވެ.
ޢުމަރު އިތުރަށް ވިދާޅުވީ ގޭންގު ތަކުގައި 50 ވަރަކަށް ލީޑަރުން މިހާރު ފާހަގަ ކުރެވިފައިވާ އިރު، އެމީހުންގެ ފަހަތުގައި، ގޭންގުތަކުގައި 500 ވަރަކަށް މެމްބަރުން ވެސް ފާހަގަ ކުރެވިފައިވާ ކަމަށެވެ.
"މިއީ އޮނިގަނޑު އޮތް ގޮތަކީ. އިރާދަކުރެއްވިއްޔާ މުޅި މި ސްޓްރަކްޗަރ އަށް އެއްކޮށް ދެވޭ ވަރުގެ ހަމަލާއެއް އަޅުގަނޑުމެން މި ދަނީ ތައްޔާރު ކުރަމުން. މި ހަމަލާ ލަސްތަކެއް ނުވެ އަޅުގަނޑުމެން ދޭނަން." ޢުމަރު ވިދާޅުވި އެވެ.
ޢުމަރު ވިދާޅުވީ، މިވަގުތު ފުލުހުންނަށް ދިމާވެފައިވާ އެންމެ ބޮޑު ގޮންޖެހުމަކީމަގުމަތީގައި ވަޅި ހެރުމާއި މާރާމާރީ ހިންގުމާއި މީހުން މެރުން ކަމަށެވެ. އަދި މިކަންކަން ހުއްޓުވުމަށް މިހާރު ޢަމަލު ކުރަންޖެހޭ ކަމަށާއި، ފުލުހުން ވެސް މި ގޮންޖެހުން ކަޑައްތު ކުރުމަށް ޢަމަލު ކުރަންޖެހޭ ކަމަށާއި، ބަޔާނެއް ނެރިލުމުން ނިމުނީ ނޫން ކަމަށެވެ.